||śrī gaṇeśāya namaḥ||

oṁ iti sphuratkisalayapāṭalārciṣi| sphuṭodaye savitari saukhaśāyikāḥ| aviskhalatsalalitabandhayā girā garīyasāṃ gurum upatasthurīśvaram_||1|| vimucyatāṃ śayanatalaṃ divākaraḥ karotkarair vidalitavidrumāruṇaiḥ| karoty asāv udayamahībhṛtaḥ kramāt parisphuransphuṭam iva padmarāgatām_||2|| kramādimāstava bhavaneṣu bhānumatprabhāhatās tadupalasālabhañjikāḥ| pṛthūnmiṣaddahanakaṇotkaracchalāttamaśchidaḥ suvata ivāryamārbhakān_||3|| ayaṃ kṣaṇād dayitatamena bhānunā samāgamastava bhavatīti śaṃsitum_| sphuraty adaḥ taralitamauṣasānilaiḥ kuśeṣayaṃ nayanayam ivāmbujapriyaḥ||4|| vivasvato vicakarūṣaḥ kṣapātamaḥ sphuṭajjapākusumavipāṭalās tviṣaḥ| vibhānty amūn nabhasi suvarṇagairikacchaṭā ivāsitamaṇipaṭṭakuṭṭime||5|| śritodaye hatatimirotkare janā dadurdṛśo dinakṛti baddhasaṃbhramāḥ| khavartmano mumuciṣi rśītarociṣi cyutaḫ padān na bhavati gauravāspadam_||6|| tatas tatīr udayagatāryamāśmanāmahaskare karanikarais spṛśaty adaḥ| piśaṅgitaṃ gaganatalaṃ vibhāvyate tadutthayā dahanaruceva sandhyayā||7|| dinaśriyo mukham aruṇāruṇaprabhāpiśaṅgitasphuṭaghanamegharājikam_ virājati pratinavakuṅkumacchaṭākṛtatviṣaṃ dadhad iva pattramañjarīm_||8|| apāramanty upahataśītadīdhitiprabhām ivāhimakaradhāmasampadam_| nimīlitātanutaratārakādhunā vibhāvarī viśati mahīdhragahvaram_||9|| ninārya yadvirahavijṛmbhaṇākulo vibhāvarī katham api sābhyupāgatā| vilokitā dayitatamā tathā mudaṃ tanoti no rajaniviyogipattriṇaḥ||10|| yathā śaśī pipatiṣurastaparvate| navāṃśumatkiraṇavirugṇacandrikaḥ| karoty aho api nijasampadaḥ sphuṭaṃ dviṣadgatā vipadadhikaṃ sukhodayam_||11||

yugalakam_||

smarāturapriyatamapāṇijakṣatīrniśāgame navanihitā mṛgīdṛśām_| nayannasāv adhikamanojñarāgatāṃ navātapo nipatati gaṇḍamaṇḍale||12|| vikāsibhir diśi diśi garbhanirbharasravanmadhugrahaṇādhiyeva satvaram_| saroruhair dalapaṭalacchalānmithaḥ prasāryate ruṇamaṇiśuktimaṇḍalam_||13|| tanoty asau navakuśakoṭidaṣṭayā vibhāvarījalakaṇamālayā sthalī| rasāyuṣām upari bhareṇa ghūrṇatāṃ vipāṇḍuracchavikusumodgamabhramam_||14|| ghanair ivātanutaracandrakacchalasphuṭāmarāyudhaśataśobhibhir diśaḥ| dhutair amī vidadhati piñchamaṇḍalaiḥ śikhaṇḍino rajanipayaḥpariplutāḥ||15|| adhikṣapaṃ dhavalakapolamaṇḍalasphuṭoditapratimatayā mṛgīdṛśām_| tadāhitām iva paripāṇḍurāṃ śriyaṃ dadhaty amī tava bhavanapradīpakāḥ||16|| upeyuṣī kamalarajovṛtekṣaṇo na vīkṣate rathacaraṇāhvayaḥ priyām_ sukhaṃ cirād upanatamapy asaṃśayaṃ vrajaty aho vidhihatakasya dūratām_||17|| vibhāvarīviratihatasya dundubheḥ kṛtavyathaṃ svanam avakarṇya kāmibhiḥ| punastarāṃ kṣaṇaśayitair nimīlyate vilocanaṃ ratarasajāgarāruṇam_||18|| prabhātajaṃ virahapariplavaṃ vadhūracintayanty anunayamagrahīnnayā| yiyāsite suhṛdi na sā na dūyate kuto thavā sukhamanudarkadarśinām_||19|| na niṣṭhitā nanu rajanī vilambyatāṃ tadāgame punar api mā kṛthāś ciram_| iti sravannayanajalaṃ priyoditaṃ gataṃ prati ślathayati kāpi no manaḥ||20|| niśīthinīvyapagamadundubhisvanair vinidratām api sahasābhyupāgatā| yiyāsurapy abhimatakaṇṭhagocaraṃ na kāminī ślathayati bāhupañjaram_||21|| viyogajāṃ śucamasahair vyapohituṃ niketanair uṣasi niṣidhyate dhunā| apāvṛtaprakaṭakavāṭasampuṭasphuṭāravair gamanam ivāñcitabhruvaḥ||22|| adaḥ kramād vikaṭanitambakānanadrumāntarakṣaṇaghaṭitaṃ divāpatat_| virājati sphuṭavihagāṇḍamaṇḍalaśriyaṃ dadhadgrahakulamastabhūbhṛtaḥ||23|| digaṅganānavakaladhautamekhalā nabhastalodadhivaḍavānalatviṣaḥ| niśātamaḥkṣitidharavajrakoṭayo vibhānty amūs taraṇiruco navodgatāḥ||24|| bibharty asau pṛthutaramaṇḍalorasā vibhāvarī dṛḍhaparirambhavibhramaiḥ| śaśacchalacchiśirakarastadunnatastanāsitāgurunavapattramañjarīm_||25|| sphuṭodayaḥ punar api bandhaviplavaṃ purā tava vyapanayati kṣapākaraḥ| pratīkṣatāṃ tadavadhiratra mā kṛthā manāg api kṣapitaguruśriyaṃ śucam_||26|| hataprabhe śaśini gate stagahvaraṃ vihāya tadvapur avatīrṇam ambarāt_| iti kvaṇanmadhupamiṣeṇa lāñchanaṃ kumudvatīṃīm iva khalu dhīrayaty adaḥ||27||

yugalakam_||

madhuspṛhānibhṛtanilīnaṣaṭpadaṃ kuśeśayaṃ hṛdayam ivārabindinī| bibharty asau tapanaviyogasañjvarajvalacchikhāśataśikhidāhadhūsaram_||28|| acandrikāmalayapaṅkacarcanā atārakāgaṇaparimekhalāguṇāḥ| digaṅganāḥ śaśividhurā ivādhunā dadhaty amūr lulitatamaẖ kacāṃ śriyam_||29|| śaśitviṣaṃ tvaritam ivodarāśrayāṃ rirakṣiṣur dinakararaśmiviplavāt_| asāvitaḥ kṛtanibirīsasampuṭaṃ kumudvatī racayati pattramīlanam_||30|| papau taṭaṃ priyatamayā samaṃ madhu pratikṣapaṃ dalaśayaneṣv aśeta yaḥ| rasāyuṣaḥ śaśidhara tasya sāmprataṃ samañjasaṃ saha kumudena bandhanam_||31|| tathā svapanmadhurasapānamattatāvicetanaḥ sarasijakukṣikoṭare| yathā kramād aviditabandhanavyathaḥ śilīmukhaḥ sphuṭam adhunā vibudhyate||32|| dadhadvapur vikasitaketakīrajovirūṣitaṃ kumudavanād vinirgatam_| vipāṇḍuraṃ tad udaravarticandrikācchaṭāśatasnapitam ivālimaṇḍalam_||33|| śritodayāruṇakaraṭaṅkakuṭṭanāvighaṭṭitaṃ diśi diśi dhāma bhāsvaram_| galaty adaḥ savitur ivāstaparvatabhramārpitasphuṭavapuṣaḥ kṣapāpateḥ||34|| samunmiṣattaraṇikarābhighātabhīpariplute śaśitimire śaśacchalāt_| sahasthite iva suranātha naśyato virodhitā vipadi parasparaṃ kutaḥ||35|| sphuṭākṣatāñcikhacitoḍuśāratā|m upāgate phalaka ivāmbare dhunā| śritodayāparagiriviṣṭarāvubhau durodaraṃ tanuta ivendubhāskarau||36|| mṛṇālinīdalabhidhuraṃ yathā yatā samunmiṣatyahimamarīcimaṇḍalam_| tiraskṛtāvatamasarāśimaṇḍalaṃ tathā tathonnamadiva lakṣyate nabhaḥ||37|| adhaścyutaṃ mama vapuṣor dham ity api kṣapābhṛtā bhramam abhivīkṣya bibhratā| jalāśayapratimitamastaparvate jighṛkṣuṇā tadiva divo vatīryate||38|| ito dhunā girigurughātaghaṭṭanāvighūrṇitārṇavajaladevateva te| manoramāmalitatimiśritāṃ śriyaṃ bibharty asau bhava bhavanārabindinī||39|| marāgatāṃ kakubhi gataḥ śatakratoḥ kramād amūṃ jigamiṣasi pracetasaḥ| mahāsam ity alikulahuṅkṛtair iva prabhākaraṃ kathayati nātha padminī||40|| śilīmukhaḥ sarasijapakṣmapeśalaṃ vilambitaṃ nigaḍam ivārdhavicyutam_| dadhanmadhuvyatikaralagnamaṅghriṇā visarpati tvaritamapogaḍhabandhanaḥ||41|| ahar pateś ciramanimeṣadarśanakramād iva srutaghanabāṣpaśīkaram_| sarojinī rajanipayaḥpariplutaṃ bibharty asau vikasitam abjalocanam_||42|| śilīmukhā vidhutapatattramārutaprasāritair uṣasi sugandhayanty amī| diśo dhunā nijatanulagnavisphuṭatkuśeśayotkaramakarandaśīkaraiḥ||43|| saraśśriyaḥ śapharukaśobhino mbujātsavibhramabhramaraghaṭā vivasvatā| ito dhunā śitimaṇiyaṣṭimaṇḍalīviḍambikā karanikareṇa kṛṣyate||44|| manoramasmitahasitāṃ parisravan niśājalasphuṭaruditotpalekṣaṇām_| ito dhunā śritakilakiñcitām iva prabhākaro ramayati nātha padminīm_||45|| bhujālatāmaśithilakaṇṭhavartinī ratotsukā dayitatamasya kurvatī| vijṛmbhate kila vinimagnapīvarastanadvayā tadurasi mattakāminī||46|| ratotsavapramadaviśeṣapīvare parāpnuyāt katham iva netra mekhalā| nitamba ity abhidadhad uccakaiḥ śukas sahāsatām uṣasi karoti subhruvaḥ||47|| na lāghavaṃ valanavilāsavibhrame vilokitaṃ kvacana mayedṛśaṃ tanoḥ| kalāravair vadati nitambamaṇḍale| niyojitā madhuram itīva mekhalā||48|| niśīthinīṃ samam ativāhya kāminā vrajaty asāv uṣasi muhus skhalanty api| tadutsukā galitadhṛtiḥ pratikṣaṇaṃ nirīkṣate vivalitakandharaṃ vadhūḥ||49|| samutthitaḥ śayanatalātkṣamārajaśchaṭāhatobhayapṛthupārśvavigrahaḥ| dadhatsadānavamathurāgataḥ śriyaṃ mataṅgajo para iva lakṣmaṇāgrajaḥ||50|| nabhasvatāmudavasitodarotthitāḥ sugandhitāṃ vidadhati vāsareṇavaḥ| patanty amūr grahatatayo divākaraprabhāhatā diśi diśi vāsare ṇavaḥ||51|| sarojinī payasī hṛdīva bimbitaṃ śritaṃ taṭānahimakaran dadhāra yā| tayālayaḥ sphuṭitakuśeśayotthayā na toṣitā nahi makarandadhārayā||52|| eṣā viśālaviśikhāmukhaviprakīrṇa- harmyopakārakusumapravaṇālipaṅktiḥ| abhyetya bandhujanateva niśāndhakāra- markāṃśubhinnamanuśocati tāranādaiḥ||53|| satkarṇikākanakaviṣṭarasanniviṣṭa- mūrtir nijaṃ kamalakesarapānasaṅgāt_| rolambacakram upari bhramaṇānubandhi pāriplavatvam iva śikṣayatīśa lakṣmīḥ||54|| bhāti dvirephakulamujjhitanaidratandra- raktāravindamakarandasapītilagnam_| adhyūṣuṇā śatamakhena mṛṇālasūtra- garbhaṃ vilocanasahasram iva vyapāstam_||55|| lokāntaraṃ jigamiṣoḥ śaśinaḫ pracaṇḍa- bhānupratāpavidhurāś ciram astaśailaḥ| tārāvarodhanavadhūḥ śirasā bibharti tuṅgātmanāṃ samuci_taṃ dhruvam etad eva||56|| ceto dunoti sudṛśāṃ nanu tāranāda- niṣṭho viyogavidhuraṃ raṇitena śaṅkhaḥ| vyaktaṃ prakāśayata eva bahirviśuddhim atyantavakrahṛdayād bata kasya śāntiḥ||57|| karṇe kuśeśayadṛśām upaśalyavarti- preyoviyogaviṣamajvarakātarāṇām_| krauñcasya samprati girāśanidhārayeva marmacchidā karakarāyitam āpatantyā||58|| āpraśnapūrvam upagūḍhavataḥ priyasya bāṣpāmbupūrapihitātanulocanāyāḥ| cakrīkṛtau madanalāsakakāṃsyatāla- līlāṃ stanau mṛgadṛśaḥ kṣaṇamīśa dhattaḥ||59 pratyagradaṃśajanitaśvayathūn salīlam ambhojakomalakarāṅgulikoṭibhāgaiḥ| bimbādharān madhurasītkṛti saṃspṛśantyaḥ kāntāḥ prayānti dayitāntikato dhunaitāḥ||60|| bhrūvibhramaṃ vidadhato bahudhaivataṃ ta- māsphālitāvikalanissvanavallakīkāḥ| gāyanti kin narapurandhrigaṇāḥ śaśāṅka- maule vibhātasamaye tava bhinnaṣaḍjam_61 bhramaṇavidhutapakṣaiḥ pītam ākāśa eva prītikakubham akuṇṭhotkaṇṭhamārād dvirephaiḥ| dalapaṭalavikāsasthūlabimbāmbujottho vikarati makarandakṣodam uccais samīraḥ||62|| iti giram upakarṇya preyasībāhubandha- vyatikarakṛtayatnāvāpakavyaktacihnam_| asakalaśaśimauliḥ kaṇṭhapīṭhaṃ dadhānaḥ surabhiparimalāṅkaṃ hemaparyaṅkam aujjhīt_||63||

iti haravijaye mahākāvye bhagavatprabodhanaṃ nāmaikānatriṃśas sargaḥ||