ekonatriṃśaḥ sargaḥ|
iti sphuratkisalayapāṭalārciṣi sphuṭodaye savitari saukhaśāyikāḥ|
aviskhalatsulalitabandhayā girā garīyasāṃ gurumupatasthurīśvaram||1||
vimucyatāṃ śayanatalaṃ divākaraḥ karotkarairvidalitavidrumāruṇaiḥ|
karotyasāvudayamahībhṛtaḥ kramātparisphuransphuṭamiva padmarāgatām||2||
kramādimāstava bhavaneṣu bhānumatprabhāhatāstadupalasālabhañjikāḥ|
pṛthūnmiṣaddahanakaṇotkaracchalāttamaśchidaḥ suvata ivāryamārbhakān||3||
ayaṃ kṣaṇāddayitatamena bhānunā samāgamastava bhavatīti śaṃsitum|
sphuratpadastaralitamaupasānilaiḥ kuśeśayaṃ nayanamivāmbujaśriyaḥ||4||
vivasvato vicakarūpaḥ kṣapātamaḥ sphuṭajjapākusumavipāṭalāstviṣaḥ|
vibhāntyamūrnabhasi suvarṇagairikacchaṭā ivāsitamaṇipaṭṭakuṭṭime||5||
śritodaye hatatimirotkare janā dadurdṛśo dinakṛti baddhasaṃbhramāḥ|
khavartmano mumuciṣi śītarociṣi cyutaḥ padānna bhavati gauravāspadam||6||
tatastatīrudayagatāryamāśmanāmahaskare karanikaraiḥ spṛśatyadaḥ|
piśaṅgitaṃ gaganatalaṃ vibhāvyate tadutthayā dahanaruceva saṃdhyayā||7||
dinaśriyo mukhamaruṇāruṇaprabhāpiśaṅgitasphuṭaghanamegharājikam|
virājati pratinavakuṅkumacchaṭākṛtatviṣaṃ dadhadiva pattramañjarīm||8||
apārayantyupahataśītadīdhitiprabhāmivāhimakaradhāmasaṃpadam|
nimīlitātanutaratārakādhunā vibhāvarī viśati mahīdhragahvaram||9||
nināya yadvirahavijṛmbhaṇākulo vibhāvarīṃ kathamapi sābhyupāgatā|
vilokitā dayitatamā tathā mudaṃ tanoti no rajaniviyogipattriṇaḥ||10||
yathā śaśī pipatiṣurastaparvate navāṃśumatkiraṇavirugṇacandrikaḥ|
karotyaho api nijasaṃpadaḥ sphuṭaṃ dviṣadgatā vipadadhikaṃ sukhodayam||11||
(yugalakam)
smarāturapriyatamapāṇijakṣatīrniśāgame navanihitā mṛgīdṛśām|
nayannasāvadhikamanojñarāgatāṃ navātapo nipatati gaṇḍamaṇḍale||12||
vikāsibhir diśi diśi garbhanirbharasravanmadhugrahaṇādhiyeva satvaram|
saroruhairdalapaṭalacchalānmithaḥ prasāryate 'ruṇamaṇiśuktimaṇḍalam||13||
snotyasau navakuśakoṭidaṣṭayā vibhāvarījalakaṇamālayā sthalī|
rasāyuṣāmupari bhareṇa ghūrṇatāṃ vipāṇḍuracchavikusumodgamabhramam||14||
????nairivātanutaracandrakacchalasphuṭāmarāyudhaśataśobhibhirdiśaḥ|
hutairamī vidadhāti picchamaṇḍalaiḥ śikhaṇḍino rajanipayaḥpariplutāḥ||15||
adhikṣapaṃ dhavalakapolamaṇḍalasphuṭoditapratimatayā mṛgīdṛśām|
???dāhitāmiva paripāṇḍuraśriyaṃ dadhatyamī tava bhavanapradīpakāḥ||16||
upeyuṣīṃ kamalarajovṛtekṣaṇo na vīkṣate rathacaraṇāhvayaḥ priyām|
sukhaṃ cirādupanatamapyasaṃśayaṃ vrajatyaho vidhihatakasya dūratām||17||
vibhāvarīviratihatasya dundubheḥ kṛtavyathaṃ svanamavakarṇya kāmibhiḥ|
punastarāṃ kṣaṇaśayitairnimīlyate vilocanaṃ ratarasajāgarāruṇam||18||
prabhātajaṃ virahapariplavaṃ vadhūracintayantyanunayamagrahīnnayā|
yiyāsate suhṛdi na sā na dūyate kuto 'thavā sukhamanudarkadarśinām||19||
na niṣṭhitā nanu rajanī vilambyatāṃ tadāgame punarapi mā kṛthāściram|
iti sravannayanajalaṃ priyoditaṃ gataṃ prati ślathayati kāmino manaḥ||20||
niśīthinīvyapagamadundubisvanairvinidratāmapi sahasābhyupāgatā|
yiyāsurapyabhimatakaṇṭhagocaraṃ na kāminī ślathayati bāhupañjaram||21||
viyogajāṃ śucamasahairvyapohituṃ niketanairuṣasi niṣidhyate 'dhunā|
apāvṛtaprakaṭakavāṭasaṃpuṭasphuṭāravairgamanamivāñcitabhruvaḥ||22||
adaḥ kramādvikaṭanitambakānanadrumāntarakṣaṇaghaṭitaṃ divaḥ patat|
virājati sphuṭavihagāṇḍamaṇḍalaśriyaṃ dadhadgrahakulamastabhūbhṛtaḥ||23||
digaṅganānavakaladhautamekhalā nabhastalodadhivaḍavānalatviṣaḥ|
niśātamaḥkṣatadharavajrakoṭayo vibhāntyamūstaraṇiruco 'ruṇodgatāḥ||24||
bibhartyasau pṛthutaramaṇḍalorasā vibhāvarī dṛḍhaparirambhavibhramaiḥ|
śaśacchalācchiśirakarastadunnatastanāsitāgurunavapattramañjarīm||25||
sphuṭodayaḥ punarapi bandhaviplavaṃ purā tava vyapanayati kṣapākaraḥ|
pratīkṣatāṃ tadavadhiratra mā kṛthā manāgapi kṣapitaguruśriyaṃ śucam||26||
hataprabhe śaśini gte 'stagahvaraṃ vihāya tadvapuravatīrṇamambarāt|
iti kvaṇanmadhupamiṣeṇa lāñchanaṃ kumudvatīmiva khalu dhīrayatyadaḥ||27||
(yugalakam)
madhuspaṣṭahānibhṛtanilīnaṣaṭpadaṃ kuśeśayaṃ hṛdayamivāravandinī|
bibhartyasau tapanaviyogasaṃjvarajvalacchikhāśataśikhidāhadhūsaram||28||
acandrikāmalayajapaṅkacarcanā atārakāgaṇamaṇimekhalāguṇāḥ|
digaṅganāḥ śaśividhurā ivādhunā dadhatyamūrlulitatamaḥ kacāṃ śriyam||29||
śaśitviṣaṃ tvaritamivodarāśrayāṃ rirakṣiṣurdinakararaśmiviplavāt|
asāvitaḥ kṛtanibirīsasaṃpuṭaṃ kumudvatī racayati pattramīlanam||30||
papau tarāṃ priyatamayā samaṃ madhu pratikṣapaṃ dalaśayaneṣvaśeta yaḥ|
rasāyuṣaḥ śaśidhara tasya sāṃprataṃ samañjasaṃ saha kumudena bandhanam||31||
tathā svanmadhurasapānamattatāvicetanaḥ sarasijakukṣikoṭare|
yathā kramādaviditabandhanavyathaḥ śilīmukhaḥ sphuṭamadhunā
vibudhyate||32||
dadhadvapurvikasitaketakīrajovirūpitaṃ kumudavanādvinirgatam|
vipāṇḍuraṃ tadudaravarticandrikācchaṭāśatasnapitamivālimaṇḍalam||33||
śritodayāruṇakaraṭaṅkakuṭṭanāvighaṭṭitaṃ diśi diśi dhāma bhāsuram|
galatyadaḥ saviturivāstaparvatabhramārpitasphuṭavapuṣaḥ kṣmāpateḥ||34||
samunmiṣattaraṇikarābhighātabhīpariplute śaśitimire śaśacchalāt|
sahasthite iva suranātha naśyato virodhitā vipadi parasparaṃ kutaḥ||35||
sphuṭākṣatāñcitakhacitoḍuśāratāmupāgate phalaka ivāmbare 'dhunā|
śritodayāparagiriviṣṭarāvubhau durodaraṃ tanuta ivendubhāskarau||36||
mṛṇālinīdalabhidhuraṃ yathā yatā samunmiṣatyahimamarīcimaṇḍalam|
tiraskṛtāvatamasarāśimaṇḍalaṃ tathā tathonnamadiva lakṣyate nabhaḥ||37||
adhaścyutaṃ mama vapuṣor 'dhamityapi kṣapākṛtā bhramamabhivīkṣya bibhratā|
jalāśayapratimitamastaparvate jighṛkṣuṇā tadiva divo 'vatīryate||38||
ito 'dhunā girigurughātaghaṭṭanāvighūrṇitārṇavajaladevateva te|
manoramāmalitatimiśritāṃ śriyaṃ bibhartyasau bhava bhavanāravindinī||39||
marāgatāṃ??? kakubhi gataḥ śatakratoḥ kramādamūṃ jigamiṣasi pracetasaḥ|
mahāsamityalikulahuṃkṛtairiva prabhākaraṃ kathayati nātha padminī||40||
śilīmukhaḥ sarasijapakṣmapeśalaṃ vilambitaṃ nigaḍamivārdhavicyutam|
dadha???nmadhuvyatikaralagnamaṅghriṇā visarpati tvaritamapoḍhabandhanaḥ||41||
aharpateściramanimepadarśanakramādiva srutaghanabāṣpaśīkaram|
sarojinī rajanipayaḥpariplutaṃ bibhartyasau vikasitamabjalocanam||42||
śilīmukhā vidhutapatattramārutaprasāritairuṣasi sugandhayantyamī|
diśo 'dhunā nijatanulagnavisphuṭatku'seśayotkaramakarandaśīkaraiḥ||43||
saraḥśriyaḥ śapharukaśobhino 'mbujātsavibhramabhramaraghaṭā vivasvatā|
ito 'dhunā śitimaṇiyaṣṭimaṇḍaliviḍambikā karanikareṇa kṛṣyate||44||
manoramasmitahasitāṃ parisravanniśajalasphuṭaruditotpalekṣaṇām|
ito 'dhunā śritakilakiñcitāmiva prabhākaro ramayati nātha padminīm||45||
bhujālatāmaśithilakaṇṭhavartinīṃ ratotsukā dayitatamasya kurvatī|
vijṛmbhate kila vinimagnapīvarastanadvayā tadurasi mattakāśinī||46||
ratotsavapramadaviśeṣapīvare parāpnuyātkathamiva te 'tra mekhalā|
nitamba ityabhidhadhaduccakaiḥ śukaḥ sahāsatāmuṣasi karoti subhruvaḥ||47||
na lāghavaṃ valanavilāsavibhrame vilokitaṃ kvacana mayedṛśaṃ tanoḥ|
kalāravairvadati nitambamaṇḍale niyojitā madhuramitīva mekhalā||48||
niśīthinīṃ samamativāhya kāminā vrajatyasāvuṣasi muhuḥ skhalantyapi|
tadutsukā galitadhṛtiḥ pratikṣaṇaṃ nirīkṣate vivalitakaṃdharaṃ vadhūḥ||49||
samutthitaḥ
śayanatalātkṣamārajaśchaṭāhatobhayapṛthupārśvavigrahaḥ|
dadhatsadānavamathurāgtaḥ śriyaṃ mataṅgajo 'para iva lakṣmaṇāgrajaḥ||50||
nahasvatāmudavasitodarotthitāḥ sugandhitaṃ vidadhati vāsareṇavaḥ|
patantyamūrgrahatatayo divākaraprabhāhatā diśi diśi vāsare 'ṇavaḥ||51||
sarojinī payasī hṛdīva bimbitaṃ śritaṃ taṭānahimakaraṃ dadhāra yā|
tayālayaḥ sphuṭitakuśeśayotthayā na toṣitā nahi makarandadhārayā||52||
eṣā viśālaviśikhāmukhaviprakīrṇa-
harmyopakārakusumapravaṇālipaṅktiḥ|
abhyetya bandhujanateva niśāndhakāra-
markāṃ'subhinnamanuśocati tāranādaiḥ||53||
satkarṇikākanakaviṣṭarasṃniviṣṭa-
mūrtirnijaṃ kamalakesarapānasaṅgāt|
rolambacakramupari bhramaṇānubandhi
pāriplavatvamiva śikṣayatīśa lakṣmīḥ||54||
bhāti dvirephakulamujjhitanaidratandra-
raktāravindamakarandasapītilagnam|
adhyūṣuṣā śatamakhena mṛṇālasūtra-
garbhaṃ vilocanasahastramiva vyapāstam||55||
lokāntaraṃ jigamiṣoḥ śaśinaḥ pracaṇḍa-
bhānupratāpavidhurāściramastaśailaḥ|
tārāvarodhanavadhūḥ śirasā bibharti
tuṅgātmanāṃ samuccitaṃ dhruvametadeva||56||
ceto dunoti sudṛśāṃ nanu tāranāda-
niṣṭho viyogavidhuraṃ raṇitena śaṅkhaḥ|
vyaktaṃ prakāśayata eva bahirviśuddhi-
matyantavakrahṛdayādbata kasya śāntiḥ||57||
karṇe kuśeśayadṛśāmupaśalyavarti-
preyoviyogaviṣamajvarakātarāṇām|
krauñcasya saṃprati girāśanidhārayeva
marmacchidā karakarāytamāpatantyā||58||
āpraśnapūrvamupagūḍhavataḥ priyasya
bāṣpāmbupūrapihitātanulocanāyāḥ|
cakrīkṛtau madanalāsakakāṃsyatāla-
līlāṃ stanau mṛgadṛśaḥ kṣaṇamīśa dhattaḥ||59||
pratyagradaṃśajanitaśvayathūnsalīla-
mambhojakomalakarāṅgulikoṭibhāgaiḥ|
bimbādharānmadhurasītkṛti saṃspṛśantyaḥ
kāntāḥ prayānti dayitāntikato 'dhunaitāḥ||60||
bhrūvibhramaṃ vidadhato bahudhaivataṃ ta-
māsphālitāvikalaniḥsvanavallakīkāḥ|
gāyanti kiṃ narapuraṃdhrigaṇāḥ śaśāṅka-
maule vibhātasamaye tava bhinnaṣaḍjam||61||
bhramaṇavidhutapakṣaiḥ pītamākāśa eva
prītikakubhamakuṇṭhotkaṇṭhamārāddvirephaiḥ|
dalapaṭalavikāsasthūlabimbāmbujotthaṃ
vikirati makarandakṣodamuccaiḥ samīraḥ||62||
iti giramupakarṇya preyasībāhubandha-
vyatikarakṛtaratnāvāpakavyaktacihnam|
asakalaśaśimauliḥ kaṇṭhapīṭhaṃ dadhānaḥ
surabhiparimalāṅkaṃ hemapayaṅkamaujjhīt||63||
iti śrībālabṛhaspatyanujīvino vāgīśvarāṅkasya
vidyādhipatyaparanāmno mahākave rājānakaśrīratnākarasya kṛtau
ratnāṅke haravijaye mahākāvye bhagavatprabodhanaṃ
nāmaikonatriṃśaḥ sargaḥ|