||śrī gaṇeśāya namaḥ||

oṁ iti rātrimukhe samaṃ priyair ghaṭamānāsu cakoradṛṣṭiṣu| aparāḫ priyaviprayogato bhṛśamāsedur upaplutāṃ daśām_||1|| smarakārmukayaṣṭivibhramaṃ kuṭilā cāndramasī kalāvahat_| dadhati sma tadīritāś śarā iva tanvyās tadabhīṣavo vyathām_||2|| na tadā tamaso bhavat kvacic chaṣidhāmnaś ca viśeṣadarśanam_| akarot sutanoryadandhatāṃ ciramasyā virahe vijṛmbhitam_||3|| kusumeṣupṛṣatkapakṣajaḫ paridhvanvanvirahāśuśukṣaṇim_ adhṛtadraḍhimāṇi subhruvā hṛdayāntyāśu dadāha mārutaḥ||4|| ka ivaiti vipadvatīha no pratikūlatvam adoṣavān api|| dsudṛśo virahe mṛta¯¯¯¯¯¯¯pa yad ūhur agnitām_||5|| pratibimbitavalabhākṛtau gurumūrchātimirais sma rayate| api cetasi dhūsarekṛte śvasitair darpaṇavattadāparā||6|| kusumaṃ nijabandhanād iva prasabhaṃ dakṣiṇamārutāhatam_| nyapatannijasanniveśatas sukumāraṃ kuṭilabhruvo manaḥ||7|| madanasya śarāsanaśriyām aparāṃ jyām iva kartum icchatā| bisatantutatistanau sthitā marutādhūyata vāmacakṣuṣaḥ||8|| pratipannasamāgamaṃ priye śramasaṃvegavaśād ivāyatum_| hṛdayaṃ śvasiti sma nirbharaṃ gurucintābharabhārapīḍitam_||9|| vijahīhi śucaṃ purā tava vyapayāty eṣa viyogasañjvaraḥ| kṣaṇam āśvasihi vyapohituṃ vyasanaṃ dhīratayā hi śakyate||10|| cirakālavataṃsitotpalaspṛhayā mañjurutaiḫ paribhraman_ iti dhīrayati sma kām api śravaṇopāntam ivaitya ṣaṭpadaḥ||11||

yugalakam_||

iha vallabhaviprayogataḥ praviśa¯jitaśaṅkamādhayaḥ| vyadhitaṃ vraṇitaṃ śarais smaro vivṛtadvāram itīva tanmanaḥ||12|| aviluptaparamparāsthitair dayitapremavimarṣavistaraiḥ| kṛtatīrtha ivādhṛtistanor avatāraṃ kurute sma mānase||13|| asamāptavikalpasaṅkulasmarasaṅkalpanibaddhamālayā| atidairghyabhṛteva subhruvas sasṛpe bhāvanayānavallabham_||14|| na ca kārśyadaśāṃ natabhruvaṃ madano jyā ca śarāsanāṭanim_| sumanassukumāravigrahāṃ virarāmāpaghṛṇo dhiropayan_||15|| kṛtacandanapaṅkacarcanām aparān tāpahṛtāṃ vyadhuẖ kṣaṇāt_| guruśoṣakṛśāṃ sarojinīm iva sugrīṣmakabhaṅgavāsarāḥ||16|| sphuṭasaurabhasampadāgatāṃ madhupā niśśvasitānilāṃstanoḥ| papur eva tadūṣmaviplutās sukham evādhikaduẖkhasādhanam_17 niśitair aśarīramārgaṇair hṛdayasya kṣatimīyuṣaḥ kṣaṇāt_| śaśicandrikayāñcitabhruvaḥ paruṣaṃ kṣārarajaśchaṭāyitam_||18|| virahānalatāpaviplavavyathayevāśu palāyanonmukham_ aparā hṛdayaṃ na pāṇinā gurucintānihitena nārudhat_||19|| apinanmadanas tathā śarais sudṛśaś cittaśaravyam utsukam_| na punaḫ pratisandadhau yathā tadabhinnāṃśavinākṛter dhanuḥ||20|| taṭabhūmir ivāparā babhau makarāṅgena vivṛddhim īyuṣā| niśi locanaśuktisampuṭacyutabāṣpodakabindumauktikā||21|| apanidramadhūkapāṇḍurā sudṛśo dṛśyata gaṇḍamaṇḍalī| gamitāsrujalaplavair iva kraśim ākīrṇatayātinimnatārm_||22|| surabhiśvasitānilāgatā kṛtamūrchām anapāyano parām_| anayanbhṛśamākulātmatāmuragāś candanakandalīm iva||23|| bhavanonnatacandraśālikāśayane dīrghaviyogabhītitaḥ| prathamaṃ priyakaṇṭhavartinī niśi nidrāmabhajatkṣaṇaṃ na yām_||24|| aparekṣitum āhitaspṛhā dayitaṃ svapnavitīrṇadarśanam_| bata tām api bahvamaṃstayattadaho kāryagater vicitratā||25||

yugalakam_||

abalatvam upeyuṣī tathā virahe kācid atābhyad utsukā| vinimīlitapakṣmapīḍitaṃ katham apy aśrujalaṃ yathāmucat||26|| pratimāṃ patitāṃ sakhīva tāṃ gurutāpopaśamāya subhruvam_| vyadhitāntarupāgatārdratāṃ śaśikantopalasālarbhañjikā||27|| śaśino jaladher udīyuṣo gurutadgarbhaviṣāgnineva tām_| upagūḍhaśikhā marīcayo ghanamūrchākulitāṃ niśi vyadhuḥ||28|| vibabhau ghanasārasaṃhatir nihitā snigdhasakhījanais tanau|| sudṛśo srukadarthanābhayād galitā gaṇḍatalād iva cchaviḥ||29|| smaratāpabhareṇa vibhramā na parimlānimavāpuradbhutam_| sudṛśas tarupallavā iva smitapuṣpābharaṇojjvalaśriyaḥ||304|| karamarpitamānane dadhau smarajṛmbhāsu pidhānalīlayā| galitāñjanadhūsaraṃ vadhūś śvasitaiḫ puṣṭam ivātanūṣmabhiḥ||315|| vinimīlitalocanāmbujā dadhatī kaṇṭakitāṃ tanutvacam_ nalinīva śaśākaraśmibhir drutamamlāyata kācid utsukā||326|| virahānala¯¯¯¯¯¯¯¯tattanuṭāṅkāra ivopaśuśruve| śayanīkṛtaphullapaṅkajasphuṭapakṣmāspadaṣaṭpadāravāḥ||33|| dayitāgamane pi bhāvinīṃ sthitim ālokya vikalpasambhṛtaiḥ| vidadhe pulakādibhis tanau sakṛdabhyāsa ivāñcitabhruvaḥ||34|| vyajanīkṛtapadminīdalaskhalitair dūram ivānilair vapuḥ| samupodvalito mṛgedṛśas saviśeṣaṃ madanānalo dahat_||35|| lulitālakavallarīkatāṃ dadhatā pāṇitalair niṣeduṣā| aparākhyadanālapanty api smarasantāpadaśā mukhendunā||36|| śaśibhṛnmaṇihārayaṣṭayo na śamāyotpalacakṣuṣo bhavan_| smarasañjvaraśoṣitocchalacchasiviṣyanditavāribindavaḥ||37|| virahe mṛgaśāvacakṣuṣām ayugāntapralaye vijṛmbhite| navapaṅkajakomalaṃ yayau ahimāpātavivarṇatāṃ vapuḥ||38|| dayite cirayaty anukramādviyadāskandati candramaṇḍale| bhṛśam utkalikākulā muhurmumuhur mūramanorathas striyaḥ||39|| jagrāha nūnam atuṣāramarīcibimba- madhyapraveśapunaruktivaśotthamauṣṇyam_ yadviprayuktataruṇījanadehadāham indus spṛśan karaśikhāvalibhiś cakāra||40|| āścaryam etad asamaṃ makarandabindu- sandohavarṣibhir api prasavātmakair yat_ vāmabhruvāṃ virahaviplutacetanānāṃ rasaṃśoṣyate tanuraho viśikhaiḫ patadbhiḥ||41|| digdhā ivodadhiviloḍanavibhramottha- lakṣmacchalocchalitahālahalacchaṭābhiḥ| mūrchāṃ vyadhuś śaśabhṛtaẖ kiraṇās sudhāmbu- viṣyandino pi virahāturasundarīṇām_||42|| vṛṣṭiṃ navāṃ rasamayīṃ vikiratyamanda- mātaṅkadāyini śaśāṅkaghane ghanorvāḥ| sthūlāśrubindukaṇamauktipaṅktirāvi- rāsīnnirāyatavilocanaśuktigarbhāt_||43|| anyādṛgapyaparathaiva janasya nūnaṃ bhāvasthitir bhavati viplutacittavṛtteḥ| naktaṅkarasya kiraṇās sudhayā yacardrāḥ preyoviyogavidhurāstaruṇīradhākṣuḥ||44|| vikṣiptavellahalabāhulatāẖ karābja- raktāṅgulīdalamarīcimadhucchaṭābhiḥ| tās saṃvibhāgam iva paṅkajasaṃstarasya santāpaśuṣkamakarandakaṇasya cakruḥ||45|| niśśvāsamārutaparāhatapuṇḍarīka- paryaṅkapiṅgalaparāgakaṇāpadeśāt_| reje viyogaśikhibhītipalāyamāna- gaurātmadehaparamāṇugaṇeva kācit_||46|| srastāmbujābjaśayanānmaṇikuṭṭimastha- raktārabindamukhalagnanakhāṃśulekhā| udgrīvahaṃsaśiśucañcuvikṛṣyamāṇa- sūtrā mṛṇālakalikeva tanorabhāsīt_||47|| tanvyāś śaśāṅkaśakalaṃ pratibimbitaṃ sad- acche kapolaphalake vidadhāra lakṣmīm_| cetonimagnaniśitasmarabāṇaśalya- niṣkarṣaṇānihitakaṅkamukhāyamānam_||48|| śayyīkṛtaikakarapaṅkajasanniṣaṇṇam acchokapolaphalakaṃ vidadhāra kācit_| sandhukṣitasmarakṛṣāṇuśikhāśatasya roddhuṃ ruṣeva śaśinaḫ pratimāvakāśam_||49|| itthaṃ visaṃsthuladaśās sudṛśo babhūvur indūrdayollasitaratnanidhau pradoṣe| ujjṛmbhamāṇaramaṇaprathamānurāga- mānapravāsavidhurasthitivipralambhāḥ||50||

iti rājānakaratnaviracite haravijaye mahākāvye virahavarṇano nāma caturviṃśas sargaḥ||