dvāviṃśaḥ sargaḥ|
ityardhadeharacitasthitimuttamāṅga-
gaṅgābhyasūyanaparāṃ giriśasya gaurīm|
nātho 'dhigamya saritāmatha candradhāma-
saṃmūrchitaḥ krudha iva kṣubhitastadāsīt||1||
utplutya dūramanuvavrajuṣā mṛgāṅka-
maṅkādivābhrapadavīmavagāhamānam|
svasthāna eva parivṛttijuṣā muhūrta-
mambhodhinā stimitaśāntajalena tasthe||2||
tāvadvidhāya jaladhiḥ stimitāmavasthā-
munmīlitānukṛtalocanaratnaśuktiḥ|
ścyotatsudhārdraśiśirāṃśukarāvamarśa-
viśliṣṭaśeṣaviṣamūrcha ivodatiṣṭhat||3||
tārāpathaṃ sapadi śiśrayiṣaḥ salīla-
mardhena yojayitumicchurivāmṛtāṃśoḥ|
ulāsivīciphalakapratibimbitaṃ sa-
dabhyutsasarja payasāṃ patirañjasārdham||4||
unnamramīnamakaraprakāravacūla-
kallolaketugajavājisamākulaṃ sat|
atyaurvavahnimagamajjaladheramanda-
māskandadānarabhasādiva toyasainyam||5||
antargataurvaviṣavahniśikhābhitaptā
ratnojjvalāḥ śitiruco vavaluḥ payodhau|
kallolabhogipatayaḥ parirabdhaśīta-
sacchāyacandrakaracandanaśākhivṛndāḥ||6||
abhyutthitena rabhasordhvataraṅgabāhu-
saṃchāditāmbaratalaṃ kṣitipṛṣṭhapīṭhe|
astraṃsi ratnanidhinānadhijagmupātra
sindhūpagūhanasukhaṃ saśuceva dūrāt||7||
antaḥsphuradvikaṭavidrumadaṇḍanirya-
cchāyanuviddhamudadheḥ śaradabhrabhāsaḥ|
āvartamaṇḍalamarājata muktanidra-
raktāmbujaṃ madhuriporiva nābhicakram||8||
madhyādhirūḍhasakalapratimāgatendu-
bimbasphuradvikaṭaratnaviṭaṅkapīṭhā|
adhyamburāśi racitā jaladevatābhi-
rdoleva rājatitarāṃ sma taraṅgalekhā||9||
nīhāragaurarucibhirmakarākarasya
tārāgaṇairadhijalaṃ pratimāniṣaṇṇaiḥ|
dadhre taraṅgabhujadaṇḍadṛḍhopagūḍha-
jyotsnānidāghajalaśīkarabindulakṣmīḥ||10||
chāyāgatāvikalanūtanacandrabimba-
vispaṣṭacakraghaṭanaṃ kṣubhitasya sindhoḥ|
muktāmbaraṃ nipatati sma vinīlakānti
daityādhipasya bhujavṛndamivormijālam||11||
cakre 'ṅkagāmaranadīśucihāragaura-
kallolapīvarapayodharapṛṣṭhabhājaḥ|
vīcīkarairjalanidhiḥ phaṇiphūtkṛtāri-
dhūmacchaṭāsitanavāgurupattravallīḥ||12||
pāriplavordhvavalitātanuratnakambu-
sāvartacakrakaravartanavīcibāhuḥ|
velāṅganā vilulitāñjananīlanāga-
veṇīlatāściramanartayateva sindhuḥ||13||
vyaktaṃ rasātalamukhaṃ kṣaṇamudvahantī
niḥśeṣanetrakumudotsavahetumindum|
draṣṭuṃ kutūhalavaśādiva nāgaloka-
lakṣmīrvyudāsa jalarāśijalottarīyam||14||
velānilāhativijarjaritasya sindhoḥ
pratyagraratnakusumastabakānyamandam|
kallolakampratanukānanamaṇḍalāni
bhasmīcakāra vaḍavāmukhasaṃkṣayāgniḥ||15||
preṅkhatpravālavalayāruṇamindumauli-
paryastalagnaviśikhāgniśikhāsahasram|
sindhoḥ puratrayamiva sphuradaindranīla-
stambhāyatormi nabhasaḥ salilaṃ nyapaptat||16||
vaimānikāmaravadhūrgamane taraṅgaiḥ
kṣiptāḥ sarāgamavalokya payomanuṣyāḥ|
adhyaurvavahni tadalābhavijṛmbhamaṇa-
śokā ivāśu jaladhau dadati sma jhampām||17||
kṣiptāstathordvhamudadhestaralaistaraṅga-
bhaṅgaiḥ plavāḥ saha vimānagaṇairviceruḥ|
ālokya saspṛhamamīṣu yathā surastrīḥ
sāṃyāttrikāścyutimamaṃsata nākadhāmnaḥ||18||
garbhīkṛtasphuritavidrumatāmratoya-
tālūni rejurudadhervivṛtāni pātum|
tālūramaṇḍalamukhānyasamaurvatāpa-
tṛṣṇāvaśādiva niśākaracandrikāmbhaḥ||19||
abhraṃkaṣaiḥ sphuṭamalairjaladhistaraṅga-
bhaṅgeṣu śītakiraṇasya babhāra bimbaiḥ|
śyāmāṅganājanakṛtāspadacāruratna-
vātāyanāsitaśilācitaharmyalīlām||20||
prāpte vivṛddhimudadhau sphuṭaphenahāsa-
sindhuprabhādhavalakañcukapūrṇapātram|
velāṅganāḥ phaṇabhṛtāṃ tarasāpajahru-
rjihmapravālanikarāṅgulikoṭikṛṣṭam||21||
ālokyatoddhataparasparasaṃprahāra-
kaṇḍūyanākulabhujairmukharāgalakṣmīḥ|
saṃsaktaśaṅkhaśakalatsaruvīcibhaṅga-
khaḍgodareṣvadhipayodhi payomanuṣyaiḥ||22||
abhyuddhṛtapracuraratnanidhānakumbha-
gambhīragartanikarairiva sindhurābhāt|
āvartamaṇḍalaśataiḥ prasabhāpaviddha-
paryantavartibhujagāyasaśṛṅkhalaughaiḥ||23||
kāśmīrakesaraparāgarucirvyaloki
lokena śītakiraṇasya niśāmukhe yat|
taddhāvyamānamiva nīranidherudragra-
vīcicchaṭābhirabhavatparipāṇḍu bimbam||24||
abhraṃkaṣakṣubhitasindhutaraṅgabhaṅga-
dhautānmṛgā'nkavapuṣo 'viralaṃ galadbhiḥ|
phullāni kairavakulāni kalaṅkabindu-
vṛndairivālivalayaiḥ śabalībabhūvuḥ||25||
kallolacakramudadhestaṭaśailasānu-
nirdhautadhāturasarañjitamābabhāse|
prātaḥ samunmiṣadanūrukarātapāṅka-
mabhraṃkaṣaṃ śikharajālamivāśmadhāmnaḥ||26||
helāvidāritataṭācaladaityavapra-
vakṣaḥsthalaprakaṭaśuktinakhormihastaḥ|
sindhurnṛsiṃha iva tāravirāvavṛtti-
ruddhūtavāḍavakṛśānuśikhāsaṭo 'bhūt||27||
bhāti sma garbhagirikāñcanakūṭakoṭi-
niryanmayūkhanikurambakarambyamāṇam|
māyāśayālumadhusūdananābhipadma-
paryastakesarasahasramivāmbu sindhoḥ||28||
vibhrājire jalanidherbhujagottamāṅga-
māṇikyakhaṇḍakiraṇacchuritāstadānīm|
tīreṣu lagnavaḍavāgniśikhāstaraṅga-
bhaṅgāḥ palāyanaparāyaṇatāmivāptāḥ||29||
sindhorudīyuṣi himatviṣi candrakānta-
viṣyandivāribhirivāhitavṛddhiyogāḥ|
āsphālanena taṭaśailaśilātaleṣu
pasphāyire sphuritaratnarucastaraṅgāḥ||30||
bhogīndrabhogaviniṣaṇṇatanostadānīṃ
pratyakṣameva bhujagāśanaketanasya|
bhasmīcakāra makarākaramaurvavahniḥ
śakto na rakṣitumihāpadi ko 'pi kaṃcit||31||
lakṣmacchalabhramaramaṇḍalaśāratāra-
bhāsā śaśipratimayotthitayā cakāśe|
paryantaghūrṇitataraṅgapalāśajāla-
tālūratāmarasakarṇikayārṇavaśrīḥ||32||
jvālājaṭālavaḍavāmukhavahnisāndra-
dhūmābhighātaghaṭanavyathitairivācchām|
muktāphalāśrukaṇasaṃtatimutsasarja
vistāribhirjalanidhirmaṇiśuktinetraiḥ||33||
pratyagraśoṇamaṇidīdhiticakravāla-
gaṇḍūṣaśīdhuvisarāḥ pulināni sasruḥ|
aprauḍhatīravanakesaraśākhikhaṇḍa-
sekakriyārthamiva sindhutaraṅkalekhāḥ||34||
ūuhuḥ pravālaviṭapāṅkurakoṭibhāga-
lagnā vilolavaḍavānaladhumadigdhāḥ|
śaṅkhāḥ karājalavīciṣu tāmranāla-
nīlāravindamukulaśriyam ambudhāmnaḥ||35||
cakruḥ sthitā nabhasi kūrmakuṭīrakasya
kirmīritāḥ phaṇiphaṇāmaṇiraśmirāgaiḥ|
saudāminīśabalitāmbudavṛndamoha-
vidrāṇahaṃsavisaraṃ taṭamūrmibhaṅgāḥ||36||
sthūlasphuliṅganikarāruṇarāgapuṣpa-
śārīkṛtāḥ pavanavegavitanyamānāḥ|
lakṣmīṃ dadhurjalanidhervaḍavāgnidhūma-
lekhāstadaṅkasaritāmiva dīrghaveṇyaḥ||37||
kākolakaṇṭharucibhirvikasatkarāla-
ratnāṅkaśīkarakaṇaiḥ sadṛśībhavadbhiḥ|
preṅkholitairdivi nijuhnuvire taraṅga-
bhaṅgairbhujaṃgapatayaḥ kṣubhitasya sindhoḥ||38||
vistāribhiḥ sphuritaratnamarīcirāga-
dhātucchaṭāśabalitaistarasā taraṅgaiḥ|
preṅkhadbhirambaramatastaradamburāśi-
rucchrāyamāpya śikharairiva vindhyaśailaḥ||39||
vīcīvighaṭṭanavikīrṇavilolaśukti-
rmuktāṃśubhirmakaraketuravāpa lakṣmīm|
saṃcāravartmabhirivābhinavotthitasya
śītatviṣaḥ pramathanāthakirīṭadhāmnaḥ||40||
abhyāhatāniva vighūrṇitamandarādri-
sānucyutairniśitakoṭibhiraśmakūṭaiḥ|
ucchvāsalakṣyarudhirasrutitāmrarāga-
cchedājjhaṣā jalanidhau dadhati sma kaṇṭhān||41||
vyātenuṣībhirabhitaḥ sphutaphenahāsa-
lakṣmīṃ rarāja jaladhiḥ saridaṅganābhiḥ|
paścādupetya parihāsavidhatsayeva
kallolapāṇipihitātanuśuktinetraḥ||42||
mandīkṛtasya śikhino jaṭharāspadasya
toyātipānavaśataḥ pṛthuvīcihastaiḥ|
uttejanārthamiva tīravanāntarāla-
tālīsacūrṇanikaraṃ vicakarṣa sindhuḥ||43||
ujjṛmbhitāviralavepathavo 'dhijagmu-
rāsajyamānavikaṭotkalikānubandhāḥ|
abhyullasanmakaraketuśarābhighāta-
kroḍīkṛtāstaṭabhuvo bhṛśamākulatvam||44||
yasyodayādhigama eva kulādrituṅga-
bhaṅgīśataiḥ śriyam avāpa viśeṣagurvīm|
tasya pramārṣṭumiva bimbakalaṅkamindo-
rambhodavartma jaladhistarasā jagāhe||45||
candrāvadātarucayo jaladhervireju-
rujjṛmbhitā diśi diśi sphutaphenapālyaḥ|
preṅhattaraṅgabhujagādhipadīrghabhoga-
nirmuktakañcukakalāpapulākaśobhāḥ||46||
saṃkṣobhamādadhatamudvatavīcicāpa-
maurvīnirargalaśarasthitimaurvavahneḥ|
gaurīpateriva vilocanamūrdhvasaṃstha-
moṣaṃcakāra makaradhvajamiddhamarciḥ||47||
uddāmavāḍavakṛśānuśikhāsahasra-
tāpānubandhaśamanārthamivormihastaiḥ|
nītā nadībhirarucajjhaṣaketanasya
phenacchaṭāruciracandanapaṅkacarcā||48||
abhyutpatatsarabhasaṃ suracakrapīta-
śeṣodarasthamadirāvyatiṣaṅgahetoḥ|
muktāmbaraṃ nipatati sma taraṅgajāla-
mujjṛmbhamāṇamadamohamivāmbudhāmnaḥ||49||
niḥśeṣalokanayanotsavahetumeka-
mālokya candramiva saṃbhṛtagāḍhatoṣaḥ|
ambhonidhirgalitamauktikabāṣpabindu-
saṃdohaśāraśuciśuktivilocano 'bhūt||50||
sindhoścakāsatitarāṃ sma maṇiprakāṇḍa-
raśmicchaṭāvisaravicchuritāstadānīm|
hartuṃ rasātalatamāṃsi gṛhītadīpra-
dīpā iva pratidiśaṃ pṛthuvīcihastāḥ||51||
tārāpathaṃ caturapātasamīravega-
dhūtā tathodapatadambudhivīcipaṅktiḥ|
tanmadhyavartibhiralābhi yathā muhūrta-
mārādgrahaistaralabudbudavṛndalakṣmīḥ||52||
kallolapaṅktibhirathoragaphūtkṛtāgni-
dhūmacchaṭāśabalitābhirapāti nākāt|
bimbaṃ tuṣārakiraṇasya dadhāvuṣībhi-
rālagnatadgatamalābhirivāmburāśeḥ||53||
aurvāgnidāhamanapekṣya rasānubandha-
bhājo javādviviśuṣīḥ kakubhāṃ mukhebhyaḥ|
sindhuścakāra tarasā saritaḥ parācīḥ
snigdhe 'pi jātu na jaḍasya bhavatyapekṣā||54||
antasthaśeṣaphaṇamaṇḍalaphūtkṛtottha-
niḥśvāsavātavaśato nu saratnarāgāḥ|
sindhoravardhiṣata dhautadiśaḥ śaśāṅka-
dhāmāvamarśajanitāstarasā taraṅgāḥ||55||
saṃkṣobhamāgatavataḥ prasarattaraṅga-
bhaṅgotthitaṃ kramaviśaṅkaṭamamburāśeḥ|
tālūramaṇḍaladhatta kulālacakra-
nirvartyamānapariṇāhiśarāvalīlām||56||
velāparyastakukṣiprakaravigalitasthūlamuktāphalāccha-
jyotsnālokopaliptagrahamaṇiśabalavyomavīthīvilagnāḥ|
tasthuḥ sindhostaraṅgāḥ kṣaṇamatanuśikhāśekharaurvānalārci-
stāpaploṣapraśāntyai śiśiraśaśadharasparśatarṣādivordhvam||57||
vitanvanto lakṣmīmaviraladarīdattaghaṭanāṃ
sphuradratnacchāyārucirataṭavallīvanabhuvaḥ|
virejuḥ kallolāḥ kṣitibhṛta iva vyālavasatiṃ
vihāyottiṣṭhantaḥ kṣubhitajalajālasya jaladheḥ||58||
saṃdhyānṛttānubandhadrutarayaśithilagranthinirmuktamadhyaṃ
sthāṇorvaiyāghramārādajinamiva bhuvi sraṃsamānaṃ vireje|
vajratrāsākulāntaḥ śritaśikharikacatkāñcanādhityakorvī-
niṣṭhyūtābhīṣuvaṃśavyatikaraśabalacchāyamambho
'mburāśeḥ||59||
dhutataṭagiridhātuvrātadhūlicchaṭābhi-
śchuritapṛthumukhānāṃ sindhurambhogajānām|
drutamakṛta śiraḥsu svachanakṣatramālā-
śriyam atanutaraṅgakṣiptaratnāvalībhiḥ||60||
kṣiptvā tīreṣvanarghānglapitaśaśirucaḥ saṃcayāṃstānmaṇīnāṃ
tacconmūlyānukūlaṃ sarasaphalabhṛtāṃ maṇḍalaṃ pādapānām|
dūrārūḍhā nipeturjaladhijalarayāstatkṣaṇaṃ vāḍavāgnau
ke vā na prāpnuvanti vyasanamupagatā vikriyāṃ jāḍyahetoḥ||61||
ādāyaurvānalakavalitaṃ śaṅkhacūrṇaṃ tadānī-
makarṣantastaṭavanabhuvo nāgavalīdalaughān|
bhagnānekakramukaśakala(khadira)granthayo vīcibhaṅgā-
stāmbūlasya sthitimavikalāṃ cakrurabdhe(rindo)rivettham||62||
prāptaḥ kāmapyabhikyāṃ yadudayasamayārabdhavelāvijṛmbhā-
saṃbhāroddāmitāmbhaḥ kulagiriśikharaśreṇituṅgaistaraṅgaiḥ|
tasyāśaktaḥ pramārṣṭuṃ malamamṛtaruco naktamaṅkotthitasya
sthāne dhūmāyamānaṃ hṛdayamiva dadhau sindhuraurvānalārciḥ||63||
saṃbhogoddāmalīlārasarabhasahasadvaktracandrāḥ puraṃdhrīḥ
kurvāṇasyāparādhasmṛtivimukhadhiyo vallabheṣvastamānāḥ|
kaṃdarpasyeva ketuṃ samakaramudadhirvīcidaṇḍaṃ jalaugha-
kṣobhavirbhavidhopasphuṭajayapaṭahārāvaramyaṃ vyudāse||64||
pratikakubhaṃ gavākṣaghaṭitā vikāsikumudaśriyaṃ vidadhataḥ
sphuṭataramaindavānarahitā gṛhītavikaṭadrumādriśikharāḥ|
punarapi seturabhasādvalīmukhagaṇā ivāśukiraṇāḥ
sakalamacukṣubhanpatimapāṃ vikīrṇanavaratnaśārapulinam||65||
iti śrībālabṛhaspatyanujīvino vāgīśvarāṅkasya
vidyādhipatyaparanāmno mahākave rājānakaśrīratnākarasya kṛtau
ratnāṅke haravijaye mahākāvye samudrollāsavarṇano nāma
dvāviṃśaḥ sargaḥ|