ekonaviṃśaḥ sargaḥ |

spaṣṭocchvasatkiraṇakesarasūryabimba- vistīrṇakarṇikamatho divasāravindam | śliṣṭāṣṭadigdalakalāpam uṣāvatāra- baddhāndhakāramadhupāvali saṃcukoca || 1 || 1. udāhṛto 'yaṃ ślokaḥ kāvyaprakāśe daśamollāse saṃkaraprakaraṇe.

uṣāvatāraḥ pradoṣaḥ | avataraty asminn ity avatāraḥ | ‘ave tṝstroḥ—’ ity adhikaraṇe ghañ_ || 1 ||

astādrigocaracaraṃ ruruce cirāya gorocanārucimarīci virocanasya | bimbaṃ dināntapavanāhatapuṇḍarīka- paryastapakṣmarajaseva vilaṅghyamānam || 2 ||

gorocanā gavāṃ viṣāṇamadhyād udbhūto rāgadravyaviśeṣaḥ | virocanaḥ sūryaḥ | pakṣmāṇi kesarāḥ || 2 ||

sindhau kusumbhakusumastabakābhitāmra- m ājihmakānti tapanaḥ pratibimbitaṃ sat | saṃpaśyati sma nijamaṇḍalamastakūṭa- saṃghaṭṭabhagnarathakāñcanacakraśaṅkī || 3 ||

kusumbhaṃ padmakam_ || 3 ||

prāpte kramād valanapuñjitadigvibhāga- vikṣiptadīptikusumakṣapitāyatitvam | astādrimūrdhani babandha sarojabandhu- bandhūkaśekharamatho divasāvadhiśrīḥ || 4 ||

valanaṃ parivartanaṃ veṣṭanaṃ ca | tena saṃkalitaiḥ kiraṇair eva kusumaiḥ kṣapitāyatir niṣpratāpaḥ, dairghyahīnaś ca | bandhūkaṃ bandhujīvakam_ || 4 ||

astāvalambiravibimbatayodayādri- cūḍonmiṣatsakalacandratayā ca sāyam | saṃdhyāpranṛttaharavādyagṛhītakāṃsya- tāladvayeva samalakṣyata nākalakṣmīḥ || 5 ||

astetyādiślokasyeha pāṭhaḥ pramādaja iva lakṣyate | agre hy andhakārodgamānantaraṃ candrodayo varṇayiṣyate | kāṃsyatālaṃ vādyabhāṇḍaviśeṣaḥ | nāka nabhaḥ || 5 ||

pratyagrarāgaghaṭanendukalākirīṭa- śailādhirājasutayor iva gāḍhasaṃpat | saṃdhyāhitātha divasakṣapayoḥ śarīra- bhāgadvayāviralavṛttir ajṛmbhata śrīḥ || 6 ||

pratyagrā rāgeṇa lauhityenābhiṣv aṅgeṇa ca ghaṭanāśleṣo yasyām_ | saṃdhyā kālaviśeṣaḥ | tasyā hi kāryajanakatvāt_ | saṃdhiś ca śarīrayormiśrīkaraṇam_ | tayā āhitā kṛtā || 6 ||

saṃdhyāpravṛttirudhirāruṇasāndradhātu- dhūlicchaṭākapiśitāmbaradigvibhāgā | adhyamburāśi giripaṅktir iva nyapapta- d abhyāpatat kuliśatākulitā dinaśrīḥ || 7 ||

saṃdhyāpravṛttir eva rudhirāruṇā dhātudhūliḥ | saṃdhyāpravṛttivad rudhiravac cāruṇeti yojyam_ | nyapaptan nipapāta | ‘pataḥ pum_’ iti pum_ | abhyāpatanti yānti kulīnāṃ caṭakānāṃ śatāni tair ākalitā || 7 ||

preṅkhatkulāyakalanonmukhapattricakra- kolāhalākulaviśaṅkaṭadiglatāgraḥ | tigmāṃśupātaviśadākṛtidūradṛśya- cchāyāpatho 'dhiniśam ambarapādapo 'bhūt || 8 ||

chāyāpatho nabhonadīpravāho 'pi || 8 ||

prāpte 'staśailaśikharasthitim uṣṇabhāsi lokānusārasaralatvajuṣo nalinyaḥ | saṃdhyāṃ sasaṃbhramam avandiṣateva sāya- mātāmrakorakakarāñjalijālabandhāḥ || 9 ||

lokasyānusāro 'nuvartanaṃ tena tena vastunārādhanam_ | tena saralatvaṃ sadācāratā || 9 ||

saṃdhyātapāruṇitapārśvataṭāvalambi- bimbaikadeśajaladaḥ kṣaṇam astaśailaḥ | vajravraṇānanagalatkṣatajokṣitārdha- vicchinnaviślathapatattra ivāvabhāse || 10 || 1. ‘vraṇātanu’ ka.

taṭāvalambī bimbasyābhogasyaikadeśo yeṣām_ | patattrāṇi pakṣāḥ || 10 ||

abhyeyuṣaḥ pariṇatiṃ samayakrameṇa sāyaṃ nabhaḥsarasi vāsarapaṅkajasya | srastāṃśupakṣmaravimaṇḍalabījakoṣa- cakraṃ babhāra paridhūsarapīvaratvam || 11 ||

11 ||

tuṅgāvakāśaracitasthitim ātapasya śeṣaṃ samutsukatayeva didṛkṣamāṇāḥ | utkaṃdharā iva sarojabhuvo babhūvu- r unnamrakorakakarālitapuṇḍarīkāḥ || 12 ||

12 ||

ākṛṣyamāṇam iva paścimadigvibhāga- baddhāspadadviradadīrghakarārgalena | tārācchabudbudakarālanabhastaṭāka- raktāmbujaṃ tapanabimbam alambatārāt || 13 || 1. ‘taḍāga’ kha.

13 ||

paryastam astagiri sānuni sāndrasāṃdhya- rāgāruṇacchavi sahasramarīcibimbam | kaṃdarpakopitaharasphuritānalārci- r ūrdhvākṣitārakatirohitabhedam āsīt || 14 ||

tirohitabhedam alakṣitaviśeṣam_ | sadṛśam ityarthaḥ || 14 ||

āvirbhavattimirasaṃvalanānuviddha- saṃdhyāṃśudhūsaravipāṭalamuṣṇadhāmnaḥ | bhāti sma niḥśvasitadhumaśikhāvakīrṇa- vistīrṇaśeṇaphaṇaratnaviḍambi bimbam || 15 || 2. āvirbhavad ityādiślokaḥ kha-pustake nāsti.

15 ||

muktāmbarastimirataskaralupyamāna- lakṣmīmalīmasaruciḥ prakaṭopaghātaḥ | ahnāya vāsarahitasphuṭalohitaśrī- ruṣṇāṃśurastagirikānanamabhyavikṣat || 16 ||

ambaram ākāśaṃ vasanaṃ ca | lakṣmīḥ śobhā tayāpahṛtayā yājātā viśvasya (?) malinarucir vicchāyaḥ | prakaṭopaghātaś ca spaṣṭaprahāraḥ | vāsarebhyo dinebhyo hitaḥ janakatvāt_ | vāsena ca gṛheṇa rahitaḥ nirdhanatvāt_ | lohitā raktā | lohitaṃ ca rudhiram_ || 16 ||

sindūrarājiṣu ghanaṃ sphuradanyavarṇa- bhedeṣv alakṣyam adhimandirabhitticitram | bhāti sma nirjitajaracchukaghoṇaśoṇa- rāgolbaṇacchavi raveḥ karacakravālam || 17 || 3. ‘alakṣyarucimandira’ kha.

ghoṇā nāsikā || 17 ||

ābhāsatāmbaratalaṃ divasāvasāna- rāgāruṇacchavi viḍambayadambu sindhoḥ | bhaṅgābhiyuktamadhukaiṭabhahastidhūta- vaikuṇṭhanābhinalinodaradhūlipiṅgam || 18 || 1. ‘bhṛṅgābhi’ kha. 2. ‘hasta’ kha.

madhukaiṭabhau daityabhedau tābhyāṃ bhaṅgāya dhūtaṃ kampitam_ || 18 ||

adhyūṣuṣaḥ sapadi candrakiṇo nivāsa- yaṣṭiṃ śanair nijabharānamitāgrabhāgām | saṃdhyātapo nayati karburatāṃ svakaṇṭha- m ullāsitasphuritacandrakacakravālaḥ || 19 || 3. ‘bhāgam_’ kha. 4. ‘karburitāṃsakaṇṭha’ ka; ‘karburatāṃ sma kaṇṭha’ kha

19 ||

uttānakūrmakaraṇisphuraduṣṇaraśmi- bimbā śanaiḥ sarid iva sphuṭapattrinādā | astāvanīdhraśikharān nipapāta dhātu- paṅkāruṇātapajalā jaladhau dinaśrīḥ || 20 ||

karaṇiḥ sāmyam_ || 20 ||

vicchāyatām abhajata kṣaṇadāvatāra- sāndrībhavattimiradhūsaritāruṇaśrīḥ | dhūmacchaṭābhihatavidrumadaṇḍakhaṇḍa- saṃvāditāṃ dinakarasya dadhat karaughaḥ || 21 ||

21 ||

tuṅgātmatāsadṛśam adhyavajahnuṣo 'sta- śailasya tasya nidhanaṃ vrajatu pratiṣṭhā | ālambito 'mbaratalātpatatā karaughaiḥ sindhau na yaḥ saha sahasrarucā nyapaptat || 22 || 5. ‘abhyavajahnuṣo’ kha. 6. ‘patitaḥ’ kha.

adhyavajahnuṣo vyavahṛtavataḥ | pratiṣṭhā maryādāvasthānam_ | karāḥ pāṇayo 'pi || 22 ||

tejaḥprakarṣaparihānim upeyivāṃsa- m ārāt pradoṣatamasābhibubhūṣyamāṇam | ambhonidhau tapanam anvapatad dinaśrī- r ekātmatāṃ vidadhatām idam eva yuktam || 23 ||

23 ||

ārūḍhamārdavam upāmbudhilambamāna- bimbaḥ krameṇa nipatan ravir antarikṣāt | ullāsitatsalilatuṅgataraṅgabhaṅga- saṃsargajātajaḍim eva babhāra tejaḥ || 24 || 1. ‘saṃsaṃga’ kha.

24 ||

visraṃsamānakapilāṃśuśikhāsahasra- viṣpandisāndrarudhirasruti sūryabimbam | chinnaṃ javāj jalanidhau nipapāta kāla- khaḍgena visphuritam ahna ivottamāṅgam || 25 ||

25 ||

gaurīva gaurakaraśekharakaṇṭhapīṭha- baddhāspadātanuviṣacchavilaṅghitaśrīḥ | śyāmībabhūva jaladhau kaladhautakāṣa- piṅgacchavis timirasaṃvalitātha saṃdhyā || 26 || 2. ‘dhāma’ kha.

gaurakaraś candraḥ || 26 ||

antarvivikṣur iva bhānumato rathāśva- paṅktiḥ sphuratsalilasairibharoṣadṛṣṭā | śvāsānilaiḥ sapadi jarjarayāṃcakāra sindhor jalaṃ vidhutaphenilavīcicakram || 27 ||

sairibhā mahiṣāḥ | teṣāṃ roṣo 'śvaiḥ saha śaśvadvirodhāt_ | phenilaṃ phenavat_ | ‘phenādilacca’ || 27 ||

uccikṣipe 'vataratām adhisindhu padma- bandhor avāṅmukhatayā sthagitekṣaṇaśrīḥ | sevārasād iva taraṅgasamīraṇena karṇaprakīrṇakaśikhānikaro harīṇām || 28 || 1. ‘same raṇena’ kha.

prakīrṇakaṃ cāmaram_ | harayo 'śvāḥ || 28 ||

preyāṃsam arkam iva dṛṣṭipathavyatīta- m antarvikalparacitākṛtim īhamānāḥ | premṇā vilokayitum askhalitena cakru- r ambhojanetravinimīlanam ambujinyaḥ || 29 ||

29 ||

śyāmāvatārasamayena malīmasatva- m āseduṣā sthagitatigmamarīcirociḥ | sallohakāntamaṇineva tadāndhakāra- kālāyasaṃ prasabham ācakṛṣe purastāt || 30 || 2. ‘kānti’ kha. 3. ‘tadandha’ kha.

lohakānto 'yaskāntamaṇiḥ | sa dūrastho 'pi lohākarṣaṇakṣama iti prasiddham eva | kālāyasam ity ayoviśeṣasya saṃjñā | ‘anośmāyaḥsarasāṃ jātisaṃjñayoḥ’ iti ṭac_ || 30 ||

tāvat krameṇa dayitārkaviyogajanma- dāhajvaravyathitadigvanitākarās taiḥ | kṣmāmaṇḍalaṃ vigalitāñjanabāṣpatoya- leśotkarair iva tamaḥśakalaiḥ pupūre || 31 || 4. ‘maṇḍalī’ ka.

tāvat tataḥ tāvān vā | kramo 'lpā paripāṭī || 31 ||

klāntaṃ divākarakarālakarābhiṣaṅgā- c chāyām aśiśriyad atho timiraṃ taruṇām | līlāniṣaṇṇavinimīlitalocanārdha- romanthamantharasamūracamūracakram || 32 || 5. ‘viṣaṇṇa’ kha.

abhiṣaṅgaḥ parābhavaḥ | samūracamūrau mṛgaviśeṣau || 32 ||

chāyāpathais timirasaṃvalanānubandha- nirvyāmadīrghavikaṭaiḥ kṣitipīṭhapṛṣṭham | śārībabhūva patite taraṇau kalinda- kanyāviveṣṭanavibhinnajalaughakalpaiḥ || 33 || 6. ‘nirvyoma’ kha. 1. ‘śyāmī’ ka. 2. ‘taraṇau patite’ kha.

kalindakanyā yamunā | tasyā hāvani (?) viveṣṭanena pitur ādityasya pātād duḥkhajananena bhūmau valanena vibhinnāny adhikamalināni jalāni tattulyaiḥ || 33 ||

mandānilāhati taraṅgitakesarāgra- raktāravindamakarandasapītilagnāḥ | bhagne 'hani bhramarasaṃhatayaḥ prasasru- r eṣyan niśātimirapatticamūyamānāḥ || 34 ||

sapītiḥ sahapānam_ | camūyamānāḥ senātvam ācarantyaḥ || 34 ||

astādripārśvam upajagmuṣi tigmabhāsi jānīta śītakiraṇo 'bhyudito na veti | cārā ivātha rajanītimiraprayuktā- ś ceruś ciraṃ caraṇabhūmiṣu cañcarikāḥ || 35 ||

cañcarīkā bhramarāḥ | teṣāṃ saṃcārabhūmayaḥ kusumitāḥ pradeśāḥ | cārapakṣe—caraṇabhūmiś caryamāṇasya gamanamārgaḥ || 35 ||

prāpte 'staśailaśikharaṃ taraṇāvabaddha- sāndrānubandhatamaso 'py abhavan vanāntāḥ | saṃcāriṣaṭcaraṇacakragṛhītadāna- gaṇḍūṣagaṇḍagurugandhagajāndhakārāḥ || 36 || 3. ‘śikharāṃtaraṇā’ kha. 4. ‘bandha’ ka.

36 ||

bhāsvacchavir bhuvanaveśmagataḥ śaśāma yāvat pataṅgapatanād divasapradīpaḥ | tāvat kuto 'py udabhavan nayanopaghāta- dakṣaṃ maṣīmalamalīmasam andhakāram || 37 ||

bhāsvān āditya eva bhāsvatī ca bhrājamānā chavir yasya | pataṅgaḥ sūryaḥ śalabhaś ca | maṣī kajjalarasaḥ || 37 ||

naktaṃ nipetuṣi tuṣāravipakṣabhāsi śūrair ivāsam asamīkaraṇapragalbhaiḥ | dyaur lohajālamalinais tarasā tamobhi- r ātastare diśi diśi stimitānubandhaiḥ || 38 ||

tuṣārasya vipakṣa uṣṇaḥ | asamaṃ nimnonnatādi sthānam_ | tasya samīkaraṇaṃ bhedābhāvāt_ | asamaś ca pṛthagjanaḥ | so 'pi śūraiḥ svarṇādidānenātmasamaḥ kriyate | yadi vā asamaṃ vilakṣaṇaṃ samīkaṃ saṅgrāmo yeṣāṃ taiḥ saha raṇe yuddhe pragalbhair iti yojyam_ | lohajālaṃ kavaco 'pi || 38 ||

deśāntarapravasanapravaṇoṣṇaraśmi- cintānubandhavaśajaihmyajuṣo nalinyāḥ | āsīn nikocabharajihmitapakṣmamāla- m āmīlitabhramaratārakam abjanetram || 39 ||

pravaṇas tatparaḥ | cintayeva jaihmyaṃ malinatā | pakṣmāṇi kesarā api || 39 ||

ālagnanaiśajalabindughanāndhakāra- jālena kajjalarucā janalocanānām | rūpāvalokanasukhaṃ prasabhād ahāri kiṃ vā śubhaṃ prabhavato malinātmanaḥ syāt || 40 ||

40 ||

ākrāntatārakanirargalajṛmbhamāṇa- tārāvatītimiraviplavadhūsarāndhāḥ | aklībiṣur bhuvanarūpanirūpaṇe 'tha saṃmīlitā iva dṛśaḥ sakalā janānām || 41 || 1. ‘tārāvalī’ kha. 2. ‘nirūpaṇeṣu’ kha.

tārāvatī niśā | timiraṃ cakṣūrogo 'pi | aklībiṣur akṣamā jātāḥ | ‘klība adhārṣṭye’ ity asyānudātteto 'pi parasmaipadaṃ cakṣiṅo 'nubandhenātmanepadānityatvasya jñāpitatvāt_ | yathā—‘saṃbhrameṇa kim akāṇḍa eva vo 'dhīratā kim iti māvasīdata | klībatā kim api saṃgare gatiḥ śreyasī hi na paratra neha ca ||’ iti | anye tv āhuḥ—“klībā ivācarann aklībiṣur iti klībaśabdāt_ ‘sarvaprātipādikebhyaḥ kvip_’ ity eke, ity ācārakvibantād atra parasmaipadam_” iti | tad asat_ | ārabhyamāṇe 'pi ‘sarvaprātipadikebhyaḥ’ ity asmin_ ‘ācāre 'vagalbhaklība—’ ityādivākyam akārasyātmanepadanibandhanārtham adantatvapratijñānāya vaktavyam eveti hi siddhāntika(ta)m_ | tasmād asmadukta eva parihāro jyāyān_ || 41 ||

chāyāṃ krameṇa sakalām atha kānanānāṃ sūryāṃśuśeṣaśabalāṃ samatāṃ nayadbhiḥ | saṃhārameghamalinair atimeduratva- m āsādya saṃpapṛcire kakubhas tamobhiḥ || 42 ||

42 ||

vyaktopakāram adhunā sthagitāsu dikṣu preyogṛhaṃ sukham alakṣitam eva yāmaḥ | dhammillabandharucirair abhisārikābhiḥ premṇā tamaś ciram itīva śirobhir ūhe || 43 ||

vyaktopakāraṃ tamaḥ śirobhir iva dhṛtam_ || 43 ||

daṃṣṭrākarālapṛthupotratalāvalagna- kāsārapaṅkakaluṣāḥ salilād udasthuḥ | grastārdhacandraśakalā bahalāndhakāra- kūṭā ivātha vanasūkarayūthanāthāḥ || 44 ||

potraṃ sūkarasya mukhāgram_ | kāsāraḥ palvalam_ || 44 ||

ābaddhapadmamukulāñjali yācito mā- m utsṛjya saṃprati gataḥ katham aṃśumālī | antarniruddhamadhupakvaṇitair itīva svapnāyate sma nalinī niśi labdhanidrā || 45 ||

svapnāyate svapnavatīvācarati | gatārthatvān matupo lopaḥ | nidrā prabodhavigamo 'pi || 45 ||

visrastakesaravibhāvitabījakoṣa- mūlaślathapraviralāntarapāṇḍupattram | kṛcchreṇa baddhamukulaṃ saralorudīrgha- nālaṃ karālam abhavaj jaraṭhāravindam || 46 ||

46 ||

śliṣyaddalāgraghaṭitakṣaṇadodabindu- viṣyandakardamitakesaradhūlijālam | gambhīrakukṣikuharakramapuñjyamāna- saugandhyabandham aravindavanaṃ nidadrau || 47 ||

47 ||

śyāmāmukhe śaśikarair dalitaṃ na tāva- d īṣatprasāritapalāśapuṭaṃ dvirephaiḥ | ity añjasā na vicakāsa na saṃcukoca paryākulaṃ kumudakānanacakravālam || 48 ||

añjasā spaṣṭam_ || 48 ||

saṃkocasaṃhṛtadalasphuṭalakṣyamāṇa- dūrāntarālanavakuṅmalacakravālam | śītāṃśupādaparimarśaghṛṇām ivāpya lakṣmīr mumoca śanakaiḥ kamalākarāṅkam || 49 ||

pādasparśena jugupsiteva lakṣmīḥ padmākarasamīpam atyākṣīt_ | manasvinī ca pādaspṛṣṭā jugupsayā svadeśam apy ujjhati || 49 ||

preṅkhatkarālaparipāṇḍupalāśapaṅkti- saṃdhānarājiśabalīkṛtapṛṣṭhabhāgam | bhāti sma dṛśyamukulānanarandhrapīta- jyotsnāvinirgamanamārgam ivāravindam || 50 ||

palāśāni pallavās teṣāṃ saṃdhāne saṃdhideśe pāṇḍavo rājayaḥ sitā lekhāḥ || 50 ||

kṛcchreṇa mīlanam avāpa viśīrṇajīrṇa parṇotkaraślathavilambitapakṣmamālam | vistāridhūsaraharicchavibījakoṣa cakraṃ purāṇakamalaṃ kamalākarāṅke || 51 || 1. ‘vistāra’ kha.

harinnīlā pariṇāmavaśāt_ || 51 ||

prātaḥ samāgamasukhānubhavaṃ vidhāya cetasy anīyata niśā rabhasena kokaiḥ | kṛcchrād viyogacakitais tu dinaṃ vyalaṅghi duḥkhe sukhaṃ bhavati sādhu sukhe na duḥkham || 52 ||

duḥkhe 'nubhūyamāne bhaviṣyad api sukhaṃ sādhu ramaṇīyam_ | na tu tathā sukhe duḥkham_ | āgāmino duḥkhasya duḥsahatvāt_ || 52 ||

abhyunmiṣadvikaṭakuṅmalapuṇḍarīka- garbhoparuddhamadhupakvaṇitānubandhaiḥ | antarmukhaskhalitaghoṣam ivendupāda- bhagnāt apaklamam aśerata paṅkajinyaḥ || 53 ||

53 ||

tāvan nirargalamudaidamalātmamūrti- kalmāṣitāmbaratalaṃ gṛhacakravālam | sūryendumaṇḍalasamudgakavāṭakoṣa- viśleṣakīrṇanavaratnakaṇānukāri || 54 ||

udait_ uditam_ | sūryācandram asāv eva samudgakasya kavāṭakoṣau | kavāṭaḥ pṛṣṭhagaṃ pidhānam_ | adhastanas tu saṃpuṭaḥ koṣaḥ || 54 ||

bhāsvanniśīthavanapuṣpakadambakena nākāmburāśijalabudbudajālakena | brahmāṇḍaśuktipuṭamauktikamaṇḍalena bhūṣāṃ niśoḍunikareṇa parām adhāsīt || 55 || 1. ‘ayāsīt_’ ka.

55 ||

nīhāragauraśiśirāṃśumarīcirāśi- nirbhinnanaiśanibirīsatamaḥprabandham | ālakṣyata sphuritatārakacakravāla- śārīkṛtaṃ vitatavibhramam antarikṣam || 56 || 2. ‘jāla’ kha. 3. itaḥ prabhṛti saptaviṃśasargasya daśādhikaśatasaṃkhyaślokaparyantaṃ ṣaṭcatvāriṃśatpatrāṇi kha-pustake truṭitāni santi.

nibirīsaṃ nibiḍam_ | ‘nerbiḍaj_virīsacau’ vitataparivartanam_ || 56 ||

lakṣmīṃ dadhanti śabalīkṛtadigvibhāga- raśmicchaṭāpaṭalabhinnatamāṃsy amandam | jyotīṃṣi rātriratimāṃsalabhāṃsy asūta ratnāni kalpataruvalīr ivollasantī || 57 ||

57 ||

niṣpiṣṭaśailavinighṛṣṭayugādighṛṣṭi- daṃṣṭrāgrakoṭiparimaṇḍalasaṃniveśam | kṣīrodaśīkarakaṇacchavi śāritābhraṃ vyabhrājatātha nabhasi grahacakravālam || 58 ||

ghṛṣṭiḥ sūkaraḥ | chavīty atraiva cchedaḥ | abhraṃ nabhaḥ || 58 ||

utsṛjya harmyaśikharāṇi nivāsayaṣṭi- koṭipratiṣṭhacaraṇair gṛhakekisārthaiḥ | uddhūtacandrakavitānavitanyamāna- cchāyāchalena vavṛṣe ghanam andhakāram || 59 ||

kekino mayūrāḥ || 59 ||

kālāguruprakarakḷptavicitrapattra- bhaṅge payodharataṭe kabarīṣu līnam | vyutthānam utpaladṛśāṃ śitiratnaśāra- bhūṣāspadeṣu timiraṃ vidadhāvivendoḥ || 60 ||

śitiratnair indranīlamaṇibhiś citriteṣv alaṃkāryadeśeṣu ca nīlatvād atighanaṃ tamaḥ śaśadharasya vyutthānaṃ nijapadān niṣkāsanām iva vyadhāt_ || 60 ||

kṣoṇīnirokajaṭhareṣu viśaṅkaṭeṣu naiśaṃ tamaḥ stimitatām abhitas tathāpat | vispaṣṭamaihiṣata palvalapaṅkamoha- mugdhā yathā mahiṣasaṃhatayo 'vagāḍhum || 61 ||

nirokajaṭharāṇi garbhābhyantarāṇi || 61 ||

saṃdhyātapacchuraṇapiṅgamarudvidhūta- vistārikesaraśikhair vanamadhyabhāgbhiḥ | suptotthitair vigalite 'hani puṇḍarīkai- r ekair ajṛmbhi rabhasād aparair nidadre || 62 ||

kesarāḥ saṭāḥ kiṃjalkāni ca | vanaṃ kānanam udakaṃ ca | puṇḍarīkair vyāghraiḥ kamalaiś ca || 62 ||

vistīrṇadantaparighasphuradaṃśurāśi- sīmantyamānatimireṣu madāmbu pātum | līnaṃ kaṭeṣu kṛtadṛṣṭivighātahṛṣṭi- dhṛṣṭaṃ śilīmukhagaṇair vanakuñjarāṇām || 63 ||

parigho mudgaraḥ | sīmantyamānaṃ dvidhā kriyamāṇam_ || 63 ||

niṣṭyūtakajjalakarālaśikhaṇḍakhaṇḍai- r utsaṅgavṛttim adhigamya niketanānām | snehānubandhibhir adīpi dināvasāna- saṃdhyārbhakair iva sarāgakaraiḥ pradīpaiḥ || 64 ||

niṣṭhyūtā nirastāḥ | śikhaṇḍāś cūlāḥ | utsaṅgaḥ pṛṣṭhamaṅgaś ca | snehas tailaṃ prītiś ca | adīpi jvalitaṃ bhrājitaṃ ca | arbhakā bālāḥ | karā raśmayo hastāś ca || 64 ||

netrair ivāñjanaparāgakaṇāvakīrṇa- tūlīvinirgamanamārganibaddharekhaiḥ | vātāyanair agurudhūpajadhūmalekhā- niryāṇaliptaśikharair vibabhur gṛhāṇi || 65 ||

tūlī śalākā | jālapradhānā gavākṣā vātāyanāni || 65 ||

nirbhidyamānam api jālagavākṣamārga- niryatpradīparucirājibhir andhakāram | sāndrībabhūva bhavanodaradahyamāna- kālāgurūtthaghanadhūmaśikhāvalībhiḥ || 66 ||

śikhiviśikhacite purāntalagne smararipucāpa ivārkaraśmicakre | asurakulam ivātha cakranāmnāṃ hṛdayam adahyata viprayogadīnam || 67 ||

śikhiviśi vahnipraveśini | khacite dīpte | śikhipradhānena ca viśikhena cite vyāpte | purānto nagaraparyanta stripuranāśaś ca | viprayogo viśiṣṭā śaraprayuktir api || 67 ||

prathamam adhidharitri cchinnaniḥśeṣamūlaṃ tad anu śikhariśṛṅgavyaṅgyarāgānubandham | plutam atha ghanavīthyāṃ ratnarāśiṃ vivakṣu- s taraṇir apacitaśrīr ātapaṃ saṃjahāra || 68 ||

śṛṅgair vyaṅgyaḥ prakāśanīyaḥ plutaṃ javena racitollaṅghanam_ | ghanavīthī nabhaḥ | yo 'py apacitadhanaḥ sa plavaṃ vidhāya jalaṃ praviśan nātmānam udvegena saṃharati || 68 ||

iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye divasāvasānavarṇano nāmaikonaviṃśaḥ sargaḥ |

iti rājānakajayānakasūnor alakasya kṛtā harāvajayaviṣamapadoddyota ekonaviṃśaḥ sargaḥ ||