||śrī gaṇeśāya namaḥ||

oṁ uttasthuṣyatha divasārdhaśaṅkhaśabde rāmābhis tadanusarās savibhramābhiḥ| uccetuṃ tarukusumāni mandarādrer nirjagmur muditadhiyaḥ kṛtānuyātrāḥ||1|| taṃ nānāphalarasapānasaṅgamatavyāvalgatkapika¯luptamātuluṅgam_| kalpāntotthitapavanābhighāātasākṣivyāvṛttivyatikaracaṇḍagaṇḍaśailam_||2|| prabhrāmyat surapuradīrghikodagāhavyāsaktadvipakaraśīkarokṣitārkam_| kuñjāntaḫ phalitamṛgendranādalīlāvitrasyaccamaracamūracakravālam_||3|| udvellattaṭakaladhautakalpavallīstomāptastimitataḍidvilāsamegham_| sambhuktatridaśavadhūviśīrṇabhūṣāratnāṃśucchuritagurugṛhāgrabhittim_||4|| sthūlāśmapratiphaladacchanirjharāmbhonirdhūtatridaśavadhūratāntakhedam_| prabhrāmyadravirathavājivaktraniryatphenaughastabakitaratnasānukuñjam_||5|| svacchāmbhaẖ kaṭakasarastaṭāntakūjatkādamba|dalitamṛṇālakāṇḍagaṇḍam_| dāvāgnivyatikaradahyamānabhūripratyagrāgurum avalokya remire te||6||

pañcabhiẖ kulakam_||

lāvaṇyaglapitaśaranniśākarāṇi śyāmānām iva paripaśyatāṃ mukhāni| tac citraṃ sugatatayā yad anvitānāṃ pādānām aviralarāgatāvirāsīt_||7|| bibhrāṇā vipulakabandhatāṃ jayantyor niśśeṣaṃ bhuvanamudīrṇakambunādāḥ| pratyagrojjvalakaravālikāstaruṇyastanvānā ruciratarāṅgadopaśobhām_||8|| aṅgānām asamaratāntatābhirāmāṃ bibhratyaś śriyam asiropaghātabhājām_| bhūyasyovanamanu nāyakānuyātāstās senā iva kusumāyudhasya celuḥ||9||

yugalakam_||

yāntīnāṃ vijitavinidrapaṅkajānāṃ pādānāṃ kumudavanāni sammadena| mañjīrakvaṇitavimṛṣyamāṇahaṃsavyājenānugamam iva vyadhur vadhūnām_||10|| kāntānāṃ kucakalaśair yathāyathohe tuṅgatvaṃ vyavadadhadānanendulakṣmīm_| tām udvekṣitum iva tais tathās tathāptair vistāraṃ kṣitim avatastare nitambaiḥ||11|| visraste tridaśapurandhriruttarīye paśyantī dayitanakhakṣataṃ stanāgre| caskhālānavahitacittavṛtti yāntī premāho kvacid api nekṣate vyapāyam_||12|| ālokya priyatamacumbicakrvākīcakraṅkasphuradarabindavṛndamambhaḥ| autsukyāt kila jaghanālasāḫ priyāṇāṃ kaṇṭhānta praṇihitadorlataṃ yayus tāḥ||13|| nyasyantī sapadi padāni tatpadeṣu svedāmbhaẖ kaṇakakarālitāni paścāt_| saṃcele dayitatamasya vartmanaikā premāho vividhavidhiprapañcadakṣam_||14|| kasyāścil lalitagatāgateṣu yāntyāḥ saṃsaktaṃ bhujalatayā vighaṭyamānaḥ| cakrandāsulabhanitambapātaśaṅkāsammohād iva maṇimekhalākalāpaḥ||15|| mā smaiṣāṃ pathi paruṣe kadarthanā bhūtpādānām iti dayayeva komalānām_| svacchāyākisalayasaṃstaraḫ purastādātene ruṇimaṇinūpurair vadhūnām_||16|| klāmyantyāḫ pratipathamāśu vījitāyā sakhyārānnavaśikhipicchanālagauraḥ| kasyāścid vimalakapolabimbitaśrīruttaṃsastabakapade prakīrṇako bhūt_||17|| anyasyā dayitakarāvalambapāṇes tatsparśāhitapulakānubandhabhājaḥ| gacchantyāḫ pathi vicakāsa vaktraśobhā nīvī ca ślathitanitambabimbavāsāḥ||18|| sarpantyāẖ kisalayapāṇinā muhūrtaṃ śliṣyantī tarugahane bhiveṣṭya dūrāt_| śyāmāyās tanumamimīta madhyabhāgaṃ kasyāścit prakaṭakutūhaleva vallī||19|| gacchanty astanukhagajālapādamudrānyāsānām udadhipurandhrisaikatānām_| sundaryaḥ sarasanakhākṣatāvacūlais tulyatvaṃ vikaṭakaṭīrakaiś śaśaṃsuḥ||20|| uttānasthitivikarālanīlajaṅghavyākośāṅgulikhagapādanirviśeṣam_| saṃsthānaṃ tanutaranālapattram agre nārībhiḫ prathatipatham aikṣyataurudhūkam_||21|| tāś śobhādhigataparasparopamānaṃ śrotrākṣistanakarapādam udvahantyaḥ| sadvartmasthitim api pakṣmapaṅktimūhuryajjihmāṃ tadavamatām iva prapede||22|| āhlādaṃ śiśiratarāvamarśahṛdyāḥ kurvatyo dhikam apariplavaprakāśāḥ| aurvaryaḥ sphurad anaghāvalambibimbā bimbauṣṭhyo bibabhur apūrvavidyutas tāḥ||23|| paryāptasvarapadatālasacchriyoccair gandharvasthitiratha yauvanena tene| ākṣiptapriyatamacetasā tadānīṃ puṣpeṣu sphuṭamavatāvadhāvayogam_||24|| ābhāsvatkiraṇakarālaratnahārapratyagrāṃ dadhadalakāspadām abhikhyām_| vaidagdhī yuvatijano tha puṣpakāñcīcchāyāvāndraviṇapater ivālalambe||25|| tuṅgatvaṃ kucayugaleṣv athāṅganānāṃ vistāraṃ vikaṭakaṭīrakasthalīṣu| madhyeṣu kraśimadaśāṃ saśaṃsa loko bhāveṣu sthitirucitā janasya śaṃsyā||26|| prāptānām abalatayāpi nissahatvaṃ bhraṣṭānāṃ na tu balibhāvalagnatāyāḥ| uttuṅgaiẖ kucakalaśair abhāri tāsāṃ sadvṛttair api caturaśratāśrayā śrīḥ||27|| vispaṣṭadraḍhimaguṇābhirāmarūpais sastra|tsthānasthitibhir anūnalakṣaṇāḍhyaiḥ| rāmāṇāṃ karaṇagaṇair ivāṅgahānājahnuś śriyam atha mauktikair na hārāḥ||28|| śṛṅgārasthitiramaṇīyanarmagarbhavyāpārātanurasanāya¯¯¯| rambhorūr atha caturaṃkalāñchitaśrīḥ pratyagrāmatanuta nāṭikeva śobhām_||29|| bibhratyā samakaraketanaśriyoccaiḫ pratyagrāmadharadalapravālavallīm_ mārgasthaṃ hariṇadṛśā janaṃ harantyā lāvaṇyaṃ jalanidhivelayeva bheje|30|| saṃspṛṣṭaś caraṇatalena pakṣmalākṣyā smasaktais stabakaśatair aśokavṛkṣaḥ| kṣepaṃ yaḫ pathi vikasallatākulo bhūnmārgasthaẖ ka iva na bhājanaṃ vibhūteḥ||31|| nanvasmin nutaguruṇā samaṃ nikuñje viśramya vyapanaya tāvad adhvakhedam_| ityārādakṛta navāṃśukāñcalāgravyāsaktā vratatir ivārthanāṃ ramaṇyāḥ||32|| anyasyā guru jaghanaṃ babhāra paścād ayāntyās sphuṭam adhikaṃ sagauravatvam_| paśyantyāṃ pratiyuvatau sarāgam enāṃ yatkāntaḥ ciram anupālayāṃ cakāra||33|| anvīye madhukaramaṇḍalena tāvat saṃsarpann upavanamārutaḥ sugandhiḥ| yāvat strīparimalagocaro na lebhe ko nādyaṃ tyajati padaṃ viśeṣalābhāt_||34|| prastāve navamadhumāsanāṭakasya sthitvāntargahanalatātiraskariṇyāḥ| prārabdhā parabhṛtanartakena kūjā stryaiṇasya śrutimaharatpracodaneva||35|| bibhrāṇaṃ vasanam ivāntarāpi cūta sāmodasthiti karṇikābhirāmam_| gāṇikyaṃ savikaṭahāratāṃ dadhat tatkṣmābhartustaṭamanu kānanaṃ ca reje||36|| nirvāṇasthitim aparavartitailam uccair avyāptaṃ na mṛdumarudvidhūyamānam_ taṃ prātas tanam iva dīpakāvalokya stryaiṇena dviguṇaratābhilāṣatāpe||37|| bibhrāṇaẖ kanakamayaṃ nu bījakośavyājenātanucaṣaka kuśeṣayinyā| utkṣiptastaraladalāṅgulir vyaloki śyāmābhiẖ kara iva bhāskarasya padmaḥ||38|| gacchantaḥ pathi ghaṭitā nikuñjadeśe viśrāntāẖ kvacana parasparaṃ yuvānaḥ| sauhārdaṃ vidadhur ayantraṇa kriyāṇaṃ visrambhaḥ suhṛdi phalaṃ nanu pradhānam||39|| vāmabhrūmukhamadirāsugandhisekavyāsaṅgasphuṭabakuladrumaprasūnam_| bhṛṅgālīcaraṇavidhūtapakṣmamālāparyastastabaka|parāgapāribhadram_||40|| udgacchannavalavalīlavaṅgapuṣpapratyagrātanutarasaurabhābhirāmam_| dikcakrasphuradanubandhigandhaphullanmandārastabakamadhuprasaṅgibhṛṅgam_||41|| sacchayaṃ vipinam anupraviśya pārśvavyāsaktapriyakaralagnapāṇipadmaḥ| praścyotannavamakarandapānalīlāvisrambhātiśayasukhopalabdhanidraiḥ||42|| aikṣiṣṭa bhramarakulaiẖ kṛtaṃ kurutvaṃ vallīināṃ yuvatijanas tadā natānām_| kasyārthī na bhavati gauravāya lokas saṃpannābhimataphalas samāśrito vā||43||

cakkalakam_||

ābaddhakramaharikampyamānasālā sā rāmābhigamasamākulā tadānīm_| laṅkeva sphuṭaśukasāraṇā vanorvī babhrāje ghanarucirākṣasānuviddhā||44|| ākarṣanmadhurasaśīkarānvanebhyaś śephālīkusumakaṣāyagandhagarbhaḥ| ānandaṃ marudatanottanudarīṇāṃ kaś śreyānadhikaguṇatvam āpya na syāt_||45|| eko pi prasavaśaras sa kena sahyo nānātmā kimu gaṇanātigocaro yaḥ| tadbhinne hṛdi caritārtha eva kāmo māninyā na punar abhūd adhijyatāpaḥ||46|| vāsantyaḥ kusumabhṛtaś ca kundavallyo graiṣmyaś ca pratigiri pāṭalāḫ praphultāḥ| anyonyaṃ yuvatijanasya mānabhaṅgaprāgalbhyaṃ vyatijahasustarām ivārāt_||47|| rāmāṇāṃ navanavamallikāvilāsapratyagraprasavatiraskṛtaṃ tadānīm_| prārambhe pariṇatimāpa mānadhairyaṃ sugrīṣme mukulam ivātha kundapuṣpam_||48|| pratyagrāṅkuraracitaśriyaṃ vanālī bibhrāṇā viṭapitatiṃ sapattrinādām_| abhyarṇā śarad iva nimnagātaṭorvīmānandaṃ vyatanuta mattakāsinīnām_||49|| utsṛjya pravikacacūtayaṣṭim uccais tṛṣṇāndhā api paribabhramur dvirephāḥ| kāntāsye śvasitasugandhini prakarṣānnaivārtā laghuni pade bhavanti dīrāḥ||50|| saṃsthānaṃ dadhad upari cchadatrayasya tretāgnisthitisadṛśaṃ nitambinībhiḥ| nṛtyantyāḫ pavanavaśāl latāṅganāyāḥ kāṅgūlaḥ kara iva pallavo vyaloki||51|| bibhrāṇair adhikaguṇatvam aṅganānāṃ hastāgraiḫ prasabhamakāri pallavānām_| pratyagrojjvalanijaśobhayā sarāgair bhagnānām api punar ukta eva bhaṅgaḥ||52|| mūlasthapriyanakhamaṇḍanasya bāhor utkṣepātpratiyuvatiṃ vidūnayantyāḥ| āditsordrumaviṭapāgravartipuṣpaṃ puṣpatve py abhṛtaphalatvam eva bhīroḥ||53|| śliṣyantyā viṭapaśriyāśrayaprasūnavyāditsāsarabhasacetasas taruṇyāḥ| aprāptaprasavaphalodayo pi śākhī sampattiṃ phalabharaśālinīm avāpa||54|| śākhāgrasthiti kusumaṃ taror jighṛkṣuryatpīnastanavinatā śaśāka nāptum_| tatrāsīd rataguruṇā vilūya datte pratyakṣa pratiyuvates samunnatā strī||55|| bibhrāṇai rasabharaśālitām abhīkṣṇaṃ rāgaśrīsamudayaśobhibhis tadānīm_| divyastrīkarajaparikṣatais tarūṇāṃ tāruṇyaṃ saphalam abhāri pallavaughaiḥ||56|| bhagnānām agaṇitatadvipattidoṣair vallīnāṃ madhu kusumeṣv apāyi bhṛṅgaiḥ| yuktānāṃ taralatayā malīmasānāṃ na svārthāt kvacid atiricyate nubodhaḥ||57|| kurvāṇā pṛthuni vadhūr nitambabimbe| visrastaṃ vasanamanās tadunnivītam| vispaṣṭām anurahasaṃ priyasya nānyāṃ na vyāñjīnnidhuvanalālasāṃ sphurantīm_||58|| bhrūkṣepānugatanikuñjadattadṛṣṭer ākūtaṃ sapadi niśemuṣī priyasya| tadvartmanyaviśata kācid iṅgitajñā no kārye kvacana bhavanti dīrghasūtrāḥ||59|| niśśvāsair aviralasaurabhair vikṛṣṭaḥ śyāmāyāẖ karakamalena sambhramantyāḥ| babhrāmābhimukhamopākṛto pi bhṛṅgaḥ paryāptaṃ na khalu malīmasasya dārṣṭyam_||60|| kāntānāṃ karakamalairanaukahānāṃ lupteṣu prasabham upetya pallaveṣu| dhūtānām upavanavāhibhis samīraiẖ kiṃ citraṃ yad anumanaskatāvirāsīt_||61|| vyāviddhā madhukarapaṅktidhūmyayārādābhāsīd adhikam aśokapādapasya||6 pluṣyantī sapadi manāṃsi māninīnāmātāmracchavir abhiluṅkhiteva vallī||62|| nīlābjaṃ śravaṇavataṃsatāṃ taruṇyā yadbhartā vikacamanīyatānataṃ sat_| ātmānaṃ vimalakapoladarpaṇasthaṃ tacchobhātiśayaparītam aikṣateva||63|| na śreyān samam adhikaśriyā virodho yuktātra praṇatir itīva pīvarorvāḥ| uttaṃsotpalam ava|namya dūram akṣṇaḥ prāstāvītstavam iva cañcarīkaśabdaiḥ||64|| ātāmrāsitadhavalaiḫ prasūnavṛkṣais stheyobhiẖ kṛtavasatisthites tadānīm_| vyātasthe smaraṇabhuvo vanasthalīṣu sthūlabhaiś ciram avisaṃsthulaiḥ sphulaśrīḥ||65|| paryaśrusrutiparipāṭalatvam akṣṇoẖ kurvāṇaṃ manasi manorama vyalīkam_ māninyo raja iva cakṣuṣi praviṣṭaṃ saṃrambhasphurad adharā na paryamṛṣyan_||66|| kurvāṇām adhitaru svagrahe pi puṣpe hastāgraṃ sapadi yuvā svayaṃ praditsuḥ| rambhorūmarudhadanekayuktibhedaiḥ premāho racayitum īhate nukūlam_||67|| naikatra śravasi tathā sahematānvītḍaṅke py akṛta vadhūḥ prasādhitāsthām_| anyatra priyakarakṛṣṭalambapālīvinyastacchadasubhage yathābhyamitram_||68|| anyasyās surabhimukhānilāvakṛṣṭā vaktrendoḫ pṛthupariveśacakrabandham_| bhṛṅgāṇāṃ tatirakarotpatattravātavyādhūtastabakavataṃsadhūlijālaiḥ||69|| unnidracchadam upadhauta puṣpamārādānītaṃ dayitatamena menakāśrīḥ| bibbokāñcitavinihañcitottamāṅgā vāmorūrabhimukhamagrahītsapatnyāḥ||70|| vyatyāsād dayitatamena kāpi nāmnaḥ prattāyām api sumanasyamarṣahetoḥ| saṃrambhasphuradadharāruṇekṣaṇaśrī taccittraṃ yadasumanaskatāṃ prapede||71|| viśrāmyatkucayugalorasi priyasya smerānyā mṛducaraṇāgradurviniṣṭā| ādāya skhalanapadaṃ viloladṛṣṭiḥ kaṇṭhānta praṇihitabāhukandalīkā||72|| saṃrambhonnamitanitāntatāntamadhyā bhūyo pi sthitim adhijagmuṣī kathañcit_| āmodāpahṛtamadhuvratāṃ natabhrūrattaṃsaṃ śirasi babandha bandhuraśrīḥ||73|| kasyāścid dayitakarābjayojitena śrotrāgre taruṇatamālapallavena| dhūmenāviratam ivābhihanyamānaṃ bāṣpāmbhaḫ pratiyuvater mumoca cakṣuḥ||74|| nīrandhravratatitirohite parasyā sāśaṅkaṃ dayitatame babhūva cetaḥ| adhyāste hṛdayamakṛtrimapriyāṇāṃ kāntānām atibahumatsaro hyanaṅgaḥ||75|| sambādhād virahitavallabhā tadānīṃ gāyantī raṇaraṇakāntapañcamaikā| nirlakṣaṃ kusumaparigrahāya subhrūs sandeśaṃ suciram abibhramatkarāgram_||76|| spaṣṭākṣi¯vavikṛtiprapañcaśobhī śrṅgārākṛtipiśuno vipakṣavāmaḥ| sagrīvānirupamarecako jajṛmbhe rambhorvā dayitavilokanena hāvaḥ||77|| rāmāṇāṃ drumaviṭapāgrajanmapuṣpavyāditsnārabhasavaśātsavepathubhyaḥ| hāraughaiḫ pravigalitaṃ payodharebhyo nodvṛttais saha guṇināṃ cirāya yogaḥ||78|| nepathye masṛṇamanorame kṛtāsthā śṛṅgārārghitarasaśālitāṃ vahantī| kāntasya pramadamudāranṛttalīlā rambhorūratanuta kaiśikīva vṛttiḥ||79|| samphullannavanavapuṣpaśekharāṅke niśśaṅkaṃ madhu papuṣībhir antarāle| kāntānāṃ citarasasañcitena ceto rāmābhir madakilakiñcitena jahre||80|| bibhrāṇā sukhatāṃ manoramaśrīr yāntīnāṃ vanabhuvi mattakāminīnām_| māyūrī kalavirutis svarāśrayatvaṃ saṃprāptā vyatanuta mārjanīva śobhām_||81|| prāptāyā rahasi manoramena yogaṃ rāmāyāḫ pramadabharotthamīkṣaṇāmbhaḥ| pattrālīm sapadi dudhāva gaṇḍabhittāvaśreyo jagati bhavej jaḍānna keṣām_||82|| akṣuṇṇā bata śatam anyutā taveyaṃ sāścaryā subhaga vinirmame vidhātrā| niśśaṅkaṃ vidadhata eva gotrabhedaṃ vajraste nivasati vāci yan na pāṇau||83|| ity ārādabhidadhuṣīṃ punas sapatnīnām naivāvanataśirā yuvānubadhnan_| bāṣpāmbhaḥplutanayanāṃ vijṛmbhitāntaḥ santāpām api yuvatiṃ vyadhātsahāsām_||84||

yugalakam_||

vīkṣyārādvanabhuvi dhūtaśākhivallīṃ valgantīṃ kusumapṛṣatkahastabhallīm_ nirmānā yuvatir abhūd rate vidheyā nautsukyaṃ vrajati hi ramyadarśanātkaḥ||85|| uttuṅgadrumakusumagrahābhilāṣāduttānīkṛtavadanaśriyo vataṃsaḥ| sasraṃse yuvatijanasya karṇamūlād ārūḍho vinipatatīti nātra citram_||86|| kāntāyāḥ kusumarajo vilocanasthaṃ yatpreyān vadanasamīraṇair nirasthat_| tenaiva pratiyuvates samīpabhājaẖ kāluṣyaṃ yugalam anāyi dūram akṣṇoḥ||87|| utkṣiptā kusumajighṛkṣayā tadānīṃ tanvaṅgyās sadupalapattramaṇḍanaśrīḥ| akrāmyadbhujalatikātisaukumāryātsadvṛttair api khalu khedam eti kaścit_||88|| vibhrāṇe sphuṭataraśuṣkavarṇageyasthānīye nirupamavaktrapāṇiśobhām_| vicchittiṃ vapuṣi vilokya vallabhāyāḫ prāṇeśo vipulavilocanotsavo bhūt_||89|| ābadhya srajam abhidhāviparyayeṇa śyāmāyā dadhati ca vai manasyabhājaḥ| vailakṣyāgamaparipāṇḍurānano nye nispandasthitir akaroj jharaṅkaśaṅkām_||90|| sāgaske suhṛdi savepathutvam āpa svedāmbhaḥplutapulakāṅkurotkarāsīt_| ādhātuṃ sutanur iyeṣa cāvahitthaṃ premāho yuvatiṣu maugdhyadurvidagdham_||91|| utsṛjya sphuṭaravarṇaśobhamārānnirgandhaṃ yuvatijano tha karṇikāram_| āditsus surabhitayā lavaṅgam abhyaid ākārād api guṇa eti vallabhatvam_||92|| bhrāmyadbhir ghanamakarandaśīdhupānavyāsaṅgapramuditamānasais tadānīm_| saṃrambhād aliyuvatir vitanyamāno na strībhir na navalabhotsavaś śaśaṃse||93|| saugandhyād aviralakāntisaukumāryāt tadvaktrair atha vijitas sarojaṣaṇḍaḥ| bhṛṅgaughaiḥ kva dipi nādhyavatsatārādvañcyante na khalu parair viśeṣaniṣṭhāḥ||94|| bibhratyaḫ prakṛtimanoramākṛtitvaṃ tā mālyagrathanavikalpaśilpadakṣaḥ| prāṇeśānatha saviśeṣam eva jahrus sadhīyo harati guṇāntareṇa guṇyaḥ||95|| ślakṣṇatvaṃ viralavilepanaśriyās tā bibhratyo ruciratarāṅgavartanābhiḥ| sadrūpās salalitanāṭyacitrabhittīrālokyābhimatajanaḥ pupoṣa toṣam_||96|| gacchanti prakṛtimanoramāẖ kadācit kālena sphuṭamasatā guṇena yogam_| niśśvāsaśvasanaparamparābhirāsāṃ saugandhyaṃ yaducitamāpi karṇikāraiḥ||97|| preyasyā nibiḍanitambabimbaśobhāmāditsuẖ kusumamayīṃ vidhāya kāñcīm_| yāmārātsarasamanā yuvopaninye saṃsargāt pratiyuvateẖ kṛtāparādhaḥ||98|| prāptas tatsmaraṇasaroṣapāṭalākṣyā sasmerānalananalinas tayā babandhe| prāyeṇa hy ananuguṇe vidhāv upaiti dhyātor thaḥ pariṇatimanyathaiva puṃsām_||99|| niśśvāsāvadhutapayodharā vihāravyāpārādvanabhuvi mamluṣe tadānīm_| svedāmbhaẖkaṇanikaraṃ mumoca subhrūś śehālī pavanahateva puṣpavarṣam_||100|| pramlānāñcitapuṭatāmarālakeśyā bibhrāṇā nipatitatārakābhirāmā| anyasyā vipinavihāravibhrameṇa śrāntāyā dayitatamaṃ jahāra dṛṣṭiḥ||101|| bhrāntāyā giritaṭakānane mṛgākṣyāḥ prekṣyatvaṃ dayitatamasya jagbhivāṃsaḥ| svidyantyā babhur avalagnabinducitrāḥ prottuṅgastanataṭavartino nakhāṅkāḥ||102|| prāptāyāẖ kisalayapāṇinopakaṇṭhaṃ kasyāścit kusumarajobhirāsajadbhiḥ| ālīva drutamalikhallatā kapole nirdhautā śramasalilena pattravallīm_||103|| sarvartugrathitamanoramaśriyo drāvunnidrastabakabhṛto yathāviśeṣam_| bhṛṅgebhyo bhṛśataramasvadanta vallyo bhāvānāṃ bhavati kutaḫ prakarṣaniṣṭhā||104|| ākṛṣyāṃśukamamalaṃ navoḍhavadhvās taddṛṣṭiprakaṭakutūhalasya bhartuḥ| vispaṣṭaṃ vratatiradarśayanmukhenduṃ bhavyānāṃ bhavati yatas tatorthasiddhiḥ||105|| pātratvaṃ manasijalāsakasya yātā nartitvā kusumavihāranāṭakānte| viṣkambhasthitiviṣadapraveśamārgānnirjamuẖ kamaladṛśo tha kānanāṅkāt_||106|| sṛṣṭehāmṛgaḍvimavīthikaṃ sadaṅkavyāyodaṃ tadanu vihṛtya nissahāṅgyaḥ| atyākṣuḥ sphuṭadaśarūpakavyavasthaṃ mantādrer maṇitaṭakānanaṃ ramaṇyaḥ||107|| bibhrāṇaṃ diśi diśi rāsakaṅkalīlāṃ nānānvānugataviśālatālaśobhām_| sundaryaẖ katham api tadvanaṃ jahustā ramyās syuẖ ka iva hi sutyajāḫ padārthāḥ||108|| preyobhis samam avagāhya kānanorvīr dehārdhasthitir iva śūliśailaputryāḥ| rāmābhir na rucirasaikatābhirāmā nāloki tridaśataraṅgiṇī vidūrāt||1071|| kūjantīṃ madhukaramaṇḍalīṃ purastād ālokya stabakitakovidāralīnṣām_| prauḍhatvād dayitatamena kāpi sārdhaṃ prastāvaṃ vyatanuta kovidā ralīnām_ 110 bhāti sma vallabhakaragrathitaṃ nitamba- bimbāvalambi raśanāguṇadāma pauṣpam_ cārubhruvaḥ praśurasaurabhalobhalīna- śiñjānahārimadhupāvalikiṅkiṇīkam_||111|| uttaṃsabhāgakucabandhurakandharāgra- kāñcīguṇāspadavicittravinidrapuṣpāḥ| rejuḥ kuśeśayadṛśaḥ kusumāyudhasya sugrīṣmakeṇa racitā iva hetiśālāḥ||112|| atha vipinavihāraklāntijanmānanendu- grahaguṇaparivārasvedabindūdgamānām_| śriyam iva parimāṣṭuṃ śvāsasaugandhyalubhyan madhukarakulapakṣair vījyamānāḥ salīlam_||113|| kallolānilaloladolanalalaccāmīkarāmbhoruhāṃ ratnakṣodaparāgasaikatabhuvaṃ maṅktuṃ surasyandinīm_| preyobhis samamucchvasatkucabharaklāmyannitambasthalī- līlāmantharacārucāruracaraṇanyāsā natāṅgyo yayuḥ||114||

yugalakam_||

iti śrīrājānakaratnaviracite haravijaye mahākāvye kusumācayavarṇano nāma saptadaśas sargaḥ||