saptadaśaḥ sargaḥ |

uttasthuṣy atha divasārdhaśaṅkhaśabde rāmābhis tadanucarāḥ savibhramābhiḥ | uccetuṃ tarukusumāni mandarādrer nirjagmur muditadhiyaḥ kṛtānuyātrāḥ || 1 ||

tasyānucarā gaṇāḥ | rāmābhiḥ kṛtānuyātrā aṅganābhir anugatāḥ || 1 ||

taṃ nānāphalarasapānasaṅgamattavyāvalgatkapikaraluptamātuluṅgam | kalpāntotthitapavanābhighātasākṣivyāvṛttivyatikararatnagaṇḍaśailam || 2 ||

tam ityādi pañcabhiḥ kulakam_ | pavanābhighātasākṣiṇaḥ sthairyāt parivṛttimātrayogino gaṇḍaśailā yatra || 2 ||

prabhrāmyatsurapuradīrghikodagāhavyāsaktadvipakaraśīkarokṣitārkam | kuñjāntaḥ phaitamṛgendranādalīlāvitrasyaccamaracamūracakravālam || 3 ||

udagāho jalāvagāhanam_ | ‘manthaudana—’ ityādinodabhāvaḥ | camūrā mṛgaviśeṣāḥ | phalitaḥ pratibimbitaḥ | saprati...rkaḥ || 3 ||

udvellattaṭakaladhautakalpavalīsaṃtānastimitataḍidvilāsamegham | saṃbhuktatridaśavadhūviśīrṇabhūṣāratnāṃśucchuritaguhāgṛhāgrabhittim || 4 ||

kalpalatā eva saṃtatās taḍitas tadvilāsasya megham_ | saṃbhuktāḥ kṛtasuratāḥ | gatyarthādisūtreṇa ktaḥ kartari cakārāt_ || 4 ||

sthūlāśmapratiphaladacchanirjharāmbhonirdhūtatridaśavadhūratāntakhedam | prabhrāmyadravirathavājivaktraniryatphenaughastabakitaratnasānukuñjam || 5 ||

5 ||

svacchāmbhaḥkaṭakasarastaṭāntakūjatkādambīdalitamṛṇālakāṇḍakhaṇḍam | dāvāgnivyatikaradahyamānabhūripratyagrāgurum avalokya remire te || 6 ||

kādambyaḥ kalahaṃsyaḥ || 6 ||

(pañcabhiḥ kulakam_)

lāvaṇyaglapitaśaranniśākarāṇi śyāmānām iva paripaśyatāṃ mukhāni | tac citraṃ sugatatayā yad anvitānāṃ pādānām aviralarāgatāvirāsīt || 7 ||

śyāmāḥ striyaḥ | sugatatā sadgāmitvaṃ buddhatā ca | rāgo lauhityam abhiṣvaṅgaś ca || 7 ||

bibhrāṇā vipulakabandhatāṃ jayantyo niḥśeṣaṃ bhuvanam udīrṇakambunādāḥ | pratyagrojjvalakaravālikās taruṇyas tanvānā ruciratarāṅgadopaśobhām || 8 ||

vicitraḥ pulakasya romodgamasya bandho yasyety anyapadārthamātre bahuvrīhiḥ | vipulāś ca kabandhāś chinnaśiraso narā yatra tadbhāvaṃ dadhatyaḥ | kambavo valayāḥ śaṅkhāś ca | karavālikāh pāṇiṣv aṅgulīyakāḥ churikāś ca | ruciratarair aṅgadaiḥ keyūraiḥ, ruciratarāṃ ca gadānām āyudhabhedānām upaśobhāṃ tanvānāḥ || 8 ||

aṅgānām asamaratāntatābhirāmāṃ bibhratyaḥ śriyam asiropaghātabhājām | bhūyasyovanam anu nāyakānuyātās tāḥ senā iva kusumāyudhasya celuḥ || 9 ||

aṅgāni gātrāṇi hastyādayaś ca | asamaḥ prakarṣayukto ratānto yasya tadbhāvena hṛdyām_ | na samare tāntaḥ khinnas tadbhāvena ramyāṃ ca | sirāḥ snāyavas tatkṛta upaghātaḥ sarvato vyādhis tadbhājām_, na | asayaḥ khaḍgā ropāḥ śarās tatprahārabhājāṃ ca | vanaṃ kānanam_, avanaṃ ca rakṣaṇam anu lakṣyīkṛtya | nāyakāḥ kāminaḥ senādhipatayaś ca || 9 ||

(yugalakam_)

yāntīnāṃ vijitavinidrapaṅkajānāṃ pādānāṃ kumudavanāni saṃmadena | mañjīrakvaṇitavikṛṣyamāṇahaṃsavyājenānugamam iva vyadhur vadhūnām || 10 ||

10 ||

kāntānāṃ kucakalaśair yathāyathohe tuṅgatvaṃ vyavadadhadānanendulakṣmīm | tām udvīkṣitum iva tais tathā tathāptair vistāraṃ kṣitir avatastare nitambaiḥ || 11 ||

yathāyathā kucakalaśair etā nitambaṃ mā drākṣur iti mukhaśobhām ācchādayattuṅgatvamūḍhaṃ tathātathā tām evāvalokayitum iva vistāraṃ gatair jaghanair bhūbhir avatastare 'vacchāditā || 11 ||

visraste tridaśapuraṃdhrir uttarīye paśyantī dayitanakhakṣataṃ stanāgre | caskhālānavahitacittavṛtti yāntī premāho kvacid api nekṣate vyapāyam || 12 ||

vyapāyo doṣaḥ || 12 ||

ālokya priyatamacumbicakravākīcakraṅkasphuradaravindavṛndam ambhaḥ | autsukyāt kila jaghanālasāḥ priyāṇāṃ kaṇṭhāntaḥpraṇihitadorlataṃ yayus tāḥ 13

kilety alīke | jaghanālasyavyājenetyarthaḥ | praṇihitā nikṣiptā || 13 ||

nyasyantī sapadi padāni tatpadeṣu svedāmbhaḥkaṇakakarālitāni paścāt | saṃcele dayitatamasya vartmanaikā premāho vividhavidhiprapañcadakṣam || 14 ||

14 ||

kasyāścil lalitagatāgataiḥ prayāntyāḥ saṃsaktaṃ bhujalatayā vighaṭyamānaḥ | cakrandāsulabhanitambapātaśaṅkāsaṃmohād iva maṇimekhalākalāpaḥ || 15 || 1. ‘gatāgateṣu yāntyāḥ’ ka.

saṃsaktam ajasram_ || 15 ||

mā smaiṣāṃ pathi paruṣe kadarthanā bhūt pādānām iti dayayeva komalānām | svacchāyākisalayasaṃstaraḥ purastādātene 'ruṇamaṇinūpurair vadhūnām || 16 ||

16 ||

klāmyantyāḥ pratipatham āśu vījitāyāḥ sakhyārān navaśikhipicchanālagauraḥ | kasyāścid vimalakapolabimbitaśrīr uttaṃsastabakapade prakīrṇako 'bhūt || 17 ||

uttaṃsaḥ karṇapūro 'tra || 17 ||

anyasyā dayitakarāvalambipāṇes tatsparśāhitapulakānubandhabhājaiḥ | gacchantyāḥ pathi vicakāsa vaktraśobhā nīvī ca ślathitanitambabimbavāsāḥ 18

18 ||

sarpantyāḥ kisalayapāṇinā muhūrtaṃ śliṣyantī tarugahane 'bhiveṣṭya dūrāt | śyāmāyās tanum abhimīta madhyabhāgaṃ kasyāścit prakaṭakutūhaleva vallī || 19 ||

19 ||

gacchantyas tanukhagajālapādamudrānyāsānām udadhipuraṃdhrisaikatānām | sundaryaḥ sarasanakhakṣatāvacūlais tulyatvaṃ vikaṭakaṭīrakaiḥ śaśaṃsuḥ || 20 ||

nadītaṭānāṃ sāmyaṃ kaṭībhiḥ pratyapādayat_ || 20 ||

uttānasthitivikarālakālajaṅghavyākośāṅgulikhagapādanirviśeṣam | saṃsthānaṃ tanutaranālapattram agre nārībhiḥ pratipatham aikṣyataurubūkam || 21 || 1. ‘nīlajaṅgha’ kha.

uttānasthityā bhīṣaṇaḥ śyāmajaṅgho vikasitāṅguliś ca yaḥ khagas tasya sāmarthyākālajaṅghākhyasya pakṣiṇaḥ pādas tat sadṛśam_ | tanutare nālapattre yasya | pattrasya prasṛtāṅguliś caraṇa upamānam_ | tasya tadākāratvāt_ | vṛntasya tu jaṅghā | aurubūkam eraṇḍasaṃbandhi || 21 ||

tāḥ śobhādhigataparasparopamānaṃ śrotrākṣistanakarapādam udvahantyaḥ | sadvartmasthitim api pakṣmapaṅktim ūhur yaj jihmāṃ tad avamatām iva prapede || 22 ||

sadvartmani nayanapuṭe tiṣṭhantīm api jihmāṃ pakṣmapaṅktiṃ yad ūhus tad asau nikṛṣṭatām ivāpa | sanmārgavartī hi pāpācaraṇe pṛthagjanebhyo 'py adhamaḥ | jihmā pāpā kuṭilā ca | adha(va)mo nikṛṣṭo 'nṛjuś ca || 22 ||

āhlādaṃ śiśiratarāvamarśahṛdyāḥ kurvatyo 'dhikam apariplavaprakāśāḥ | aurvaryaḥ sphuradaghanāvalambibimbā bimboṣṭhyo vibabhur apūrvavidyutas tāḥ || 23 ||

urvarā bhūs tatra bhavā aurvaryaḥ | sphuraddyotamānam_, aghanaṃ tanu, avalambi ca saralaṃ bimbaṃ śarīrābhogo yāsām_ | apūrvaṃ viśeṣeṇa dyotante | atha cāpūrvā vidyutas taḍito hlādahetavaḥ śītasparśāḥ sthiraprakāśā bhuvi sthitā megheṣu cānavalambamānā bhavanti || 23 ||

ākṣiptapriyatamacetasā tadānīṃ puṣpeṣusphuṭam avatāvadhānayogam | paryāptasvarapadatālasacchriyoccair gāndharvasthitir atha yauvatena tene || 24 ||

yuvatīnāṃ samūho yauvatam_ | tena puṣpeṣv ekāgratāyogaṃ sphuṭam avatā gacchatā gāndharvasyeva sthitir vihitā | nūpurakvaṇitayogena paryāptaśabdāni padāni yasya tadbhāvenollasatkāntinā | gāndharvaṃ ca ceto(?)manoharam_ | puṣpeṣau ca kāme sphuṭam_ | uddīpakatvāt_ | avadhānaprayojyaṃ ca | tathā paryāptaiḥ svaraiḥ ṣaḍjādibhiḥ, padaiḥ suptiṅṅ antaiḥ ṣaḍjādisvarādhārabhūtaiḥ, tālena ca kālamānarūpeṇa cañcupuṭacācapuṭādinā sacchobhanam_ | uktaṃ ca—‘padasthaḥ svarasaṃghātas tālena sumitas tathā | prayojyaś cāvadhānena gāndharvam abhidhīyate ||’ iti || 24 ||

ābhāsvatkiraṇakarālaratnahārapratyagrāṃ dadhad alakāspadām abhikhyām | vaidagdhīṃ yuvatijano 'tha puṣpakāñcīchāyāvāndraviṇapater ivālambe || 25 || 2. ‘ratnahāraḥ’ kha.

alakā lalāṭāvalambinaḥ keśāḥ | alakā ca dhanadapurī | puṣpakāñcī kusumamayī raśanā tayā śobhāvān_ | puṣpakeṇa vimānenāñcati vrajatīti puṣpakāñcī kāntimāṃś ca || 25 ||

tuṅgatvaṃ kucakalaśeṣv athāṅganānāṃ vistāraṃ vikaṭakaṭīrakasthalīṣu | madhyeṣu kraśimadaśāṃ śaśaṃsa loko bhāveṣu sthitir ucitā janasya śasyā || 26 3. ‘sthaleṣu’ kha.

26 ||

prāptānām abalatayāpi niḥsahatvaṃ bhraṣṭānāṃ na tu balibhāvalagnatāyāḥ | uttuṅgaiḥ kucakalaśair abhāri tāsāṃ sadvṛttair api caturaśratāśrayā śrīḥ || 27 ||

balī balavāṃs tadbhāve lagnatā prasaktis tato yā abhraṣṭās tāḥ kathaṃ balābhāvena niḥsahatvaṃ yāntīti virodhaḥ | avirodhas tu—valayaḥ santi yasya tad valibham_ | ‘tundivalivaṭer bhaḥ’ | valibham avalagnaṃ madhyaṃ yasya tadbhāvād acyutatvāt strīsamucitena durbalatvena niḥsahatvāc ca | ye sadvṛttāḥ suparivartulās te kathaṃ catuṣkoṇā bhavantīti virodhaḥ | caturaśratā sarvatobhadratvam iti tv avirodhaḥ || 27 ||

vispaṣṭadraḍhimaguṇābhirāmarūpaiḥ satsthānasthitibhir anūnalakṣaṇāḍhyaiḥ | rāmāṇāṃ karaṇagaṇair ivāṅgahārā nājahnuḥ śriyam atha mauktikair na hārāḥ || 28 ||

aṅganānāṃ hārā mauktikaiḥ śobhāṃ svīcakrur eva | yathā karaṇagaṇair aṅgahārāḥ | cārīnṛttahastādiyogajanyais talapuṣpādibhiḥ karaṇair nirvartyamānāḥ sthirahastādayo 'ṅgahārā yathāharanti śobhāṃ tathā mauktikair hārā ityarthaḥ | vispaṣṭadārḍhyā guṇās tantavaḥ | prakaṭaś ca draḍhimaguṇo 'bhyāsotthaṃ sthairyam_ | sthānaṃ pradeśaḥ sthānāni ca vaiṣṇavādyāni | uktaṃ ca—‘vaiṣṇavaṃ samapādaṃ ca vaiśākhaṃ maṇḍalaṃ tathā | pratyālīḍham athālīḍhaṃ sthānāny etāni ṣaḍ_ nṛṇām_ ||’ iti | lakṣaṇaṃ svarūpavyavasthāpako dharmaḥ | tac ca maṇiśāstre bharate [ca] || 28 ||

śṛṅgārasthitiramaṇīyanarmagarbhavyāpārātanurasanāyakānuyātā | rambhorūratha caturaṅkalāñchitaśrīḥ pratyagrām atanuta nāṭikeva śobhām || 29 ||

(śobhā yeṣāṃ apy uktaṃ) śṛṅgārasthitiramyeṇa pratihāsagarbhavyāpāreṇa mahāvyasanena ca nāyakenānuyātā | caturaṃ kṛtvā kalābhir nṛttagītādibhir āñchitā āyatā śrīr yasyāḥ sā | ataś ca nāṭikeva | sāpi hi śṛṅgārasya rasasya sthitir yasyāṃ sā tathā ramyo narbhagarbhasya kaiśikīvṛttibhedasya vyāpāro yasyāṃ sā | narmasphiñjanarmasphoṭanarmagarbhākhyāḥ kaiśikīvṛttibhedāḥ | tatra narmagarbhaḥ—‘vijñānarūpaguṇasaṃpadādibhir nāyakau guṇair yatra | pracchannau vyavaharataḥ kāryavaśān narmagarbhaḥ saḥ ||’ iti lakṣitaḥ | tathā atanavo rasā hāsyādayo 'ṅgabhūtā yasyāṃ sā | nāyakena ca dhīralalitākhyena yuktā | caturbhir aṅkair vicchedabhedaiḥ śrīr yasyās tādṛśī ca | uktaṃ ca—‘īrṣyāpraṇayakrodhaprasādaratiharṣasaṃpannā | bahunṛttagītavādyā śṛṅgārābhinayavinayasaṃyuktā || virahautsukya samāgamasukhānvitā nṛpaticaritasaṃbaddhā | strīprāyā caturaṅkā lalitapadā nāṭikety uktā || yatrārthasya samāptir yatra ca bījasvabhāvasaṃhāraḥ | kiṃcid avalagnabinduḥ so 'ṅka iti satāvagantavyaḥ ||’ iti || 29 ||

bibhratyā samakaraketanaśriyoccaiḥ pratyagrāmadharadalapravālavallīm | mārgasthaṃ hariṇadṛśā janaṃ harantyā lāvaṇyaṃ jalanidhivelayeva bheje || 30 ||

makaraketanaḥ kāmaḥ | makarākhyāś ca prāṇina eva ketanaṃ cihnam_ | adharadalam eva vidrumalatā | adhobhavatpattrā ca sā | mārgasthaṃ sadācārastham adhvasthaṃ ca harantyā rañjayantyā apavāhayantyā ca | lāvaṇyaṃ saundaryaṃ kṣārarasatā ca || 30 ||

saṃspṛṣṭaś caraṇatalena pakṣmalākṣyā saṃsaktaiḥ stabakaśatair aśokavṛkṣaḥ | kṣepīyaḥ pathi vikasallatākulo 'bhūn mārgasthaḥ ka iva na bhājanaṃ vibhūteḥ || 31 1. ‘pakṣmalākṣyāḥ’ ka.

31 ||

nanv asmin rataguruṇā samaṃ nikuñje viśramya vyapanaya tāvad adhvakhedam | ity ārād akṛta navāṃśukāñcalāgravyāsaktā vratatir ivārthanāṃ ramaṇyāḥ || 32 ||

rataguruḥ kāntaḥ || 32 ||

anyasyā guru jaghanaṃ babhāra paścād ayāntyāḥ sphuṭam adhikaṃ sagauravatvam | paśyantyāṃ pratiyuvatau sarāgam enāṃ yat kāntaś ciram anupālayāṃcakāra || 33 ||

gauravaṃ gurutā saṃmānaś ca || 33 ||

anvīye madhukaramaṇḍalena tāvat saṃsarpann upavanamārutaḥ sugandhiḥ | yāvat strīparimalagocaro na lebhe ko nādyaṃ tyajati padaṃ viśeṣalābhāt || 34

anvīto 'nvitaḥ | sugandhir iti gandhasyettve tadekāntagrahaṇasya coditatvād ittvaṃ na prāpnoti | atra naikāntiko gandhaḥ | evaṃ tarhi gandhasyāntarlīnatayā kṛtrimatvenāpratibhāsanādaikāntikatvam upacaritam itīttvaṃ na virudhyate | upamānād vā bhaviṣyati sugandhir iva sugandhir iti || 34 ||

prastāve navamadhumāsanāṭakasya sthitvāntargahanalatātiraskariṇyāḥ | prārabdhā parabhṛtanartakena kūjā straiṇasya śrutim aharatprarocaneva || 35 ||

prastāvo 'vasaraḥ prastāvanā ca | yasyā lakṣaṇam_—‘naṭī vidūṣako vāpi pāripārśvaka eva ca | sūtradhāreṇa sahitāḥ saṃlāpaṃ yatra kurvate || citrair vākyaiḥ svakāryotthair vīthyaṅgair anyathāpi vā’ | nāṭakasya ca—‘pañcasaṃdhi caturvṛtti catuḥṣaṣṭyaṅgasaṃyutam_ | ṣaṭtriṃśallakṣaṇopetaṃ nāṭakaṃ paricakṣate ||’ iti || 35 ||

bibhrāṇaṃ vasanam ivāntarāpi cūtaṃ sāmodasthiti girikarṇikābhirāmam | gāṇikyaṃ savikaṭahāratāṃ dadhat tatkṣmābhartus taṭam anu kānanaṃ ca reje || 36 ||

gāṇikyaṃ gaṇikāsamūhaḥ | ‘gaṇikāyāś ca’ ity aupasaṃkhyāniko yañ_ | tat_, kānanaṃ ca giritaṭaṃ lakṣayitvā reje | antaram āpnotīty antarāpi keśamadhyaprāptaṃ cūtaṃ vasanam iva bibhrat_ | vasanam apy antarā madhye picunā kāryāsena ūtaṃ vihitam_ | giri vāci sāmodasthiti prahṛṣṭam_ | karṇikābhiḥ karṇālaṃkārair abhirāmam_ | saha vikaṭena hāreṇa vartate yaḥ tadbhāvaṃ dadhat_ | kānanam api madhyavyāpi cūtaṃ bibhrat_ sasaurabhasthitibhir girikarṇikābhir oṣadhibhedair abhirāmam_, saha vividhaiḥ kaṭahāraiḥ puṣpabhedair vartate || 36 ||

nirvāṇasthitim apavartitailam uccair avyāptaṃ na mṛdumarudvidhīyamānam | taṃ prātastanam iva dīpakaṃ vilokya straiṇena dviguṇaratābhilāṣatāpe || 37 ||

nirbāṇā niḥsṛtabāṇākhyakasumā sthitir yasya | apavartitā vātena calitā elā niṣkuṭyo dravyaviśeṣā yatra | na vibhiḥ pakṣibhir āptam avyāptaṃ tādṛśaṃ na | api tu tair āptam eva | athavā nirbāṇāṃ sthitiṃ viśeṣeṇa nāptam_ | api tu prāptam eveti yojyam_ | anyatra nirvāṇā praśāntā sthitir yatra | apagate vartis tailaṃ ca yasya | raviṇā āptaṃ na | tadudaye tasya praśamanāt_ | taṃ girim_ | prātastanaṃ prābhātikam_ | āpe prāptā || 37 ||

bibhrāṇaḥ kanakamayaṃ nu bījakośavyājenātanucaṣakaṃ kuśeśayinyāḥ | utkṣiptas taraladalāṅgulir vyaloki śyāmābhiḥ kara iva bhāskarasya padmaḥ 38 1. ‘kanakamayena’ ka.

nur ivārthe || 38 ||

gacchantaḥ pathi ghaṭitā nikuñjadeśe viśrāntāḥ kvacana parasparaṃ yuvānaḥ | sauhārdaṃ vidadhur ayantraṇaṃ kriyāṇāṃ visrambhaḥ suhṛdi phalaṃ nanu pradhānam || 39

yuvāna iti ‘pumān striyā’ ity ekaśeṣaḥ || 39 ||

vāmabhrūmukhamadirāsugandhisekavyāsaṅgasphuṭabakuladrumaprasūnam | bhṛṅgālīcaraṇavidhūtapakṣmamālāparyastastabakaparāgaparibhadram || 40 ||

vāmetyādi kalāpakam_ | pāribhadrās taruviśeṣāḥ || 40 ||

udgacchannavalavalīlavaṅgapuṣpapratyagrātanutarasaurabhābhirāmam | dikcakrasphuradanubandhigandhaphullanmandārastabakamadhuprasaṅgibhṛṅgam || 41 ||

41 ||

sacchayaṃ vipinam anupraviśya pārśvavyāsaktapriyakaralagnapāṇipadmaḥ | praścyotannavamakarandapānalīlāvisrambhātiśayasukhopalabdhanidraiḥ || 42 || 2. ‘praścotat_’ kha.

42 ||

aikṣiṣṭa bhramarakulaiḥ kṛtaṃ gurutvaṃ vallīnāṃ yuvatijanas tadā natānām | kasyārthī na bhavati gauravāya loke saṃpannābhimataphalaḥ samāśrito vā || 43 3. ‘bhavati na’ kha. 4. ‘lokaḥ’ ka.

43 ||

(cakkalakam_)

5. khapustake nāsti. ābaddhakramaharikampyamānasālā sā rāmābhigamasamākulā tadānīm | laṅkeva sphuṭaśukasāraṇā vanorvī babhrāje ghanarucirakṣasānuviddhā || 44 ||

harayo vānarāḥ | sālās taravas tadviśeṣā vā, prākārāś ca | rāmāḥ striyaḥ, rāmaś ca dāśarathiḥ | śukānāṃ sāraṇamānayanam_ | śukasāraṇau ca rāvaṇaspaśau | ghanair mustai rucirā akṣā vibhītakā yeṣu taiḥ sānubhir vyāptā, ghanarucibhiś ca jaladaprabhai rākṣasair anuviddhā || 44 ||

ākarṣanmadhurasaśīkarān vanebhyaḥ śephālīkusumakaṣāyagandhagarbhaḥ | ānandaṃ marud atanot tanūdarīṇāṃ kaḥ śreyānadhikaguṇatvam āpya na syāt || 45 ||

kaṣāyo rasaś cetoharo vā | śabdasparśaguṇasya vāyor gandhākhyo guṇo naiva svābhāvikaḥ, yas tūpalabdhaḥ sa kusumasaṃbhava ity adhiko 'sau guṇaḥ || 45

eko 'pi prasavaśaraḥ sa kena sahyo nānātmā kimu gaṇanātigocaro yaḥ | tadbhinne hṛdi caritārtha eva kāmo māninyāṃ na unar abhūd adhijyacāpaḥ || 46 1. ‘māninyā’ ka.

gaṇanātigocaraḥ saṃkhyātikrāntiviṣayaḥ || 46 ||

vāsantyaḥ kusumabhṛtaś ca kundavallyo graiṣmyaś ca pratigiri pāṭalāḥ praphullāḥ | anyonyaṃ yuvatijanasya mānabhaṅgaprāgalbhyaṃ vyatijahasus tarām ivārāt || 47

vasante puṣpyanti vāsantyaḥ | ‘kālāt sādhupuṣpyatpacyamāneṣu’ ity aṇ_ | vyatijahasur iti karmavyatihāre ‘itaretarānyonyopapadāc ca’ ity ātmanepadābhāvaḥ || 47 ||

rāmāṇāṃ navanavamālikāvikāsapratyagraprasavatiraskṛtaṃ tadānīm | prārambhe pariṇatim āpa mānadhairyaṃ sugrīṣme mukulam ivātha kundapuṣpam || 48 ||

pariṇatir naśyad avasthatvam_ | sugrīṣmo vasantaḥ | tathā ca prayogaḥ—‘sugrīṣmake na dṛṣṭo na ca māghaniśāsu dīrghadīrghāsu | draṣṭavyā(vyaḥ) pathika puro hatāśayā tvaṃ kathaṃ na(nu) mayā ||’ iti | atra kundapuṣpaṃ mukulāvastham eva naśyati | tasya prāyeṇa śaiśiratvāt_ || 48 ||

pratyagrāṅkuraracitaśriyaṃ vanālī bibhrāṇā viṭapatatiṃ sapattrinādām | abhyarṇā śarad iva nimnagātaṭorvīm ānandaṃ vyatanuta mattakāśinīnām || 49 ||

pratyagrair aṅkurai racitaśriyam_, pratyagrāṃ kurarākhyaiḥ pakṣibhiś citaśriyaṃ ca | pattriṇaḥ pakṣiṇaḥ śarāś ca | śaradi nadītaṭeṣu dhānuṣkair abhyasyadbhiḥ saśūtkārāḥ śarāḥ kṣipyante | mattakāśinī pragalbhā yoṣit_ || 49 ||

utsṛjya pravikacacūtayaṣṭim uccais tṛṣṇāndhā api paribabhramur dvirephāḥ | kāntāsye śvasitasugandhini prakarṣān naivārtā laghuni pade bhavanti dhīrāḥ || 50

dhīrāḥ svalpake sthāne naivārtā dainyabhājo bhavanti || 50 ||

saṃsthānaṃ dadhad upari cchadatrayasya tretāgnisthitisadṛśaṃ nitambinībhiḥ | nṛtyantyāḥ pavanavaśāl latāṅganāyāḥ kāṅgūlaḥ kara iva pallavo vyaloki || 51 2. ‘kaṇḍūlaḥ’ ka.

tretāgnir āhanīyādivahnitrayī | tatra sthityā sadṛśaṃ saṃniveśaṃ bibhrat_ | triṣu pallaveṣv agniṣv avoparisaṃniveśena vartamāna ityarthaḥ | ata eva kaṇḍūlā(kāṅgūlā)khyo hasta iva | tatra hy aṅguṣṭatarjanīmadhyamānāṃ tretāgnivadupaviṣṭānām upari vakratayā pṛṣṭhapātinyanāmikā vartate | yad uktam_—‘tretāgnisaṃsthitā madhyātarjanyaṅguṣṭhakā yadā | kāṅgūlo nāmikā vakrā tathā cordhvā kanīyasī ||’ iti || 51 ||

bibhrāṇair adhikaguṇatvam aṅganānāṃ hastāgraiḥ prasabham akāri pallavānām | pratyagrojjvalanijaśobhayā sarāgair bhagnānām api punar ukta eva bhaṅgaḥ || 52 ||

bhagnānāṃ jitānām api punar ukta eva bhaṅgaś chedanam akāri | chinnānāṃ ca cchedanaṃ punar uktam eva || 52 ||

mūlasthapriyanakhamaṇḍanasya bāhor utkṣepāt pratiyuvatiṃ vidūnayantyāḥ | āditsor drumaviṭapāgravartipuṣpaṃ puṣpatve 'py amṛtaphalatvam eva bhīroḥ || 53 ||

yat puṣpaṃ kathaṃ tad aṅganāyāḥ phalatvam āpnuyād iti virodhaḥ | puṣpasya phalarūpatāpattau kā viruddhārthateti cet_, āha—puṣpatve 'pīti | sati hi pariṇāme puṣpasya phalarūpatā, na tu svarūpa evāvasthitasyetya(ti)virodhaḥ || 53 ||

śliṣyantyā viṭapaśikhāśrayaprasūnavyāditsāsarabhasacetasas taruṇyāḥ | aprāptaprasavaphalodayo 'pi śākhī saṃpattiṃ phalabharaśālinīm avāpa || 54 ||

niṣphalo 'pi tarus taruṇīśleṣāt phalam abhyadhikaṃ prāpa || 54 ||

śākhāgrasthiti kusumaṃ taror jighṛkṣur yatpīnastanavinatā śaśāka nāptum | tatrāsīd rataguruṇā vilūya datte pratyakṣaṃ pratiyuvateḥ samunnatā strī || 55 ||

samunnatā garvitāpi || 55 ||

bibhrāṇai rasabharaśālitām abhīkṣṇaṃ rāgaśrīsamudayaśobhibhis tadānīm | divyastrīkarajaparikṣatais tarūṇāṃ tāruṇyaṃ saphalam abhāri pallavaughaiḥ || 56 ||

rasaḥ śṛṅgāro 'pi | rāgaḥ saktir api | pallavā viṭā api || 56 ||

bhagnānām agaṇitatadvipattidoṣair vallīnāṃ madhu kusumeṣv apāyi bhṛṅgaiḥ | yuktānāṃ taralatayā malīmasānāṃ na svārthāt kvacid atiricyate 'nurodhaḥ || 57 ||

agaṇitā vallīnāṃ vipattir yatra pāne | malīmasāḥ pāpā api || 57 ||

kurvāṇā pṛthuni vadhūr nitambabimbe visrastaṃ vasanam anāsthadurvinītam | vispaṣṭām anurahasaṃ priyasya nānyā na vyāñjīn nidhuvanalālasāṃ sphurantīm 58

anāsthadurvinītaṃ helayā duṣprāvṛtam_ | anurahasam ekānte | ‘anvavataptādrahasaḥ’ ity ac_ | na na vyāñjīt prakaṭīcakāraiva | lālasā spṛhā || 58 ||

bhrūkṣepānugatanikuñjadattadṛṣṭer ākūtaṃ sapadi niśemuṣī priyasya | tadvartmany aviśata kācid iṅgitajñā no kārye kvacana bhavanti dīrghasūtrāḥ || 59

ya iṅgitaṃ na jānanti te 'pi kvacid api kārye dīrghasūtrāḥ kālakṣepiṇo na bhavanti || 59 ||

niḥśvāsair aviralasaurabhair vikṛṣṭaḥ śyāmāyāḥ karakamalena saṃbhramantyāḥ | babhrāmābhimukham apākṛto 'pi bhṛṅgaḥ paryāptaṃ na khalu malīmasasya dhārṣṭyam 60

saṃbhramantyāḥ sasaṃbhramāyāḥ | neti kākvā || 60 ||

kāntānāṃ karakamalair anaukahānāṃ lupteṣu prasabham upetya pallaveṣu | dhūtānām upavanavāhibhiḥ samīraiḥ kiṃ citraṃ yadasumanaskatāvirāsīt || 61 ||

anaukahās taravaḥ | asumanaskatā niṣpuṣpatvam_ | yasya ca pallavā aṅgabhūtāś chidyante tasyāsumanaskatā daurmanasyaṃ bhavati || 61 ||

vyāviddhā madhukarapaṅktidhūmyayārādābhāsīdadhikam aśokapādapasya | pluṣyantī sapadi manāṃsi māninīnāmātāmracchavir abhiluṅkhiteva vallī || 62 ||

dhūmyā dhūmasamūhaḥ | mālādibhyo yaḥ | abhiluṅkhitā jvalitā || 62 ||

nīlābjaṃ śravaṇavataṃsatāṃ taruṇyā yad bhartrā vikacamanīyatānataṃ sat | ātmānaṃ vimalakapoladarpaṇasthaṃ tac chobhātiśayaparītamaikṣateva || 63 ||

ānataṃ srastam_ || 63 ||

na śreyān samam adhikaśriyā virodho yuktātra praṇatir itīva pīvarorvāḥ | uttaṃsotpalam avanamya dūram akṣṇaḥ prāstāvītstavam iva cañcarīkaśabdaiḥ || 64 ||

64 ||

ātāmrāsitadhavalaiḥ prasūnavṛkṣaiḥ stheyobhiḥ kṛtavasatisthites tadānīm | vyātasthe smaraṇabhuvo vanasthalīṣu sthūlābhaiś ciramavisaṃsthulasphulaśrīḥ || 65 || 1. ‘sthulaśrīḥ’ kha.

avisaṃsthulān upahatā sphulaśrīḥ paṭamaṇḍapaśobhā kāmasya kusumapradhānais tarubhiḥ saṃpāditā || 65 ||

paryaśrusrutiparipāṭalatvam akṣṇoḥ kurvāṇaṃ manasi manoramaṃ vyalīkam | māninyo raja iva cakṣuṣi praviṣṭaṃ saṃrambhasphuradadharā na paryamṛṣyan || 66 ||

manoramaḥ preyān_ | vyalīkaṃ gotraskhalitādivipriyam_ || 66 ||

kurvāṇāmadhitaru sugrahe 'pi puṣpe hastāgraṃ sapadi yuvā svayaṃ praditsuḥ | rambhorūmarudhadanekayuktibhedaiḥ premāho racayitum ahite 'nukūlam || 67 ||

67 ||

naikatra śravasi tathā sahematāḍītāṭaṅke 'py akṛta vadhūḥ prasādhitāsthām | anyatra priyakarakṛṣṭalambapālīvinyastacchadasubhage yathābhyamitram || 68 ||

hematāḍye yaḥ tāṭaṅkaḥ karṇābharaṇam_ | tatsahite 'py ekasmin karṇe prasādhitāsthāṃ maṇḍito 'yam iti buddhiṃ tathā vadhūr nākṛta yathā sapatnīsaṃmukhaṃ priyaniveśitena pallavena subhage dvitīye || 68 ||

anyasyāḥ surabhimukhānilāvakṛṣṭā vaktrendoḥ pṛthupariveśacakrabandham | bhṛṅgāṇāṃ tatir akarot patattravātavyādhūtastabakavataṃsadhūlijālaiḥ || 69 ||

pariveśaḥ paridhiḥ || 69 ||

unnidracchadam upadeti puṣpam ārād ānītaṃ dayitatamena menakāśrīḥ | vibbokāñcitavinihiñcitottamāṅgā vāmorūr abhimukham agrahīt sapatnyāḥ || 70 ||

upadā ḍhaukanikā | vibbokaś ceṣṭāviśeṣas tenāñcitaṃ vinihiñcitaṃ ca śiro yasyāḥ | uktaṃ ca—‘iṣṭānāṃ bhāvānāṃ prāptāvatiharṣamānasaṃbhūtaḥ | strīṇām anādarakṛto vibboko nāma vijñeyaḥ || kiṃcit pārśvonnatagrīvaṃ śiro jñeyaṃ............... | ............ strīṇāṃ caitat prayojayet_ ||’ iti || 70 ||

vyatyāsād dayitatamena kāpi nāmnaḥ prattāyām api sumanasyamarṣahetoḥ | saṃrambhasphuradadharāruṇekṣaṇaśrīs tac cittraṃ yad asumanaskatāṃ prapede || 71 ||

71 ||

viśrāmyatkucayugalor asi priyasya smerānyā mṛducaraṇāgradurniviṣṭā | ādāya skhalanapadaṃ viloladṛṣṭiḥ kaṇṭhāntaḥ praṇihitabāhukandalīkā || 72 1. ‘smerāsyā’ ka.

skhalanacchalanaṃ kṛtvā caraṇābhyāṃ durniviṣṭā satī kācit priyasya śirasi śekharaṃ babandha | kandalī latā || 72 ||

saṃrambhonnamitanitāntatāntamadhyā bhūyo 'pi sthitim adhijagmuṣī kathaṃcit | āmodāpahṛtamadhuvrataṃ natabhrūr uttaṃsaṃ śirasi babandha bandhuraśrīḥ || 73 || 2. ‘tāntamanyā’ ka.

saṃrambhaḥ prayatnaḥ || 73 ||

(yugalakam_)

3. kha-pustake nāsti. kasyāścid dayitakarābjayojitena śrotrāgre taruṇatamālapallavena | dhūmenāviratam ivābhihanyamānaṃ bāṣpāmbhaḥ pratiyuvater mumoca cakṣuḥ || 74 ||

74 ||

nīrandhravratatitirohite 'parasyāḥ sāśaṅkaṃ dayitatame babhūva cetaḥ | adhyāste hṛdayam akṛtrim apriyāṇāṃ kāntānām atibahumatsaro hy anaṅgaḥ || 75 || 4. ‘atiśayamatsaro’ ka.

sāśaṅkaṃ sapatnībhogaśaṃsi | priyaṃ snehaḥ || 75 ||

saṃbādhād virahitavallabhā tadānīṃ gāyantī raṇaraṇakāttapañcamaikā | nirlakṣaṃ kusumaparigrahāya subhrūḥ saṃdaṃśaṃ suciram ababhramatkarāgram || 76 || 5. ‘avibhramat_’ ka-kha.

saṃbādho janabāhulyam_ | raṇaraṇakam utkaṇṭhā | pañcamo grāmarāgabhedaḥ | nirlakṣaṃ nirviṣayam_ | anyatra gatacittatvāt_ | saṃdaṃśākhyaṃ karāgram abhramayat_ | ‘tarjanyaṅguṣṭhasaṃyogas tv arālasyaṃ yadā bhavet_ | abhugnatalamadhyaś ca sa saṃdaṃśa iti smṛtaḥ’ || 76 ||

spaṣṭākṣibhruvavikṛtiprapañcaśobhī śrṅgārākṛtipiśuno vipakṣavāmaḥ | sagrīvānirupamarecako jajṛmbhe rambhor vā dayitavilokanena hāvaḥ || 77 || 6. ‘sugrīvā’ ka.

akṣibhruvam iti acaturādisūtre nipātitam_ | vipakṣavāmaḥ sapatnīpratikūlaḥ | recako bhramaṇam_ | hāvaś ceṣṭāviśeṣaḥ | uktaṃ ca—‘prāpteṣu śṛṅgārarasāśrayeṣu bhāveṣu kāmāṅkuracihnabhūtam_ | utpatsyate yat smitavīkṣitottham unmīlitaṃ ramyatayā sa hāvaḥ ||’ iti || 77 ||

rāmāṇāṃ drumaviṭapāgrajanmapuṣpavyāditsārabhasavaśāt savepathubhyaḥ | hāraughaiḥ pravigalitaṃ payodharebhyo nodvṛttaiḥ saha guṇināṃ cirāya yogaḥ || 78 7. ‘pratigalitaṃ’ ka.

udvṛttā unnatavartulā upaplutāś ca | guṇas tantuḥ saujanyaṃ ca || 78 ||

nepathye masṛṇamanorame kṛtāsthā śṛṅgārāñcitarasaśālitāṃ vahantī | kāntasya pramadamudāranṛttalīlā rambhorūr atanuta kaiśikīva vṛttiḥ || 79 || 1. ‘śṛṅgārārdhita’ ka.

nepathyam ākalpaḥ | masṛṇam anuddhatam_ | āsthā sthitiḥ | raso rāgaḥ | kaiśikī nāma vṛttir avasthāviśeṣaḥ | ‘yā ślakṣṇanepathyaviśeṣacitrā strīsaṃyutā yā bahunṛttagītā | kāmopabhogaprabhavopacārā tāṃ kaiśikīṃ nāma vadanti vṛttim_ ||’ iti || 79 ||

saṃphullannavanavapuṣpaśekharāṅke niḥśaṅkaṃ madhu papuṣībhir antarāle | kāntānāṃ citarasasaṃcitena ceto rāmābhir madakilakiñcitena jahre || 80 || 2. ‘śekharāṅkaṃ’ ka. 3. ‘mitarasa’ kha.

śekharo gucchaḥ | rasaḥ svādaḥ | madena kilakiñcitaṃ ceṣṭāviśeṣaḥ | ‘śuṣkaṃ kṣaṇaṃ praruditaṃ kṣaṇam aśrupātaḥ krodho muhurhasitam āśu punaś ca gītam_ | vyāmiśrarūpam iha harṣarasaprayuktam uktaṃ janaiḥ śrutadhanaiḥ kilakiñcitākhyam_’ || 80 ||

bibhrāṇā śrutisukhatāṃ manoramaśrīr yāntīnāṃ vanabhuvi mattakāśinīnām | māyūrī kalavirutiḥ svarāśrayatvaṃ saṃprāptā vyatanuta mārjaneva śobhām || 81

śrutau karṇe śrutibhiś ca sukhatā sukhakāritvam_ | svarārambhakā dhvanayaḥ kalasvarāḥ kākalīprabhṛtidvāviṃśatibhedāḥ śrutayaḥ | māyūrī mayūrasaṃbandhinī virutiḥ kekā svarasya ṣaḍjasyāśrayatāṃ prāptā | ‘ṣaḍjaṃ vadati mayūraḥ’ ity ukteḥ | māyūryākhyā mura(ja)jā mārjanā svarāśrayaḥ | uktaṃ ca—‘gāndhāro vāmake kāryaḥ ṣaḍjo dakṣiṇapuṣkare | ūrdhvake pañcamaś caiva māyūryāstu svarāḥ smṛtāḥ ||’ iti || 81 ||

prāptāyā rahasi manorameṇa yogaṃ rāmāyāḥ pramadabharotthamīkṣaṇāmbhaḥ | pattrālīṃ sapadi dudhāva gaṇḍabhittāvaśreyo jagati bhavej jaḍān na keṣām || 82 || 4. ‘pattrālīḥ’ ka.

82 ||

akṣuṇṇā bata śatamanyutā taveyaṃ sāścaryā subhaga vinirmame vidhātrā | niḥśaṅkaṃ vidadhata eva gotrabhedaṃ vajras te nivasati vāci yan na pāṇau || 83 ||

akṣuṇṇā navā | śatamanyutā śatāparādhatā indratā ca || 83 ||

ity ārād abhidadhuṣīṃ punaḥ sapatnīnām naivāvanataśirā yuvānunīṣuḥ | bāṣpāmbhaḥplutanayanāṃ vijṛmbhitāntaḥsaṃtāpām api yuvatiṃ vyadhāt sahāsām || 84

84 ||

(yugalakam_)

vīkṣyārād vanabhuvi cūtaśākhivallīṃ valgantīṃ kusumapṛṣatkahastabhallīm | nirmānā yuvatir abhūd rate vidheyā nautsukyāṃ vrajati hi ramyadarśanāt kaḥ || 85 || 5. ‘vellantīṃ’ ka.

85 ||

uttuṅgadrumakusumagrahābhilāṣād uttānīkṛtavadanaśriyo 'vataṃsaḥ | sasraṃse yuvatijanasya karṇamūlād ārūḍho vinipatatīti nātra citram || 86 ||

86 ||

kāntāyāḥ kusumarajo vilocanasthaṃ yat preyān vadanasamīraṇair nirāsthat | tenaiva pratiyuvateḥ samīpabhājaḥ kāluṣyaṃ yugalam anāyi dūram akṣṇoḥ || 87 ||

87 ||

utkṣiptā kusumajighṛkṣayā tadānīṃ tanvaṅgyāḥ sadupalapattramaṇḍanaśrīḥ | aklāmyadbhujalatikātisaukumāryāt sadvṛttair api khalu khedam eti kaścit || 88 ||

sadupalā maṇayaḥ | tanmayaiḥ pattrair maṇḍanaśrīr yasyāḥ | sadvṛttaiḥ śubhācārair api || 88 ||

vibhrāṇe sphuṭataraśuṣkavarṇageyasthānīye nirupamavaktrapāṇiśobhām | vicchittiṃ vapuṣi vilokya vallabhāyāḥ prāṇeśo vipulavilocanotsavo 'bhūt 89

śuṣkā nirarthakā kuṃ ṭhuṃ ityādayo varṇā yasya tādṛggītatulye | tad dhi vaktrapāṇināmnā pūrvaraṅgeṇa śobhate | uktaṃ ca—‘nāṭyavṛttivibhāgāya vaktrapāṇir vidhīyate’ iti | ‘mālyācchādanabhūṣāvilepanānāmanādaranyāsaḥ | svalpo 'pi mūrtiśobhāṃ janayati yaḥ sā tu vicchittiḥ’ || 89 ||

ābadhya srajam abhidhāviparyayeṇa śyāmāyā dadadativaimanasyabhājaḥ | vailakṣyāgamaparipāṇḍurānano 'nyo niḥspandasthitir akaroj jharaṅkaśaṅkām || 90 || 1. ‘dadhadati’ ka.

ābadhya umbhitvā | niḥspandatayā jharaṅkaśaṅkā tṛṇapuruṣabhrāntiḥ || 90 ||

sāgaske suhṛdi savepathutvam āpa svedāmbhaḥplutapulakāṅkurotkarāsīt | ādātuṃ sutanur iyeṣa cāvahitthaṃ premāho yuvatiṣu maugdhyadurvidagdham || 91 || 2. ‘ādhātuṃ’ ka. 3. ‘cāvahitthāṃ’ kha.

avahittham ākārasaṃvaraṇam_ | durvidagdhaṃ duḥśikṣitam_ || 91 ||

utsṛjya sphuṭaravarṇaśobham ārān nirgandhaṃ yuvatijano 'tha karṇikāram | āditsuḥ surabhitayā lavaṅgam abhyaidākārād api guṇa eti vallabhatvam || 92 || 4. ‘āsīt_’ ka.

92 ||

bhrāmyadbhir dhanamakarandaśīdhupānavyāsaṅgapramuditamānasais tadānīm | saṃrambhād aliyuvabhir vitanyamāno na strībhir na navalatotsavaḥ śaśaṃse || 93 || 5. ‘sīdhu’ kha.

makarandasya śīdhuna(dho)ś ca pāne vyāsaṅgaḥ prasaktiḥ | strībhir vitanyamāno 'libhir yuvabhiś ca yathākramaṃ navā latā evotsavo navalatākhyaś ca vasantotsavo 'bhinanditaḥ | ‘yatrābhinavayā vadhvā latayeva madhau drumaḥ | svayam āliṅgyate kāntaḥ sa syān navalatotsavaḥ’ || 93 ||

saugandhyād aviralakāntisaukumāryāt tadvaktrair atha vijitaḥ sarojakhaṇḍaḥ | bhṛṅgaughaiḥ kvacid api nādhyavatsyatārād vañcyante na khalu parair viśeṣaniṣṭhāḥ || 94 || 1. ‘vijitāḥ’ ka. 2. ‘ṣaṇḍāḥ’ ka.

kāntiḥ saukumāryaṃ ceti dvandvaḥ | adhyavatsyata adhiṣṭhitaḥ | viśeṣe niṣṭhā arthitā yeṣāṃ te viśeṣaniṣṭhā viśeṣakuśalāḥ | (‘ninadībhyāṃ snāteḥ kauśale’ iti ṇatvam_) || 94 ||

bibhratyaḥ prakṛtimanoramākṛtitvaṃ tā mālyagrathanavikalpaśilpadakṣāḥ | prāṇeśān atha saviśeṣam eva jahruḥ sādhīyo harati guṇāntareṇa guṇyaḥ || 95 ||

mālyagrathane vikalpāḥ prakārā eva śilpāḥ kalāḥ | guṇyo guṇavān_ | yapprakaraṇe 'anyebhyo 'pi—' iti yammatvarthīyaḥ || 95 ||

ślakṣṇatvaṃ viralavilepanaśriyas tā bibhratyo ruciratarāṅgavartanābhiḥ | sadrūpāḥ salalitanāṭyacitrabhittīr ālokyābhimatajanaḥ pupoṣa toṣam || 96 ||

vilepanam aṅgarāgo makkolādirañjanaṃ ca | aṅgānāṃ ca vartanā yathāsvam abhinayāḥ | citre ca kūrcikādibhir unmīlanā | nāṭyaṃ nṛttam eva citraṃ tasya bhittīr ādhārabhūtāḥ || 96 ||

gacchanti prakṛtimanoramāḥ kadācit kālena sphuṭam asatā guṇena yogam | niḥśvāsaśvasanaparamparābhir āsāṃ saugandhyaṃ yad ucitamāpi karṇikāraiḥ || 97 ||

kālena samayena sphuṭaṃ prakaṭam_ | asatā avidyamānena | śvasano vāyuḥ || 97 ||

preyasyā nibiḍanitambabimbaśobhām āditsuḥ kusumamayīṃ vidhāya kāñcīm | yām ārāt sarasamanā yuvopaninye saṃsargāt pratiyuvateḥ kṛtāparādhaḥ || 98 ||

98 ||

prāptas tat smaraṇasaroṣapāṭalākṣyā sasmerānananalinas tayā babandhe | prāyeṇa hy ananuguṇe vidhāv upaiti dhyātor 'thaḥ pariṇatim anyathaiva puṃsām || 99 ||

prāpto 'vaṣṭabdhaḥ san_ tasyāparādhasmaraṇena pāṭaladṛśā preyasyā sa yuvā tayā kāñcyā nibaddhaḥ || 99 ||

(yugalakam_)

niḥśvāsāvadhutapayodharā vihāravyāpārād vanabhuvi mamluṣī tadānīm | svedāmbhaḥkaṇanikaraṃ mumoca subhrūḥ śephālī pavanahateva puṣpavarṣam || 100 ||

mamluṣī mlānā || 100 ||

pramlānāñcitapuṭatāmarālakeśyā bibhrāṇā nipatitatārakābhirāmā | anyasyā vipinavihāravibhrameṇa śrāntāyā dayitatamaṃ jahāra dṛṣṭiḥ || 101

pramlānetyādinā śrāntākhyā dṛṣṭir varṇitā | yasyā lakṣaṇam_—‘śramapramlānitapuṭā śyāmāntāñcitalocanā | sann ā patitatārā ca śrāntā dṛṣṭiḥ prakīrtitā ||’ iti | añcitau prasṛtau | nipatite adhomukhe || 101 ||

bhrāntāyā giritaṭakānane mṛgākṣyāḥ prekṣyatvaṃ dayitatamasya jagmivāṃsaḥ | svidyantyā babhur avalagnabinducitrāḥ prottuṅgastanataṭavartino nakhāṅkāḥ || 102 ||

nakhā nakhakṣatāni | ye cāṅkā nāṭakādyavayavās te bindunā citrā janasya priyatvam upagatā bhrājante | bindur arthaprakṛtiḥ | yad uktam_—‘prayojanānāṃ vicchede yad avicchedakāraṇam_ | yāvat samāptir bandhasya sa bindur iti kīrtitaḥ || yo mukhasaṃdhau kṣiptaḥ kila vasati caturṣv api samantāt_ | tailasya bidurambhasi yathā sa bījāśrayo binduḥ ||’ iti || 102 ||

prāptāyāḥ kisalayapāṇinopakaṇṭhaṃ kasyāścit kusumarajobhir āsajadbhiḥ | ālīva drutam alikhallatā kapole nirdhautāṃ śramasalilena pattravallīm || 103 ||

āsajadbhir nīyamānaiḥ | ālī sakhī || 103 ||

sarvartugrathitamanoramaśriyo 'drāv unnidrastabakabhṛto yathāviśeṣam | bhṛṅgebhyo bhṛśataramasvadanta vallyo bhāvānāṃ bhavati kutaḥ prakarṣaniṣṭhā || 104

bhṛṅgebhya iti ‘rucyarthānāṃ prīyamāṇaḥ’ iti saṃpradānatā | svado rucyarthatvāt_ | tasya mukhendoḥ dṛṣṭau darśane || 104 ||

ākṛṣyāṃśukam amalaṃ navoḍhavadhvās taddṛṣṭiprakaṭakutūhalasya bhartuḥ | vispaṣṭaṃ vratatir adarśayanmukhenduṃ bhavyānāṃ bhavati yatas tator 'thasiddhiḥ || 105

105 ||

pātratvaṃ manasijalāsakasya yātā nartitvā kusumavihāranāṭakānte | viṣkambhasthitiviśadapraveśamārgān nirjagmuḥ kamaladṛśo 'tha kānanāṅkāt 106

manasija eva nṛttopādhyāyas tasyāspadatāṃ gatāḥ sudṛśo vihārānte vanotsaṅgān nirīyuḥ | nartakya iva | tā āpi | pātratvaṃ rāmādy anukartṛtā | nāṭakādisamāptā vaṅkād abhinīyamānān nāṭakādy avayavān nartakapūrvaṃ niḥsaranti pūrvatra viṣkambho vistāras tatsthityā viśadapraveśāḥ sugamāḥ panthāno yatreti yojyam_ | itaratra viṣkambho viṣkambhakaḥ | praveśaḥ praveśakaḥ | viṣkambhavatpraveśakasvarūpaṃ yatretyarthaḥ | aṅke hi viṣkambhapraveśakau kathopakṣepakāritayā prāyaśaḥ sadṛśau | ataś caikam evāṅke prayuñjate kavayaḥ | ‘śuddhaḥ saṃkīrṇo vā dvividho viṣkambhako 'tra vijñeyaḥ | madhyamapuruṣaḥ śuddhaḥ saṃkīrṇo nīcamadhyakṛtaḥ || parijanakathānuviddhaḥ praveśako nāma vijñeyaḥ | nottamamadhyamapuruṣair ācarito nāpy udāttavacanakṛtaḥ || prākṛtabhāṣācāraprayogam āsādya kartavyaḥ’ || 106 ||

spaṣṭehāmṛgaḍimavīthikaṃ sadaṅkavyāyogaṃ tad anu vihṛtya niḥsahāṅgyaḥ | atyākṣuḥ sphuṭadaśarūpakavyavasthaṃ manthādrer maṇitaṭakānanaṃ ramaṇyaḥ || 107 || 1. ‘taruṇyaḥ’ kha.

spaṣṭa īhāmṛgāṇāṃ vṛkāṇāṃ ḍimo yuddhaṃ yatra tathāvidhā vīthikāḥ panthāno yatra | śobhane 'ṅke utsaṅge vīnāṃ pakṣiṇām āyogaḥ saṃbandho yatra | sphuṭā daśā svocitāvasthā yeṣāṃ teṣāṃ rūpakāṇāṃ mṛgārbhakāṇāṃ vyavasthā sthitir yatra | atha ca—‘nāṭakaṃ ca prakaraṇam aṅko vyāyoga eva ca | bhāṇaḥ samavakāraś ca vīthī prahasanaṃ ḍimaḥ | īhāmṛgaś ca vijñeyo daśamaḥ kāvyalakṣaṇe ||’ iti yad daśarūpakākhyaṃ kāvyaṃ tad vadavatiṣṭhamānam_ | ‘divyapuruṣā......tkṛto divyastrīkāraṇopagatayuddhaḥ | īhāmṛgas tu kāryaḥ susamāhitakāvyabandhaś ca || prakhyātavastuviṣayaḥ prakhyātodāttanāyakaś caiva | ṣaḍvasulakṣaṇayuktaś caturaṅko vai ḍimaḥ kāryaḥ ||’ ityādi daśarūpakasya lakṣaṇam abhihitaṃ daśarūpakādhyāye || 107 ||

bibhrāṇaṃ diśi diśi rāsakaṅkalīlāṃ nānānvānugataviśālatālaśobham | sundaryaḥ katham api tadvanaṃ jahus tā ramyāḥ syuḥ ka iva hi sutyajāḥ padārthāḥ 108 1. ‘bibhrāṇā’ kha. 2. ‘nānātvānugata’ ka.

rāsakā mṛgaviśeṣā evāṅkaś cihnam_ | rāsakāṅkaś ca kohalokto nāṭyaprakāraḥ | uktaṃ ca—‘aṣṭau ṣoḍaśa dvātriṃśad yatra nṛtyanti gāyakāḥ | piṇḍībandhānusāreṇa tan nṛttaṃ rāsakaṃ viduḥ ||’ iti | tālās taruviśeṣāḥ, cañcapuṭacācapuṭādayaś ca || 108 ||

preyobhiḥ samam avagāhya kānanorvīṃ dehārdhasthitir iva śūliśailaputryoḥ | rāmābhir na rucirasaikatābhirāmā nāloki tridaśataraṅgiṇī vidūrāt || 109 3. ‘kānanorvīḥ’ ka.

ruciraiḥ saikatair abhirāmā || 109 ||

kūjantīṃ madhukaramaṇḍalīṃ purastād ālokya stabakitakovidāralīnām | prauḍhatvād dayitatamena kāpi sārdhaṃ prastāvaṃ vyatanuta kovidā ralīnām || 110

kovidārāś camarakākhyās taravaḥ | tatra līnāṃ bhramarapaṅktim ālokya kācit kovidā ralīnāṃ goṣṭīnāṃ prastāvam akarot_ || 110 ||

bhāti sma vallabhakaragrathitaṃ nitamba- bimbāvalambi raśanāguṇadāma pauṣpam | cārubhruvaḥ pracurasaurabhalobhalīna- śiñjānahārimadhupāvalikiṅkiṇīkam || 111 ||

kiṅkiṇyo ghaṇṭikāḥ | auṇādiko 'tra kiṅkiṇīkāśabdaḥ ‘caṅkaṇaḥ kiṅkiṇa ca’ iti || 111 ||

uttaṃsabhāgakucabandhurakaṃdharāgra- kāñcīguṇāspadavicitravinidrapuṣpāḥ | rejuḥ kuśeśayadṛśaḥ kusumāyudhasya sugrīṣmakeṇa racitā iva hetiśālāḥ || 112 ||

hetiśālā jayanaśālā iti prasiddhāḥ || 112 ||

atha vipinavihāraklāntijanmānanendu- grahagaṇaparivārasvedabindūdgamānām | śriyam iva parimārṣṭuṃ śvāsasaugandhyalubhya- nmadhukarakulapakṣair vījyamānāḥ salīlam || 113 || 1. ‘sahelam_’ kha.

113 ||

kallolānilaloladolanalalaccāmīkarāmbhoruhāṃ ratnakṣodaparāgasaikatabhuvaṃ maṅktuṃ surasyandinīm | preyobhiḥ samam ucchvasatkucabharaklāmyannitambasthalī- līlāmantharacāracārucaraṇanyāsā natāṅgyo yayuḥ || 114 || 2. ‘mantharacaṇḍa’ ka.

taraṅgavāta eva caṭulaṃ dolanaṃ dolā yeṣāṃ tāni vikasanti svarṇapadmāni yasyām_ | ratnacūrṇam eva dhūlis tatpradhānās taṭabhuvo yasyām_ | syandinī nadī || 114 ||

(yugalakam_)

iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye kusumāvacayavarṇano nāma saptadaśaḥ sargaḥ |

iti rājānakajayānakasūnor alakasya kṛtau haravijayaviṣamapadoddyote saptadaśaḥ sargaḥ ||