ṣoḍaśaḥ sargaḥ|
tasminnudīrya vacanaṃ jitameghagarja-
māvarjitorjitabhaṭaṃ virate śikhaṇḍī|
sphūrjatsabhābhavanabhittipuṭopagūḍha-
parjanyadhīraninadapratinādasāndram||1||
vaikakṣyakasphuradudaṃśuvicitraratna-
dāmābhirāmatanurindukaracchaṭācchaḥ|
tiryaṅniṣaṇṇakuliśāyudhakārmukāṅka-
nīhāraśailasadṛśīṃ śriyamādadhānaḥ||2||
preṅkhatphaṇāmaṇiśikhāruṇitopavīta-
sūtrādhikārabhujagaḥ sadasīndumauleḥ|
nirdhautadhātukapilīkṛtanirjharādri-
līlāṃ dadhadvacanamitthamudājahāra||3||
(tilakam)
vidyādhipo yadanaghāndviṣato jighāṃsu-
ratyūrjitaṃ vacanamāha na vismayastat|
lokādidhakṣurakhilānayugārcirarci-
rugraṃ yadīrayati tatra kimudbhutaṃ syāt||4||
sāraṃ tathāpi gadataḥ sadasi grahītu-
marhāḥ stha yūyamadhunā vacaso mamāsmāt|
ambhojapakṣmarajaso makarandabindu-
mādhūsarādapi kimādadate na bhṛṅgāḥ||5||
garbhīkṛtatribhuvanodaravrtiviśva-
niḥsaṃkhyavāṅmayakṛtāspadavarṇadehā|
kāpyadbhuteyamanaghā parameśvarasya
śaktiḥ sthitā pratimukhaṃ bhuvi mānvānām||6||
yasyāḥ prasādavaśato viniśemuṣāṃ naḥ
kāryārthatattvamanaghasthiti śemuṣīyam|
vaktuṃ nisargamalināmapi vācamittha-
muccaiḥ pravartayati saṃsadi candramauleḥ||7||
bhrāmyantyanargalamitastata eva moha
paṅkapratānamalinā śaśimaulinā dhīḥ|
spaṣṭīkṛte vrajatu nītipathe prasāda-
meṣā śaratsamayabandha ivāpagā vaḥ||8||
vyāpāritā nayapathena jagatyabhīkṣṇaṃ
bhāvā vrajantu mṛdavo 'pi paṭukriyatvam|
prastauti mantrakṛtasaṃskṛtirūpaveṇu-
vīṇāravo 'pi viṣamasya viṣasya nāśam||9||
satkṛtya sādhanaviviktanayānusāra-
nighnāyamānamanasaḥ samayavyapekṣaḥ|
prājyaḥ samīkarabhaso hṛdaye na me 'sti
sāndro rasaḥ kathamivāmraśalāṭuni syāt||10||
saṃhārabhānuriva ratnanidhiṃ pratāpa-
riktīkṛtāmalayaśaḥsalilaṃ ya ekaḥ|
cakre hariṃ prakaṭitātanumīnakūrma-
rūpaṃ viśṛṅkhalamakhaṇḍitamaṇḍalāgraḥ||11||
ākarṇatāṇḍavitakīrtilatālavāla-
kodaṇḍamaṇḍalabhujena natottamāṅgāḥ|
yenojjhitā yudhi dayāmṛdunā vijitya
yāthārthyamāpuramarāḥ prathitasya nāmnaḥ||12||
saṅgrāmadugdhajaladheḥ sphuṭakālakūṭa-
lekhāyamānakaravālakarālamadhyāt|
yo 'bhyutthitāṃ kumudagauraruciṃ cakāra
satkīrticandrakalikāṃ śravaṇāvataṃsam||13||
yaḥ sodabhārajaladacchavinā niśāta-
pattreṇa saṃyugamukheṣvasināpi doṣṇaḥ|
sāhāyakaṃ vidadhatā sphuṭamatrapiṣṭa
piṣṭātatāyikarikumbhabhuvorjitaśrīḥ||14||
so 'pyandhakaḥ sakaladānavacakravāla-
bhāsvatkirīṭakaṣaṇakvaṇitāṅghripīṭhaḥ|
helāvaropitanirargalavairivaṃśa-
bāhudrumo 'trabhavatāmabhiyojyapakṣe||15||
(pañcabhiḥ kulakam)
ye dānavādhipatayo mṛditā mṛdheṣu
śārṅgāyudhena kathamapyaparaḥ sa tebhyaḥ|
yenetaraḥ śamamupaityanalo jalena
bhasmīkarotyakhilamevatadaurvavahniḥ||16||
naikatra śaktiviratiḥ kvacidasti sarve
bhāvāḥ kriyāsvapariniṣṭhitatāratamyāḥ|
ākalpamaurvadahanena niṣīyamāna-
mambhodhikaculakena papāvagastyaḥ||17||
nirjitya yānvijayinaḥ suralokapālā-
ndaityānasau sakaladinaprabhutāmanaiṣīt|
pratyekamājibhuvi te 'pi ca dṛṣṭasārāḥ
sarvābhisārarabhassena surairajeyāḥ||18||
yatrābhiyogacalite divi devajāta-
mālokya sainikadhutāvanidhūlilekhāḥ|
sasmāra lanaśaśimauliśilīmukhāgni-
saṃdhukṣitatripuradhūmaśikhāvalīnām||19||
dadhre raṇeṣu kanakāṅgadabandhanirya-
daṃśucchaṭāpaṭalavicchuritāsiyaṣṭiḥ|
doṣṇāpi yasya bhuvanakṣayadakṣaśikṣa-
śauryātirekanikaṣopalapaṭṭikā śrīḥ||20||
abhyetya yatra caraṇānatibhāji gāḍha-
mānagrahā ripucamūḥ pratipattimūḍhā|
prāptādhikakṣatiraceṣṭata naiva kiṃci-
dāplāvitakṣititalaṃ paramastramaujjhīt||21||
pratyagramauktikaśilāśabalānyavāpya
velātaṭānyaviralaṃ bahudhā vibhinnā|
kīrtiḥ śaśāṅkakalikādhavalā taraṅga-
lekheva dugdhajaladheḥ śriyam āpa yasya||22||
saṃtrāsakampataralāḥ kurute vipakṣa-
sīmantinīrasmṛtigato 'pi sa kālaketuḥ|
yasyācchamauktikanibhena vahanti sindhu-
velāvanāni phalitāmiva kīrtivallīm||23||
(pañcabhiḥ kulakam)
yasya prayāṇasamayeṣu camūvimarda-
nirdāritāvanitalotthitadhūlidigdhāḥ|
śyāmībabhūvurahitonnatavaṃśadāha-
lagnapratāpaśikhidhūmacitā ivāśāḥ||24||
ālanabhagnakarajāṅkurayā nṛsiṃha-
mūrtau navābhra iva garjati śārṅgapāṇau|
yasyotthitābhinavaratnaśalākayeva
lakṣmīruraḥsthalavidūrabhuvā vidadhre||25||
saṅgrāmakānanatale 'vacikāya yasya
cārūṇi kīrtikusumāni ripudrumaughāt|
vispaṣṭahetiparighaṭṭanatāghoṣa-
māṇikyanūpurakalakvaṇitā jayaśrīḥ||26||
yaṃ prasthitaṃ samanugantumivāripakṣa-
lakṣmīsvayaṃvarapatiṃ tarasā viceluḥ|
uddāmanāgakaṭakā dharaṇībhṛto 'pi
senāvamardaparikampitabhūmipīṭhāḥ||27||
śakyo hiraṇyakaśipostanayaḥ sa jetu-
māyodhane kathamiva triṇatāṃ dhunānaḥ|
keyūraratnarucivandanamālikā'nka-
pīnonnatāgrajayatoraṇabāhudaṇḍaḥ||28||
(pañcabhiḥ kulakam)
yasminparisphurati saṃyugamūrdhni dūra-
mairāvaṇasya gadaśūnyakalolalagnāḥ|
śaṅke śilīmukhagaṇāḥ kvaṇitacchalena
śauryātirekamatigāḍharujo nininduḥ||29||
dikcakravālaghaṭitāskhalitapratāpa-
tīvrātapavyatikarādiva mandireṣu|
bandīkṛtorjitavipakṣanitambinīnāṃ
śyāmāyitaṃ sapadi yasya mukhendubimbaiḥ||30||
romāñcakaṇṭakitatāṃ jaḍimānubandha-
mudvepathutvamatiloṭhanatāmadārḍhyam|
yasyātatāyiṣṭatanā yudhi nāyakasya
saṃdarśanādabhṛta saṃbhramaloladṛṣṭiḥ||31||
yenāvakīrṇamukharāgraśarāgniheti-
tigmatviṣā vidadhire dayitāyamānāḥ|
pluṣṭārikānanatalotthitasāndradhūma-
dhammillabandharacanārucirā ivāśāḥ||32||
śrautaḥ sa mantra iva kasya na śāntihetu-
rāyodhane 'pratirathastimirāsuraḥ syāt|
śokena yasya malinānukaṃroti manda-
saṃcāriṇī ripuvadhūrnijadṛṣṭimeva||33||
(pañcabhiḥ kulakam)
yasyābhiṣeṇanarasapravaṇasya pīna-
hastārgalāntaravinirgataśīkaraughaiḥ|
mārjanti yattajayanāgaghaṭā ripūṇāṃ
digbhittilagnamiva kīrtisudhopalepam||34||
saccakranandakatayāniśamanvitasya
yasyāhaveṣu juhuṣāṃ śriyam āśu dīptām|
śaureḥ samagrajagatāmiva saṃkṣayeṣu
kukṣaumatāsthitiralakṣyata śāśtravāṇām||35||
voḍhuṃ kṣamā dhavalamasya yaśaḥpravāha-
mekā na bhūriti vicintya sa yasya dhātrā|
jyotsnānibhena nabhasi sphuṭaśeṣabhoga-
cchāyāchalādavanitāluni ca vyabhāji||36||
līnadvirephavidhutāmarapuṣpakarṇa-
pūrotthito 'nadhigataprasaro 'pi dūrāt|
yasyā"u kesararajonikaraścakāra
nākādhipasya kaluṣatvamabhīkṣṇamakṣṇām||37||
śakyaḥ kathaṃ sa śatadundubhirāhaveṣu
jetuṃ surairdalitasaṃdhivinirgatābhiḥ|
yasya pratāpadahanograśikhāvalībhiḥ
śaṅke bahirjvalitameva divaspṛthivyoḥ||38||
(pañcabhiḥ kulakam)
abhyeyuṣāṃ viracitāñjalibandhamurvī-
tṛṣṇā dayārdramanasā parirakṣatāsūn|
yenopatāpaśamanaikarasena khaḍga-
dhārājalaiḥ śamamanīyata śātravāṇām||39||
bhrāmyannanekaśatapattraśarārirāśi-
sevāspadāhavasarobhuvi rājahaṃsaḥ|
yo helayā ciramakhaṇḍayadūḍhaśukla-
pakṣo ripordhavalakīrtimṛṇālavallīḥ||40||
paspandire śikhariṇo 'bdhipayāṃsi dūra-
mākāśavartma paripupluvire 'nuvelam|
pusphoṭa cāvanitalaṃ balacakravāla-
mardena yasya haranṛtta iva prayāṇe||41||
pātālarandhraghaṭitāspadabhogibhoga-
vellajjaṭāvighaṭanāhitapātaśaṅkaḥ|
bhraṣṭārkacandraphaladanturadiglatāgra-
saṃśīryamāṇavikaṭāmbudapattravṛndaḥ||42||
tenāvarugṇakarakesarapakṣmaśobha-
nakṣatraratnakusumastabakojjvalaśrīḥ|
ekena kāladamanāsurakuñjareṇa
nonmūlyate na bhuvanatrayakalpavṛkṣaḥ||43||
(yugalakam)
(yugalakagarbhaṃ pañcabhiḥ kulakam)
utkhātaśātakaravālakarālabāhu-
rutplutya mattajayakuñjarakumbhakūṭāt|
mūrtāṃ ripo ruciradhautadukūlaśuklāṃ
jagrāha kīrtimiva yo yudhi vaijayantīm||44||
yasyātatāyijanatāścaraṇapraṇāma-
vailakṣyakhedajanitaṃ paripāṇḍuratvam|
vaktreṣu gopayitumākulitā bhavanti
sevāñjalisthagitadīrghalalāṭapaṭṭāḥ||45||
pārṣṇiprahāraghaṭanārabhasāvadīrṇa-
śalyāyamānavikaṭāsthiśilāvakīrṇam|
yasyāmarādhipagajo 'pi bibharti dāna-
paṅkacchaṭākaluṣakānti kapolamūlam||46||
yasya pratāpadahano dhavalaṃ nināya
vicchāyatāmariyaśaḥ pravijṛmbhamāṇam|
ullaṅghitārṇavataṭaḥ sahasā sahastra
raśmeḥ prakāśa iva śītamarīcibimbam||47||
śakto gavākṣamadhunā ka ivānubandhu-
māyodhaneṣu racitātanujālamāryam|
yatrāribhītitamasā na padaṃ vyadhāni
vispaṣṭapāṇḍurayaśaḥśaśicandrikāḍhye||48||
(pañcabhiḥ kulakam)
satkarṇikākanakapīṭhapaṭhadviriñca-
nirmuktamañcitadalaṃ harinābhipadmam|
utkhāyaḥ yaḥ karatalena surārirāja-
lakṣmyā vataṃsakapade vinidhātumaicchat||49||
saṅgrāmamārgamarubhūmiṣu tigmaraśmi-
raśmicchaṭākhacitakhaḍgamarīcikāsu|
chāyāmupoḍhajaraṭhātidṛḍhoṣmavairi-
cakraṃ na yasya yadavāpa kimadbhutaṃ tat||50||
dordaṇḍadarpadalanākulitatvamāpta-
māyodhaneṣu rabhasātpravijṛmbhamāṇam|
utsṛṣṭikāṅkamiva yo vidadhau nivṛtta-
yuddhoddhatapraharaṇaṃ pratipakṣamekaḥ||51||
yasminsamuccalati phūtkṛtavahnisāndra-
dhūmacchaṭāruṇitakāntikalāpamuccaiḥ|
śeṣaḥ phaṇāmaṇigaṇaṃ pariṇāmipiṇḍa-
kharjūrakomalamadhatta vigāḍhakhedaḥ||52||
taṃ saṃyugāgrabhuvi bhāvaya bhāvayavya(tva)-
mutsṛjya matsaramayaṃ gaṇanātha bhāvam|
unnidratāṃ sumanasāmasakṛccakāra
śauryaṃ madhoriva vijṛmbhitamāśu yasya||53||
(pañcabhiḥ kulakam)
niḥśreṇimūrjitavipakṣacamūṃ vidhāya
kīrtiṃ didṛkṣuriva dikṣu kṛtapratiṣṭhām|
yasyāruroha śaśiśubhrayaśaḥprakāśa-
saudhonnatāṃsaśikharaṃ bhujavīryalakṣmīḥ||54||
akṣmāyi yasya śithilīkṛtanāganātha-
vistāribhoganigaḍaṃ bharakharvitaṃ sat|
udvelasindhuparikhaṃ kṣitipīṭhapṛṣṭha-
mājaghnuṣībhirabhitaḥ kakubhaścamūbhiḥ||55||
yasyārikuñjarakaṭeṣu talābhighāta-
līlāvivarṇarudhiraughamalīmaseṣu|
vicchinnadānasalileṣvapi tatkalaṅka-
śaṅkākulaiściramalīyata cañcarīkaiḥ||56||
taṃ ca pratāpavaḍavāmukhavahniheti-
saṃpluṣṭadustaradurantavipakṣasindhum|
helāviḍambitahariṃ ka ivotsaheta
jetuṃ vilaṅghitajagattritayaṃ prajaṅgham||57||
(kalāpakam)
yasyātatāyidayitānayanodabindu-
saṃpātaheturaniśaṃ virarāja khaḍgaḥ|
pīnāṃsakūṭavikaṭonnatabāhudaṇḍa-
niryatpratāpaśikhidhūma ivāhaveṣu||58||
āskandalagnabalabaṃhimabhūribhāra-
namrīkṛtaṃ vidhuritasthitidiggajendram|
śeṣeṇa yasya dharaṇīvalayaṃ kathaṃci-
dutkṣiptakuñcitaphaṇānikareṇa babhre||59||
āpīnamagnajayakuñjarakumbhacīna-
piṣṭacchaṭācchuritatoyataraṅgatāmrāḥ|
yatsainikairdadṛśire jaladhestaṭeṣu
garbhīkṛtaurvadahanā iva vārivāhāḥ||60||
yasya prayāṇasamayeṣu vaśīkṛtānāṃ
vailakṣyakhedajanitaṃ paripāṇḍuratvam|
nihnūyate sapadi pādanakhāṃśujāla-
lepena śaṅkhaśucinā vadaneṣvarīṇām||61||
mandapratāpaghaṭane sati tigmabhāsi
paryastaśoṇitarasāruṇamaṇḍalāgre|
chāyādrumeṇa raṇavartmagatena tena
dūrāyatonnatibhṛtā saviśeṣamūhe||62||
(pañcabhiḥ kulakam)
vyūhaṃ samāracaya tejaya sainikaugha-
māsphālayeṣvasanamāśu vimuñca bāṇān|
bhinddhi kṣaṇātkarighaṭā dalayāśvavārā-
nācerivāṃsamiti yo 'rigaṇaṃ vyamṛdgāt||63||
māyāprapañcavivaśīkṛtavigraheṇa
yenāvalokayata eva śaśāṅkagauram|
vismāyinastridaśadānavamaṇḍalasya
daityāriṇāmṛtamivāśu yaśo 'pajahne||64||
yasyābhiyātibhavaneṣvasamāptacitra-
saṃbhārabhittipuruṣā malinībhavantaḥ|
unmīlanāvasaraśūnyadṛśaḥ samiddhāṃ
dadhyurdivāniśamiva śriyam avyavasthām||65||
nābhātikomalakapolatalārpitaika-
hastāṅgulīnakhamayūkhaśikhāvakīrṇam|
yasyātatāyiyuvaternavayauvane 'pi
bibhrajjarādhavalatāmiva karṇamūlam||66||
śakyaḥ kathaṃ sa raṇavartmani dhūmaketu-
rutsoḍhumanyasubhaṭairdṛḍhamūlabandhaḥ|
ullāsikīrtidhavalāñcitavaijayantī-
ruddhākhilāmbaratalonnatabāhudaṇḍaḥ||67||
(pañcabhiḥ kulakam)
lakṣmīlatāmakṛta yo balidānavasya
paryucchvasatsumanasaṃ phalabandhahṛdyām|
viśrāṇanāmalajalasphuṭakhaḍgayaṣṭi-
dhārānirargalanipātavirugṇamūlām||68||
śītāṃśuśubhraruci laṅghayato jaganti
yasyātmanā saha yaśo balibandhahetoḥ|
pādāravindamakarandarasāyamāna-
mandākinīsaliladhautamivodanaṃsīt||69||
vicchinnadaityapatiniṣṭhurakaṇṭhapīṭha-
vipyaṇṇaśoṇitamalīmasaśātadhāram|
pratyagraṭaṅkaghaṭanāpariṣekalagna-
paṅkacchaṭāṅkamiva yasya vibhāti cakram||70||
preṅkhannakhaprakaradīdhitipakṣmapaṅkti-
raktāṅgulīdalakulaṃ virarāja yasya|
viśvākṛteratanupāṇisarojayugma-
muttambhitārkaśaśimaṇḍalabījakośam||71||
yasyācakāsatitarāṃ pratipannaviśva-
rūpasya dīrghasaralā bahutāmavāptāḥ|
niḥśeṣaṣodaśanitambavatīsahastra-
gāḍhopagūhanarasādiva bāhudaṇḍāḥ||72||
yasyādhivārinidhi kharvitaśeṣabhoga-
śayyānirargalavivartanavibhramaśrīḥ|
helāvinirmṛditaśoṇitapaṅkagarbha-
dūrāvamagnamadhukaiṭabhaṭiṭṭibhāsīt||73||
phūtkārapāvakaśikhānikaro didhakṣu-
rākrāntakāliyaphaṇānikurumbamuktaḥ|
nirvāpitaḥ sapadi yasya śikhaṇḍamūla-
niṣyandamānayamunājalanirjharaughaiḥ||74||
yasya vyalokyata navāmbudanīlakānti-
ruttālakeśivadanāvaṭasīmni bāhuḥ|
bibhradvisārivaḍavāmukharandhralagna-
velānilāvadhutasindhutaraṅgalīlām||75||
bibhyatsa kaiṭabharipuḥ sphuṭakolasiṃha-
rūpāmavāpa vanabhūmimiva vyavasthām|
yebhyaḥ sacāmarakarāmamarādhirāja-
lakṣmīṃ mukhekṣaṇaparāṃ paramāṃ dadhadbhyaḥ||76||
kiṃ kīrtitairbahubhiratra kṛtātmabhistai-
ranyaiśca sāramidameva nanu bruve vaḥ|
śaṃsanti nītihṛdayaṃ sudhiyastadeta-
dālocyate svaparapakṣabalābalaṃ yat||77||
(daśabhiḥ kulakam)
vaktrāmṛtāṃśukiraṇāhatamapyabhīkṣṇa-
munnidrameva dadhati karapuṇḍarīkam|
lakṣmīrnṛṇāṃ matimatāmiha cittavṛtti-
māhlādayatyadhikameva nayādavāptā||78||
tattasya kaścidupayātu samīpamāśu
saṃdeśadānacaturo ditijasya dūtaḥ|
bhinnetaraprakṛtimaṇḍalakāryatattva-
bodhe yataḥ praṇidhireva ripostamāhuḥ||79||
tenodito 'pi madhuraṃ suralokakārya-
māryāḥ sa no 'surapatiḥ pratipatsyate cet|
sarvakriyāsu bhavatāṃ tadavastha eva
daṇḍastataḥ samupapāditasadvyavasthaḥ||80||
iti nayaguṇagarbhaṃ kīrtitaṃ vo mayaita-
nna mama ditisutebhyaḥ kācidastyatra bhītiḥ|
vibhurayamadhunāste kāryadolādhirūḍhaḥ
kimaparamiti tarkātītamārgaṃ na vidmaḥ||81||
ityāndolitaratnakuṇḍalaśikhānirghṛṣṭagaṇḍasthalo
vākyaṃ nītipathānusāri rabhasāduktvā vyaraṃsīdasau|
śaṃsansādhviti tacca kālamusalaṃ dūtye niyojya dviṣaḥ
śūlī bandijanābhyudīritajayajyotkāramaujjhītsabhām||82||
iti śrībālabṛhaspatyanujīvino vāgīśvarāṅkasya
vidyādhipatyaparanāmno mahākave rājānakaśrīratnākarasya kṛtau
ratnāṅke haravijaye mahākāvye dūtasaṃpreṣaṇanirūpaṇo nāma
ṣoḍaśaḥ sargaḥ|