caturdaśaḥ sargaḥ|
itthamuktavati tatra bhāratīmunmiṣatsmitakapolamaṇḍalaḥ|
vaktumārabhata saṃsadi kramātpuṣpahāsa iti nītiniṣṭhuram||1||
śaktimaskhalitasarasauṣṭhavāṃ kṣmādharoddalanadurdharāṃ dadhat|
svāmitāmapi gato garīyasīmandhakāritanayo na yo 'bhavat||2||
durdharaprasaratāmupeyivānaprathiṣṭa bhuvanāntareṣu yaḥ|
aurvavahniriva hetimaṇḍalīsaṃtatakṣapitavāhinīpatiḥ||3||
yasya durgatavipakṣasundarīmaṇḍalena bibharāṃbabhūvire|
rodanāruṇitalocanotpalacchāyakuṅkumavilepanāḥ stanāḥ||4||
bhāsvato 'pyavihitāṃ karasthitiṃ diṅmukheṣvadhikamāśu kurvataḥ|
yasya maṇḍalamalaṅghyamuccakai rāhavīyamagamanna viplavam||5||
nāpa bhūtimalanātkadarthanāṃ tāpayogamagamanna ca kvacit|
yaḥ suvṛttavimalasthitirdadhau ratnadarpaṇa ivādhikāṃ śriyam||6||
yasya cāruguṇamauktikotkarabhrājitendukarapāṇḍuracchaviḥ|
hārayaṣṭiriva kīrtiruccakairmaṇḍanatvamagamatparaṃ diśām||7||
yasay ca prasṛtayā nirargalaṃ kaiṭabhadviṣa ivonnatiśritaḥ|
viṣṭapatrayamalaṅghyatāñjasā dūramaskhalitayā yaśaḥśriyā||8||
candradīdhitivipāṇḍunā yaśaḥpuṣpasaṃbhṛtibhareṇa bhūriṇā|
laṅghitā bhuvanakānanodare yasya nemurakhilā harillatāḥ||9||
stheyasī bhuvanamandirasya digbhittibhāgaracitāñcitasthitiḥ|
cāruṭaṅkaghaṭanā babhautarāṃ yasya kīrtimaṇisālabhaṅjikā||10||
tasya tatra vadato vacastadā nirgatā daśanaraśmimaṇḍalī|
jāhnavīva śaśipāṇḍurekatāṃ prāpa śaṃbhugalakāntisindhunā||11||
(daśabhiḥ kulakam)
kruddhakālamusalādikīrtitaṃ saṃprahāranayagocaraṃ vacaḥ|
ūrjitaṃ ca madhuraṃ ca śuśrūvānvaktumabhyadhikamutsaheta kaḥ||12||
kovidāracitaśobha uccakairatrasannihitanīlakaṃdhare|
droṇakāka iva niṣṭhuraṃ sadaḥkānane kimapi raumyalajjitaḥ||13||
śuśruvānapi gaṇādhipoditaṃ vākyametadahamakṣamaṃ bruve|
śrotrarandhragatakekikūjitaḥ kiṃ virauti paruṣaṃ na maukuliḥ||14||
tattathāpi jaḍatānurodhataḥ śatruto 'tha yudhi bibhyatā mayā|
nītivartmarabhasādutoditaṃ śrotumarhatha malīmasaṃ vacaḥ||15||
na krudho 'vasara eṣa sāṃprataṃ gāḍhamāndhyagatamo nṛṇāmasau|
dṛśyatāṃ gaṇapate 'nyayā dṛśā kāryametadatisaṃkaṭe sthitam||16||
tīkṣṇatāmavihatāṃ dadhānayā bhedapāṭavajuṣā yudhi dviṣām|
sādhayantyamalayā dhiyonnatāḥ kṛtyapakṣamathavāsidhārayā||17||
yasya nāmni sahasābhyudīrite saṃbhramajvaraparigrahākulāḥ|
bibhrati sma virasatvamānanaiḥ śoṣitauṣṭhapuṭatālavaḥ surāḥ||18||
sapratāpamatitīvratānvitaṃ chāyayaiva surarājamaṇḍalam|
yaścakāra parihīnamojasā bhānubimbamiva siṃhikāsutaḥ||19||
prāptamandhamavamṛdya tāpitaṃ yaḥ karasthitimupāgataṃ kramāt|
ātmadarśamiva vidviṣāṃ vyadhānmaṇḍalaṃ mukhavilokanakṣamam||20||
saṃyugeṣu śaśiśubhramuccakaiḥ sādhuśabdamukharīkṛtāmbaram|
yaśca śaṅkhamiva kaiṭabhaṃ dviṣansaṃdadhau karatalāśrayaṃ
yaśaḥ||21||
tādṛśe 'pi suravairiṇīdṛśaṃ spaṣṭamagrahaṇameva bibhratām|
brūta kiṃ nu bhavatāṃ vibhāvyate dhairyametaduta jāḍyajṛmbhitam||22||
(pañcabhiḥ kulakam)
sādhyavastuṣu na sāmapūrvakaṃ sādhanaṃ na khalu śasyate budhaiḥ|
bibhrato bhavati dhīrakopatāmānanaṃ prathamamunmiṣatsmitam||23|
kṛtyavastu nipuṇāṃ prasādhayadviplavodayadaśāvinākṛtam|
viddhi bhedagahanairavasthitaṃ tacca saṃkalitapañcabhaktikam||24||
kṛtyapakṣamakhilaṃ vicinvatāṃ sādhanāṅgavacanānudāhṛteḥ|
dṛśyate purata eva mantriṇāṃ vādināmiva viparyaye jayaḥ||25||
mohaviplutadaśaṃ pravartitasvedabindupulakāṅkurotkaram|
vidviṣāṃ haratu mantra eṣa vaḥ kṣveḍamāpyamiva darpavibhramam||26||
darśitāvayavapañcakaṃ kramāttatkaṇavratavineyavibhramāḥ|
durjayorjitavipakṣanirjaye vākyamañcitadhiyaḥ prayuñjate||27||
sādhayadbhiravirugṇamīpsitaṃ śāstrahetubhiriva trilakṣmabhiḥ|
jṛmbhitaṃ jagati yairanargalaṃ vairibhiḥ pratidiśaṃ divaukasām||28||
visphuranmaṇikarālamūrdhatāṃ bibhratāmatanumecakatviṣām|
bhogināmiva na daṇḍaghaṭṭanā nopaghātaghaṭanāya vidviṣām||29||
(yugalakam)
ārirādhayiṣuṇā vṛṣadhvaje yena tīvratapasi sthitātmanā|
andhakāra iva śītarociṣā dhūmarāśirakṛśaḥ purā pape||30||
saṃyugeṣu hṛtajīvitāñjavājjīvayanditibhuvo 'pi vidyayā|
so mṛtapratinidhitvamīyivāṃścintya eva bhṛgunandano 'pi vaḥ||31||
(yugalakam)
āyateṣu hṛdayeṣu śemuṣī mandimānamadhunābhyupāgatā|
brūta dīpakāṃśakheva kiṃ nu vo lakṣyate rabhasaghūrṇanākulā||32||
saṃkaṭeṣvadhikameva dhīmatāṃ visphuranti nanu mantraśaktayaḥ|
vyāptavatsu timireṣu diktaṭānunmiṣantyahimadīdhititviṣaḥ||33||
yūyamāhavarase vyavasthitāḥ saprabhāvamapi vīryamatra vaḥ|
cintyatāṃ nanu vipāka īdṛśe kṛtyavastuni yato bhavedguṇaḥ||34||
avyapāyaphalasādhanāspadaṃ kṣmābhṛtāṃ ciramanujjhitakramaiḥ|
maṇḍalaṃ jagadivartubhiḥ sphuṭaṃ ṣaḍbhireva parivartyate guṇaiḥ||35||
cañcalatvavirasāvisaṃvadatsvāśayānuguṇavṛttitāṃ gatāḥ|
mūḍhamārgarabhasāhṛtāḥ sphuṭaṃ na śriyo 'pi bahu manvate patīn||36||
saṃprati praguṇarūpamucchvasatsaṃprahārarabhaso manorathaḥ|
nītivartma viṣamīkaroti vaḥ kṣuṇṇametadabhito mahājanaiḥ||37||
hrādaheturadhikaṃ raṇeṣu vo yadyapi kvacana bhīmadarśanaiḥ|
nojjhitā sajalameghamecakaiḥ kīrticandanalatāsibhogibhiḥ||38||
yady apīndukarakomalacchaviḥ kīrtir apratimarūpatāṃ gatā|
kātarasya gaṇanātha hāriṇī nākalokalalaneva durlabhā||39||
mandamārutasalīlaghaṭṭanā mañjulakvaṇita dhāratāṃ gatāḥ|
saṃyugārthamiva yadyapīha vaścodayanti karavālayaṣṭayaḥ||40||
āhatastanataṭārisundarīkranditena jayaśabdaghoṣaṇāḥ|
saṃprahāradharaṇītalotthitai reṇubhiśca paṭavāsapāṃsavaḥ||41||
khaḍgakṛttabhaṭakaṇṭhamaṇḍalairnimalāśca maṇihārayaṣṭayaḥ|
caṇḍamārutarayapravartibhirgṛdhrapakṣadhavanaiḥ prakīrṇakāḥ||42||
ghātamūrcchitabhaṭānanāsṛjā nāgavallidalarāgasaṃpadaḥ|
baddhasaṃmadaśivopagūhanairgāḍhabhīruparirambhavibhramāḥ||43||
śokadīnaruditāśrubindubhirhlādabāṣpajalaśīkarotkarāḥ|
pretasainikajanānakāravaiḥ saṃprahārajayadundubhisvanāḥ||44||
chāyayā śakunimaṇḍalotthayā chattradhāraṇaviḍambanakramāḥ|
pheravānanagatāntramaṇḍalīdāmabhiśca jayamaṅgalastrajaḥ||45||
nīlanīrajadalojjvalānanairmārgaṇaiḥ smaravilāsaśekharāḥ|
bāṇabhinnakarikumbhamaṇḍalīmauktikotkarakaraiḥ smitodgamāḥ||46||
saṃyugaśramajalacchaṭākaṇairmohanā viralavāribindavaḥ|
hetibhinnabhaṭadehamaṇḍalīśoṇitena haricandanadravāḥ||47||
saṃsthitāplavanavārisaṃcayairucchaladbhirabhiṣekavipruṣaḥ|
duḥkhadainyaparidevitākṣarairmandramaṅgalamṛdaṅganiḥsvanāḥ||48||
saṃprahāramukhadīrghanidrayā pratyupaḥsamayabodhavibhramāḥ|
vairibandinigaḍaiḥ saniḥsvanaiḥ sāravā nijapuraṃdhrinūpurāḥ||49||
saṃyugeṣu hatabandhusaṃhatestattathāpi bhujavīryaśālinaḥ|
āsthitasya tarasā jayaśriyaṃ brūta yadyadhibhuvo na dūṣitāḥ||50||
(trayodaśabhiḥ kulakam)
āyudhāni vividhāni santi vaḥ pīvarā bhaṭajanasya bāhavaḥ|
kāryamohatimirāvabodhinī durlabhā tu matidīpikā nṛṇām||51||
dārḍhyaśāliguṇanītiśṛṅkhalābandhasaṃyatapadāmanargalam|
stheyasīṃ vidadhatīha paṇḍitāḥ strīnisargataralāṃ nṛpaśriyam||52||
sāṃkhyayogapariniṣṭhitātmatāṃ jñātasattvapuruṣāntaro dadhat|
nūnameti na vikāraviplavakleśaleśaghaṭanāṃ vivekabhāk||53||
muhyate ya iha kṛtyavastuni jyotirakṣatanayātmakaṃ dadhat|
andhakūpakuhare parisphuṭaṃ dīpradīpakakaraḥ patatyasau||54||
vidviṣatyatulitoruvikrame vikrameta sahasā na nītimān|
ko nu saṃśaitapannage karaṃ vāmalūcavivare vinikṣipet||55||
mantrayuktigahanaṃ pramāṇatāṃ sāmabhedakṛtasauṣṭhavaṃ dadhat|
śrautamāgamamivātivartituṃ kaḥ kṣameta nayaśāstrasaṃgraham||56||
saṃrambhaḥ praśamamupaitu vo 'tra
helāniṣpiṣṭasphuṭakaṭakāccharatnabandhaḥ|
mā smaitatsurasuravairiṇāṃ virodhe trailokyaṃ
sakalamakāṇḍabhaṅguraṃ bhūt||57||
nandantu nandanavanāvanivīthikāsu
līnāliyūthaśabalīkṛtayūthikāsu|
sārdhaṃ surāsuragaṇāḥ kadalīdalorū-
doḥkandalīvalitapīvarakaṇṭhabhāgāḥ||58||
puṣpaughavarṣamamarapramadā mudā ca
muñcantu śāntasuradaityavirodhahṛṣṭāḥ|
mandāradāmavigalanmakarandabindu-
saṃdohadohadanadatsamadadvirephāḥ||59||
uḍupathamaṇḍalaṃ bhavatu mā śuciravinipata-
ddinakarakhaṇḍacaṇḍacaḍulīnibiḍatarataḍit|
diśi diśi mā kṣumañjaladhayaḥ piśunitasamarāḥ
pracuravikīrṇaratnapaṭalīśabalataṭabhuvaḥ||60||
iti śrībālabṛhaspatyanujīvino vāgīśvarāṅkasya
vidyadhipatyaparanāmno mahākave rājānakaśrīratnākarasya kṛtau
ratnāṅke haravijaye mahākāvye puṣpahāsanayopanyāso nāma
caturdaśaḥ sargaḥ|