||śrī gaṇeśāya namaḥ||

iti sthirārārtivirodhaniścayām udīrya vācaṃ virate gaṇādhipe| smitacchaṭābṛbitahāradīdhitis tato ṭṭahāso vyavaladvivakṣayā||1|| arātimattadvipakumbhamaṇḍalīvipāṭanotthāmalamauktikāvaliḥ| kṛpāṇalagnā vidadhāra yasya sā| tadacchadhanvājalabudbudaśriyam_||2|| vitenivāṃso py avilaṅghyarūpatām anekasaṅkhyā dadhato napāyatām_| hareṇa kalpā iva yena kālatām upeyurṣānāyiṣata dviṣaḥ kṣayam_||3|| dadhaty abhīkṣṇaṃ dhavalāni bhūyasīṃ digantaravyāpinirargalāṃ śriyam_| raṇeṣu nirjitya balāni vidviṣāṃ yaśāṃsi yena prathayāṃ babhūvire||4|| dadhat sadāśoṇitapānaśauṇḍatāṃ kṛtābhiyogo bahulakṣapāṭane| babhūva yasyātanudantamaṇḍalaḥ kṣayāya kaukṣeyakarākṣaso dviṣām_||5|| subandhurāmodamanoramāṃ śriyaṃ sphuraccharārau yudhi yodhikāṃ dadhat_| nirāsa sainyaṃ tarasā suradviṣām iṣīkatūlaṃ śaradīva mārutaḥ||6|| yaśas suvṛttasthiti yena nirmalaṃ samudvahad darpaṇamaṇḍalaśriyam_ puran dhriniśśvāsasamīraṇāhataṃ malīmasacchāyamakāri vidviṣām_||7|| raṇājirakṣmākalaśīkṛgataṃ javātkramojjhitas sannasahāya eva yaḥ| arātilokaṃ mathitaṃ sahasradhā cakāra daṇḍāhatam apy agorasam_||8|| śriyaṃ dadhānaṃ caturaśratāśrayām anīkapattyaśvirathadvipākulam_| vipakṣamāviṣkṛtasandhivigrahaṃ tathāpi naṣṭāpadam eva yo vyadhāt_||9|| vikāsayan kīrtikumudvatīṃ kṣaṇād vilocanānandakaraḥ kalāspadam_| sarūpabhāve py aparājayakṣmatāṃ dadhan mṛgāṅkaṃ viśinaṣṭi yo guṇaiḥ||10|| anekapakṣmāhitasaṅgarājitaṃ śriyaṃ dadhānaṃ vikaṭāṃsamujjvalām_| babhāra sadrāgimacārutārakaṃ prakeṣṭayor yaś ca dṛśor iva dvayam_||11|| upeyuṣonmūlanadakṣatāṃ kṣaṇāt kṣayānileneva vipakṣatāṃ gatā| kṣamābhṛtāṃ yena tatiḥ prasarpatā prakampitāsannavadhāturājitā||12|| kareṇa cakraṃ dadhad ujjvalena yaḥ purandarasyāpy abhimānam ākṣipat_| raṇājiraṃ svargam ivātanodbalād apārijātaṃ puruṣottamo yathā||13||

kulakam_||

apakramārambhavijṛmbhitādhikaprakopaniṣthūtaśiraḥślathāspadam_| yathāpradeśaṃ viniveśanecchayā kareṇa māṇikyakirīṭam utkṣipan_||14|| urassthalīvisphurad aśmagarbhasphurat prabhāmaṇḍalahārivigrahaḥ| dadhat trimārgāsalilāvagāhanāprasaktaśevālasurādvipaśriyam_||15|| sphuraj jayaśrīmaṇisālabhañjikāviśaṅkaṭastambhabhujas savibhramam_| viveṣṭamānoragabhīrubhīṣaṇāṃ vitarkajihmākṣitim utkṣipanbhurvam_||16|| sa bhāratī bāṅmayakalpapādapasphuratpratānojjvalaratnamañjarīm_ nināya niryaddaśanāṃśukesarāṃ sabhāṅganāyāś śucikarṇapūratām_||17||

cakkalakam_||

viśuddhavarṇojjvalahaṃsasaṃhatiḥ prasādagāmbhīryaviśeṣaśālinī| manoramā tasya mukhaṃ sarasvatī vasundharāpīṭham iva vyabhūṣayat_||18|| girānayā prastutam etad īdṛśaṃ tavāryakāryaṃ bahu manyate na kaḥ| mṛṇālavallikurasumaṃ tanoti tatkaroti lakṣmīr api yan niketanam_||19|| vaco tra sarvasya manoramaṃ bhavānyad abhyadhāt tat na ka eva vismayaḥ| yato bhavaty eva vivekaśālināṃ vipaścitāṃ prātijanīnavākyatā||20|| atas tvayātyūrjitasattvaśālinas samantabhadre pi vacasyudīrite| mamāvakāśo sti na vaktum ity avanbrave tathāpy āśritakāryagauravaḥ||21|| ayaṃ jaḍo smātkuta eva nītimadvaco bhyudetīti na kalpanā kṣamā| kimaśmano tyantamalīmasātmanaḥ suvarṇam akṣuṇṇaguṇaṃ na jāyate||22|| matārthatattvapratipattihetutāṃ matiḥ kutaste timirānuṣaṅgiṇī| prabhāsamānā gaṇanātha dṛśyate na ratnadīpasya śikhā sakajjalā||23|| abhīkṣṇamantaḥ sarasāny atandritās suvṛttatāṃ bibhrati nītiśālinaḥ| vitanvatī saṃsadi kūrcakesaradrumāḫ phalānīva vacāṃsi sūrayaḥ||24|| samīkṣya samyag bhuvi kṛtyavastu yaḫ pratīkṣate deśabalādisādhanam_ bhavanti tasyānapacāracāravaẖ kriyāviśeṣā na vipākanīrasāḥ||25|| akhaṇḍitātyūrjitavīryasampado nirākariṣṇostarasā yudhi dviṣaḥ| pramādadoṣānupaghātasusthitaṃ na nītitulyaṃ kṣamam asti sādhanam_||26|| prayuktasaṃskāragurur garīyasīṃ vrajaty avasthaiva nanu pratīkṣyatām_ bhajaty upāvarjitatailasekayā nahi pradīpo daraśayā vinā sthitim_||27|| malīmasācāranirargalasthitir akhaṇḍam anyanmalinaṃ prakalpate| tamoghane veśmani tiṣṭhato niśaṃ vrajaty aśeṣaṃ jagad andhakāritām_||28|| suradviṣāṃ nihnumahe na pauruṣaṃ na ca praśaṃsāṃ tanumastathātmanaḥ| nirūpayāmo nayavartma kevalaṃ yathābhilāṣās tu parasya vṛttayaḥ||29|| sabhūmilābhaṃ śubhavartirelekhayā manoramaṃ maṇḍalakāryam askhalat_| aśeṣam unmīlayati kṣamābhṛtāṃ vicitrarūpā nanu nītitūlikā||30|| yathākhiladravyagatāṃś cikitsakā viviñcate pañcarasādikānbudhāḥ| tarthaiva mantrāśrayatām upeyuṣaḥ sunītibhājo vayavāñjigīṣavaḥ||31 apārthatādoṣaparītam akramaṃ sasaṃśayaṃ sandhivihīnatāṃ gatam_| na deśakālādivirodhi paṇḍitaiḥ praśaṃsyate kāryam asādhukāvyavat_||32|| bibharti pāriplavatām udanvatas tadūrmisaṃsargakṛpām ivotthitā| avaimi lakṣmīr nayavartmanāgatā sthiraṃ nibadhnāti nṛpe padaṃ punaḥ||33|| amandarabhrāntikadarthitodadhir viluptadevāsuramanthasambhramaḥ| sacetasaẖ kasya na vallabhor jane| nayaprokāro para eva vā śriyaḥ||34|| na nītiśāstropaniṣatsu pañcadhā sthitiṃ jahāty eṣa paraḥ pumān iva| pradīpitoddāmaviparyayagrahair nirūpito mantra iha praṇetṛbhiḥ||35|| vibhajyamānā bahudhārthakovidais sasaṃśayagranthiramantharātmabhiḥ| mṛṇālavallīva guṇānvihāya kiṃ vyanakti nītir jaḍasaṅkaroddhṛtā||36|| upāyaśūnyās taravaḥ kṣitāviva kriyāviśeṣā vyabhicāriṇaḫ phale| ta eva nūnaṃ niyamena bhūbhṛtāṃ phalanti kalpadrumavannayāśrayāḥ||37|| sthirābhyupāyaprakaṭārasañcayaṃ dadhad virūḍhakramakālanīmitām_ pravartitaṃ maṇḍalanābhibandhanaṃ na kāryacakraṃ kvacanāvaśīryate||38|| vyapekṣate bāhubalaṃ jigīṣataḥ sunītim ākrāntajagattrayaṃ dhruvam_ rathāspadaṃ cakram ivāśvamaṇḍalīṃ vivasvato merutaṭīvivartinaḥ||39|| upāyasopānaparamparām imāṃ yathākramaṃ yo dhirurukṣur āśritaḥ| sa nūnam uccaiḫ pada eva nītimānkṛtapratiṣṭho na cirād vibhāvyate||40|| narendralakṣmīrucitair upakramaiẖ krameṇa tais tair gurubhiḫ prasādhitā| nayātmadarśe guṇadoṣadarśanasphuṭāvadhānā vyavalambatām iyam||41|| prakāśa eva praviluptadarśano gataḥ kṣaṇād ghuka ivāndhyaviplavam_| na jātu kālaṃ matidurvidho jano bibharti sāmarthyam udarkam īkṣitum_||42|| vivṛṇvatāṃ maṇḍalasandhivigrahavyapāśrayāẖ kāryagatīr anekaśaḥ| kriyābhicārā na bhavanti dhīmatām anukramāpakramayogacintayā||43|| virūḍhamūlasya nayānusāriṇas sakośadaṇḍopacayasya bhūpateḥ| kuśeśayasyopaciteva karṇikā bibharti lakṣmīḫ pariṇāmapīnatām_||44|| vicinvator thaṃ nijamaṇḍalāśrayaṃ guṇānupāyāṃś ca nṛpasya śaktayaḥ| na deśakālānavadhāraṇakramāt samutpatiṣṇorupayānti bṛṃhaṇam_||45|| madacchadārdrīkṛtagaṇḍamaṇḍalīnilīnabhṛṅgadvipayūthadāriṇaḥ| nimajjato vāriṇi tīvratejasaḥ saṭā vilumpantir jhaṣā harer api||46|| atītakālasya tad atra jṛmbhitaṃ tapasyamāse kariṇo pi durjayaḥ| nidhāghakāle mukhalāṅgalaś śunām api vrajaty eva nikāryatāṃ yataḥ||47|| samudvahan nakṣatapakṣabhūmibhṛdvibhedadakṣām iva śaktim āyatām_| mayūraketur vadanair ivādhikaṃ vibhati ṣaḍbhir nayavistaro guṇaiḥ|48|| vibhāvyamānāsanasandhisaṃśrayāḥ guṇāḫ pariṣkāramaṇisphuṭatviṣaḥ| tad adbhutaṃ yad vithayaiṣiṇāṃ śriyaṃ prasādhayanty apravimṛṣṭavigrahāḥ||49|| kṣakṛtāspadā sāragurus sthirātmasu kṣameva dikkuñjaravigraheṣvasau| jahāty upāyeṣu caturṣu na sthitiṃ dṛḍhīkṛtā nītir iha kṣamādharaiḥ||50|| upeyasiddhyai bhavatāṃ matis sthirā pravartate ced anupāyasādhanā| avaimi ṣāḍguṇyavicāragocaraiẖ kṛtaṃ tatas samprati nītiśāsanaiḥ||51|| kṣamā bhavantaḥ kṣayasūryatejaso jagattrayasya sthitisargasaṃhṛtīḥ| vidhātum ekākina eva līlayā na mūrtibhedā iva kiṃ svayambhuvaḥ||52|| jigīṣatāṃ maṇḍalasandhivigrahavyapāśrayā¯¯ vihāya vaḥ| na yuddhasaṃrambharasāt tathāpi tu kṣamāḫ parāmārṣṭum ihāṃsabhittayaḥ||53|| avaimi daityānsamareṣu durjayānbhujāṃś ca vo diggajahastapīvarān_| ato tra yukto naya eva saṅkaṭe jalaplave setur ivottitīrṣatām_||54|| kim asty ataś śaṃsata vācyaviplutaṃ yad abhyupāyeṣu pareṣu satsv api| dviṣatsu carcā bhavatām apīdṛśī pracaṇḍadaṇḍaikarasā vijṛmbhate||55|| upāya eveti ca daṇḍa eṣa no na nītivṛddhair avalambanīkṛtaḥ| tathāpi kārye tra guruṇyupekṣituṃ na yuktarūpo bhavatām anukramaḥ||56|| niruddharandhraprasaraślathībhavajjaḍapraveśasthir asandhisusthitāḥ| na kāryasindhor iha tārayanti kaṃ plavā ivoccaiẖ kṛtinas sakarṇakāḥ||57|| dahanti kalpapralayeṣu bhānavo jaganti velāṃ ślathayanti sāgarāḥ| na tādṛśo sausamayo sti yatra vā sthitiṃ vibhindanti ruṣā bhavadṛśāḥ||58|| avaimi nūnaṃ na ca bhartur ājñayā vinā samarthās stha ripor vinigrahe| jagat pariplāvayituṃ na vīcayaḥ kṣamāstaṭasthasya kadācid ambudheḥ||59|| pravartamānāṃ pratipattum arhatha tridhā vibhinnāmata eva śūlinaḥ| hitāya śaktiṃ kṛtaviṣṭapatrayasthitiṃ purārer iva nāgakanimnagām_||60|| ayaṃ prabhuẖ karmasu daivamānuṣaprabhedarūpeṣv avilaṅghyatāṃ dadhat_| acintanīyo nayatattvacintakair manīṣibhir daivam iti sma kathyate||61|| jigīṣatāṃ dordrumadarpavibhramā dhiyā ca ṣāḍguṇyavicāragocarāḥ| na yānty upāyapratipattaye dṛḍhāḥ parāṅmukhe smin phalabhāgyatāṃ kvacit_||62|| yad ānuguṇyaṃ bhajate jagaty asau tadā tadātvāyatiṣu sphuṭaṃ nṛṇām_ kriyāviśeṣās sakalāḫ pravartitā viparyayeṇāpi hi siddhihetavaḥ||63|| pratīyamānāḫ prakaṭaṃ pṛthag janair viruddharūpā iva kasya vismayam_ amuṣya ceṣṭā janayanti noccakair viluptamohapratipattigocarāḥ||64|| ihaiva niśśvāsagamāgamakriyāprabandhabhedena carācarātmani| vrajaty abhīkṣṇaṃ pratibandhavṛttitām aśeṣaviśvodayasaṃhṛtikramaḥ||65|| amuṣya garbhīkṛtasāgarodarapratiṣṭhaśeṣoraga eva śāyinaḥ| muradviṣo nābhisarojakarṇikāviṭaṅkapīṭhas samabhūc caturmukhaḥ||66|| abhīkṣṇam aṣṭābhir amuṣya mūrtibhir vibhor avaṣṭabhya jaganti tasthuṣaḥ| bhinnatti māyīyamathāṇavaṃ nṛṇāṃ smṛtis tathā kārmaṇam āśu bandhanam_||67|| sthiraplavānuplavaviplavojjhitā nije tu tiṣṭhanty aṇavas tadātmani| durantamāyīyavivartabhedinī yadāsya śaktis svabhuvo vijṛmbhati||68|| amuṣya tattvānyakhilāni śemuṣī niśemuṣī prastutakāryanirṇayam_| vidhātum arhaty amalīmasādhunā mudhā kim āddhve gurumohaviplutāḥ||69|| asmād avāpya bhuvanaikaguror anujñām ajñānasantamasabandhavibhedabhānoḥ| kārye tra sāraguruṇi pratipattim ekām arhās stha kartum anavasthitaniścayāndhāḥ||70|| saṃrambhiṇaẖ kim iti nītipathaṃ vihāya līlāvigāḍhagurukīrtitaraṅgiṇīkāḥ| stambheramā iva tanūẖ karapiṣṭahāra- dhūlicchaṭābhir adhunā kaluṣīkurudhve||71|| lokaḥ pramādaparamaḥ kvacid arthasiddhim āpnoti nūnam iha saty api nābhyupāye| ālokay atyabhinimīlitalocanaẖ kim ādarśamaṇḍatale vimale pi vaktram_||72|| prastūyate yad abhidhīyavacobhirasta- mohāndhakāranikarair iha kāryatattvam_| bhaṅgaṃ tad āśu matidurvidhadurdurūṭa- kūṭābhirūpakulitāṅgulibhis sahaiti||73|| vandhyātmanām iha narendrakalāsu mantra- carcā nirūpayitum āśu tathā kṣamā vaḥ| grāsīkaroti na yathābhrapiśāca erṣa niśśaṅkamarkaśaśināv adhunāpi tāvat_||74|| prāptiā viśuddhim adhikāṃ pariṇāmarūpa- vandhyāśritā prakṛtibhoganirargalatvam_ urvīdharasya citiśaktir ivāpacāra- śūnyā bhavaty aniśam apratisaṅkramaśrīḥ||75|| tasmān nirūpitaparātmabalābalaika- kāryakramaupayikaśaktiguṇodayānām_| kartuṃ tathātrabhavatāṃ kṣamamāhaveṣu yenānutāpaśikhinā nu pariplavadhve||76|| ceto vikalpamarutābhihataṃ kim etad ālakṣyalāghavam avasthitilābhaśūnyam_| saṃvāditāṃ nayati dūram iṣīkatūlam ākāśa eva hi paribhramaṇākulaṃ vaḥ||77|| tīkṣṇena tīkṣṇam aniśaṃ mṛdunā mṛduṃ ca| saṃsādhayanti paramaupayikena tajjñāḥ| sūryopalaṃ dinapatiḥ jvalayaty abhīkṣṇam induś ca candramaṇim ārdrayati svadhāmnā||78|| iti giraṃ samudīrya nayānugāṃ viratim eyuṣi pārṣadanāyake| avadhṛtārthaśarīratayā sadaḥ kalakalākulasādhuvaco bhavat_||79|| vākyaṃ navāmbudagabhīraravaṃ tadīyam ākarṇya pārṣadapates sabhayā tadānīm_| saṃhṛṣṭayāśu lavalīlatayeva tatra sambhāvitātanuphalodayayā babhūve||80|| ābaddhavismayavidhūnitamūrdhabhāga- helotpatadvikaṭaratnavataṃsabhṛṅgaiḥ| tadvākyam asya surasaṃhatayaś śaśaṃsur udgīrṇamohatimirā iva karṇarandhraiḥ||81||

iti śrīmahākavirājānuratnākaviracite mahākavye haravijaye dvādaśas sargaḥ||