dvādaśaḥ sargaḥ |

iti sthirārātivirodhaniścayām udīrya vācaṃ virate gaṇādhipe | smitacchaṭābṛṃhitaharadīdhitis tato 'ṭṭahāso vyavaladvivakṣayā || 1 ||

itītyāditrayodaśabhiḥ kulakam_ | bṛṃhitā pravardhitā || 1 ||

arātimattadvipakumbhamaṇḍalīvipāṭanotthāmalamauktikāvaliḥ | kṛpāṇalagnā vidadhāra yasya sā tadacchadhārājalabudbudaśriyam || 2 ||

‘dhi dhāraṇe’ ity asya sthāne ‘dhṛñ_ dhāraṇe’ iti kecit paṭhanti | tasya rūpaṃ vidadhāreti | na dhṛṅaḥ | ātmanepadaprasaṅgāt_ || 2 ||

vitenivāṃso 'py avilaṅghyarūpatām anekasaṃkhyā dadhato 'napāyatām | hareṇa kalpā iva yena kālatām upeyuṣānāyiṣata dviṣaḥ kṣayam || 3 ||

dviṣaḥ kṣayaṃ yenānāyiṣata nītāḥ | saṃkhyaṃ raṇam | saṃkhyā ca gaṇanā | anapāyatā nirdoṣatvam anaśvaratvaṃ ca | aṣṭādhikam śataṃ manvantarāṇāṃ kalpaḥ | kālatā saṃhārakatvam aharādirūpatā ca || 3 ||

dadhaty abhīkṣṇaṃ dhavalāni bhūyasīṃ digantaravyāptinirargalāṃ śriyam | raṇeṣu nirjitya balāni vidviṣāṃ yaśāṃsi yena prathayāṃbabhūvire || 4 ||

dhavāṃl lānti gṛhṇantīti dhavalāni sasvāmikāni śuklāni ca | śrīḥ samṛddhiḥ śobhā ca || 4 ||

dadhatsadāśoṇitapānaśauṇḍatāṃ kṛtābhiyogo bahulakṣapāṭane | babhūva yasyātanudantamaṇḍalaḥ kṣayāya kaukṣeyakarākṣaso dviṣām || 5 ||

kukṣau bhavaḥ kaukṣeyako 'siḥ | ‘kulakukṣigrīvābhyaḥ śvāsy alaṃkāreṣu’ iti ḍhakañ_ | sa rākṣasa iva yasya dviṣāṃ prakṣayāyāsīt_ | satī cārurāśā jayaṃ pratyāsthā yasmin_ | aṇitaṃ prahāraracito dhvaniḥ | pānaṃ śastrāṇāṃ mārjanadravyam_ | tayoḥ śauṇḍatām ābhimukhyaṃ dadhat_ | bahūnāṃ lakṣāṇāṃ bhedanīyānāṃ pāṭane kṛtodyamaḥ | atanu ca dantamayaṃ cakkalakaṃ yasya saḥ | rākṣaso 'pi sadā satataṃ śoṇitasya pāne śauṇḍatāṃ bibhrat_, bahulakṣapāsu kṛṣṇarātriṣv aṭane paribhrāntāv udyataḥ, analpadaśanasamūhaś ca kṣayāya bhavati || 5 ||

subandhurāmodamanoramāṃ śriyaṃ sphuraccharārau yudhi yodhikāṃ dadhat | nirāsa sainyaṃ tarasā suradviṣām iṣīkatūlaṃ śaradīva mārutaḥ || 6 ||

subandhuḥ sadbāndhavaḥ | āmodena prakarṣeṇa manoramām_ | suṣṭhu bandhureṇa hṛdyenāmodena saurameṇa ramyām_ | sphuraccharā niḥsaradbāṇā arayo yasyām_ | [śarāriḥ pakṣiviśeṣaś ca |] iṣīkaḥ śālmaliḥ | jalamadhyasaṃbhavaḥ stambaviśeṣa ity anye || 6 ||

yaśaḥ suvṛttasthiti yena nirmalaṃ samudvahaddarpaṇamaṇḍalaśriyam | puraṃdhriniḥśvāsasamīraṇāhataṃ malīmasacchāyam akāri vidviṣām || 7 ||

yena ripūṇām amalam api yaśo malinīkṛtam_ | vidhuratadvadhūniḥśvāsahetutvāt_ | suvṛtte sucarite sthitir yasya || 7 ||

raṇājirakṣmākalaśīkṛtaṃ javāt kramojjhitaḥ sannasahāya eva yaḥ | arātilokaṃ mathitaṃ sahasradhā cakāra daṇḍāhatam apy agorasam || 8 ||

raṇāṅgaṇabhūmir eva kalaśī manthanabhāṇḍam_ | tadgatam arilokaṃ yo daṇḍenāhatvāt sahasradhā mathitaṃ piṣṭam_ | atha ca takram akarot_ | daṇḍaś caturaṅgabalam_ | nāsti gavi bhūmau raso yasya | bhuvas tena hṛtatvāt_ | yan mathitaṃ daṇḍena mathā hatatvād daṇḍāhatam iti prasiddhaṃ tad gorasam udaśvin na bhavatīti ca śābdo virodhaḥ | eṣāṃ trayāṇām apy a[na]rthāntaratvāt_ || 8 ||

śriyaṃ dadhānaṃ caturasratāśrayām anekapattyaśvarathadvipākulam | vipakṣam āviṣkṛtasaṃdhivigrahaṃ tathāpy anaṣṭāpadam eva yo vyadhāt || 9 ||

caturasratāyāḥ sarvato ramyatvasyāśrayaḥ svīkāro yatra tādṛśīm api lakṣmīṃ bibhratam arim anaṣṭāpadam abahiṣkṛtāpadam eva yaḥ kṛtavān_ | saṃdhivigrahau prathamadvitīyau nayaguṇau | āviṣkṛtasaṃdhiḥ phalakadvayoparacitatvād abhivyañjitabandhadvayo vigrahaḥ śarīraṃ yasya tādṛśaṃ yatkṛtrimarūpaiḥ padātyādibhir āracitaṃ caturasratāśrayāṃ catuṣkoṇatvaviṣayāṃ śobhāṃ bibharti | sāmarthyāc caturaṅgaphalakam_ | tadaṣṭāpadaṃ neti ca virodhaḥ | tasya hi paṅktau paṅktau padāṣṭakopetatvād aṣṭāpadam iti saṃjñā | atra tathāśabdaḥ samuccaye | pūrvavākyāpekṣayā yadyapi lakṣmīṃ dadhataṃ tathāpi ripum anaṣṭāpadam evākarod iti tv ekavākyatāyām anvayo na yujyate vākyabhede | evaṃ jātīyakasyobhayābhīṣṭatvāt_ | ‘yadyapy asis trijagatījayalabdhakīrtiḥ kveyaṃ tathāpi raṇalampaṭatā hatā te | saṅgrāmamūrdhni bhaṭamuṣṭigate kṛpāṇe kiṃ jñāyate śrayati kaṃ capalā jayaśrīḥ ||’ iti || 9 ||

vikāsayan kīrtikumudvatīṃ kṣaṇād vilocanānandakaraḥ kalāspadam | sarūpabhāve 'py aparājayakṣmatāṃ dadhanmṛgāṅkaṃ viśinaṣṭi yo guṇaiḥ || 10 ||

aparājayā parābhavaśūnyā kṣmā kṣitir yasya tadbhāvaṃ bibhradya induṃ viśinaṣṭi atiśete | guṇaiḥ sārūpye 'pi sati nahīndur apagato rājayakṣmā kṣayavyādhir yasya tadbhāvaṃ bibharti | tasya satataṃ tadākrāntatvāt_ | ānandaṃ karotīty ānandakaraḥ | ānandāś cānandahetavaḥ karā raśmayo yasya saḥ | kalā lekhā api || 10 ||

anekapakṣmāhitasaṅgarājitaṃ śriyaṃ dadhānaṃ vikaṭāṃsam ujjvalām | babhāra sadrāghimacārutārakaṃ praveṣṭayor yaś ca dṛśor iva dvayam || 11 ||

anekapānām ibhānāṃ kṣmā bhūmir yo 'hitasaṃgaro 'risaṅgrāmas tatrājitam_ | vikaṭāṃsaṃ mahāskandham_ | saha drādhimṇā dairghyeṇa vartate | cāru ramyam_ | tārayati tathā [bhayā]dvipado vā tārakaṃ śaraṇyam_ | praveṣṭau bhujau | anyatrānekena pakṣmaṇā āhitena saṅgena rājitam_ | vikaṭāṃ vistīrṇām_ | cārū tārake kanīnike yasyām_ || 11 ||

upeyuṣonmūlanadakṣatāṃ kṣaṇāt kṣayānileneva vipakṣatāṃ gatā | kṣamābhṛtāṃ yena tatiḥ prasarpatā prakampitāsannavadhāturājitā || 12 ||

vipakṣatāṃ śatrutvaṃ vigatāṅgaruhatvaṃ ca | kṣamābhṛto rājānaḥ parvatāś ca | āsannena vadhenāturā duḥkhitā satī jitā paribhūtā | sadbhir navair dhātubhir manaḥśilādyai rājitā ca || 12 ||

kareṇa cakraṃ dadhad ujjvalena yaḥ puraṃdarasyāpy abhimānam ākṣipat | raṇājiraṃ svargam ivātanodbalād apārijātaṃ puruṣottamo yathā || 13 ||

apagatam arīṇāṃ jātaṃ samūho yatra tādṛśaṃ yaḥ samarāṅgaṇam akarot_ | svargam iva hariḥ | tatpakṣe nāsti pārijāto yatreti yojyam_ | puruṣottamo harir api || 13 ||

(kulakam_)

apakramārambhavijṛmbhitādhikaprakopanirdhūtaśiraḥślathāspadam | yathāpradeśaṃ viniveśanecchayā kareṇa māṇikyakirīṭam utkṣipan || 14 ||

apakrametyādi kalāpakam_ | apakramo vikramaḥ || 14 ||

uraḥsthalīvisphuradaśmagarbhakasphuratprabhāmaṇḍalahārivigrahaḥ | dadhat trimārgāsalilāvagāhanaprasaktaśevālasuradvipāśriyam || 15 ||

aśmagarbhaṃ marakatam_ || 15 ||

sphurajjayaśrīmaṇisālabhañjikāviśaṅkaṭastambhabhujaḥ savibhramam | viveṣṭamānoragabhīrubhīṣaṇāṃ vitarkajihmākṛtim utkṣipan bhruvam || 16 ||

jayaśrīrave sālabhañjikā stambhotkīrṇā putrikā tasyāḥ | stambho bhujā yasya | bhīruḥ strī || 16 ||

sa bhāratīṃ vāṅmayakalpapādapasphuratpratānojjvalaratnamañjarīm | nināya niryaddaśanāṃśukesarāṃ sabhāṅganāyāḥ śucikarṇapūratām || 17 ||

bhāratī vāk_ | vāṅmayaṃ śabdabrahma | pratāno vistāraḥ || 17 ||

(kalāpakam_)

viśuddhavarṇojjvalahaṃsasaṃhatiḥ prasādagāmbhīryaviśeṣaśālinī | manoramā tasya mukhaṃ sarasvatī vasuṃdharāpīṭham iva vyabhūṣayat || 18 ||

varṇāḥ kādaya eva komalatayā haṃsā viśuddhā nirapaśabdās teṣāṃ saṃhatir yasyāḥ | viśuddhavarṇā ca sitarucir haṃsasaṃhatir yasyām_ | prasādaḥ samarpakatvaṃ vimalatā ca | gāmbhīryam arthagauravam agādhatā ca | sarasvatī vāk_ kācin nadī ca || 18 ||

girānayā prastutam etad īdṛśaṃ tavāryakāryaṃ bahu manyate na kaḥ | mṛṇālavallikusumaṃ tanoti tat karoti lakṣmīr api yan niketanam || 19 ||

19 ||

vaco 'tra sarvasya manoramaṃ bhavānyad abhyadhāt tatra ka eva vismayaḥ | yato bhavaty eva vivekaśālināṃ vipaścitāṃ prātijanīnavākyatā || 20 ||

prātijanīnaṃ sarvajanayogyam_ | sādhvarthe ‘pratijanādibhyaḥ khañ_’ iti khañ_ || 20 ||

atas tvayātyūrjitasattvaśālinā samanta(sta)bhadre 'pi vacasy udīrite | mamāvakāśo 'sti na vaktum ity avan bruve tathāpy āśritakāryagauravaḥ || 21 ||

samanta(sta)bhadraṃ sarvataḥ praśastam_ | avann avagacchan_ || 21 ||

ayaṃ jaḍo 'smāt kuta eva nītimad vaco 'bhyudetīti na kalpanā kṣamā | kim aśmano 'tyantamalīmasātmanaḥ suvarṇam akṣuṇṇaguṇaṃ na jāyate || 22 ||

akṣuṇṇāḥ prabhūtā nirdoṣā vā || 22 ||

gatārthatattvapratipattihetutāṃ matiḥ kutas te timirānuṣaṅgiṇī | prabhāsamānā gaṇanāthā dṛśyate na ratnadīpasya śikhā sakajjalā || 23 ||

arthaḥ kāryaṃ ghaṭādiś ca bhāvaḥ | timiram ajñānam_ | prabhābhir hetubhir asamānā ananyasadṛśī || 23 ||

abhīkṣṇam antaḥ sarasāny atandritāḥ suvṛttatāṃ bibhrati nītiśālinaḥ | vitanvate saṃsadi kūrcakesaradrumāḥ phalānīva vacāṃsi sūrayaḥ || 24 ||

raso vīrādbhūtādir jalaṃ ca | atandritā analasāḥ | vṛttam ācaritaṃ vartulatvaṃ ca bibhrati bibhrāṇāni | kūrcakesarā nārikelāḥ || 24 ||

samīkṣya samyagbhuvi kṛtyavastu yaḥ pratīkṣate deśabalādisādhanam | bhavanti tasyānapacāracāravaḥ kriyāviśeṣā na vipākanīrasāḥ || 25 ||

bhuvi svamaṇḍale | apacāro viruddhācaraṇam_ | vipākanīrasāḥ pariṇāmadurbhagāḥ || 25 ||

akhaṇḍitātyūrjitavīryasaṃpado nirākariṣṇos tarasā yudhi dviṣaḥ | pramādadoṣānupaghātasusthitaṃ na nītitulyaṃ kṣamam asti sādhanam || 26 ||

kṣamaṃ yogyam_ || 26 ||

prayuktasaṃskāragurur garīyasāṃ vrajaty avasthaiva nanu pratīkṣyatām | bhajaty upāvarjitatailasekayā nahi pradīpo daśayā vinā sthitim || 27 ||

garīyasām avasthitiḥ saṃskāreṇa gurur eva pratīkṣyatāṃ yāti | tam antareṇa suciraṃ tasyā abhāvāt_ | saṃskāraḥ śāstrādinā yogyatādhānam_ | upāvarjitaḥ kṛtaḥ || 27 ||

malīmasācāranirargalasthiter akhaṇḍam anyan malinaṃ prakalpate | tamoghane veśmani tiṣṭhato 'niśaṃ vrajaty aśeṣaṃ jagadandhakāritām || 28 ||

28 ||

suradviṣāṃ nihnumahe na pauruṣaṃ na ca praśaṃsāṃ tanumas tathātmanaḥ | nirūpayāmo nayavartma kevalaṃ yathābhilāṣās tu parasya vṛttayaḥ || 29 ||

paro 'nyaḥ | tasya vṛttayo vyavahārā yathābhilāṣāḥ svacchandatayā vyāptāḥ || 29 ||

sabhūmilābhaṃ śubhavartirekhayā manoramaṃ maṇḍalakāryam askhalat | aśeṣam unmīlayati kṣamābhṛtāṃ vicitrarūpā nanu nītitūlikā || 30 ||

śubhavartiḥ sanmārgas tatra lekhā maryādā | śubhāyāś ca varter gairikādigulikāyā lekhā rekhā | maṇḍalaṃ dvādaśarājako deśas tatra kāryaṃ tantrāvāpādikam_ | maṇḍalaṃ ca sarvatobhadrādi tad eva kāryaṃ prayojanam_ | vicitrarūpā āścaryā | vividhasya cacitrasya rūpaṃ yataḥ || 30 ||

yathākhiladravyagatāṃś cikitsakā viviñcate pañcarasādikān budhāḥ | tathaiva mantrāśrayatām upeyuṣaḥ sunītibhājo 'vayavāñjigīṣavaḥ || 31 ||

cikitsakā bhiṣajaḥ | te yathā dravyasya pañcāvayavān rasavīryavipākaprabhāvasaṃyogān viviñcate vicārayanti tathā jigīṣavo mantrasya pañcaiva ‘karmaṇām ārambhopāyaḥ’ ityādikān prayogān_ (pūrvoktān_) | pañca ca rasādayaḥ—‘rasāḥ svādvamlalavaṇatiktoṣaṇakaṣāyakāḥ | vīryaṃ dravyasya taj jñeyaṃ yad yogāj jāyate kriyā || nāvīryaṃ kurute kiṃcit sarvā vīryavatī hi sā | jāṭhareṇāgninā yogād yad udeti rasāntaram_ || rasānāṃ pariṇāmānte sa vipāka iti smṛtaḥ | rasādisāmye yat karma viśiṣṭaṃ tat prabhāvajam_ ||’ saṃyogo dvayor bahūnāṃ vā dravyāṇāṃ sahitībhāvaḥ sanniveśam ārabhate | yathaikakaśo dravyāṇīti bhiṣakchāstreṣu pratipāditāḥ || 31 ||

apārthatādoṣaparītam akramaṃ sasaṃśayaṃ saṃdhivihīnatāṃ gatam | na deśakālādivirodhi paṇḍitaiḥ praśasyate kāryam asādhukāvyavat || 32 ||

apārthatā phalavirahaḥ | tad yuktaṃ karma na śastram_ | yad uktam_—‘aphalāni durantāni samavyayaphalāni ca | aśakyāni ca kāryāṇi nārabheta vicakṣaṇaḥ ||’ iti | daśadāḍimādivākyavadasaṃgatārthatvaṃ cāpārthatā | akramaṃ vyutkramam aprayuktopāyaṃ kramahīnārthaṃ ca | yathā—‘turagam athavā mātaṅgaṃ me prayaccha madālayam_’ iti | sasaṃśayaṃ saṃdigdhaphalasiddhikaṃ saṃdigdhārthaṃ ca | yathā—‘sa bhāgyavaśān mahāpadam upāgataḥ’ iti | saṃdhihīnaṃ prathamaguṇarahitaṃ virūpasaṃdhi ca | yathā—‘kamale iva locane ime anubadhnāti vilāsapaddhatiḥ’ iti | deśakālavirodhīty anena kārye prastute pañcāvayavamantrākaraṇaṃ pratipādyatety atra(?) lokaviruddhākhyo doṣaḥ | tatra hi deśavirodha evoktaḥ | deśakālasvabhāvaviruddhāni yathā—‘sva(sau)vīreṣv asti nagarī madhurā nāma viśrutā | akṣoṭanārikelāntā yasyāḥ paryantabhūmayaḥ || kadambakusumasmeraṃ madhau vanam aśobhata ||’ iti || 32 ||

bibharti pāriplavatām udanvatas tad ūrmisaṃsargakṛtām ivotthitā avaimi lakṣmīr nayavartmanāgatā sthiraṃ nibadhnāti nṛpe padaṃ punaḥ || 33 ||

lakṣmīr abdher utthitatvāt taraṅgasaṃkrāntām iva niścitaṃ capalatāṃ vahati | nayamārgeṇa punar āgatā nṛpatau sthiram āspadaṃ kurute || 33 ||

amandarabhrāntikadarthitodadhir viluptadevāsuramanthasaṃbhramaḥ | sacetasaḥ kasya na vallabho 'rjane nayaprakāro 'para eva vā śriyaḥ || 34 ||

nayaprakāro nītiprapañcaḥ śriyo 'rjane 'para evāpūrva evopāyaḥ, kasya vā na vallabhaḥ | pūrvavadudadher akadarthanāt surāsurāṇāṃ cāsaṃbhrānteḥ | ‘nayaḥ prakāraḥ’ iti tu hṛdayaṃgamaḥ pāṭhaḥ || 34 ||

na nītiśāstropaniṣatsu pañcadhā sthitiṃ jahāty eṣa paraḥ pumān iva | pradīpitoddāmaviparyayagrahair nirūpito mantra iha praṇetṛbhiḥ || 35 ||

śāstrāṇi upaniṣado vedāntāḥ | parasya puṃsaḥ pañcadhātvam annaprāṇamanovijñānānandamayatvena | viparyaye durnaye mithyādṛṣṭau ca graho 'bhiniveśaḥ || 35 ||

vibhajyamānā bahudhārthakovidaiḥ sasaṃśayagranthir amantharātmabhiḥ | mṛṇālavallīva guṇān vihāya kiṃ vyanakti nītir jaḍasaṃkaroddhṛtā || 36 ||

vibhajyamānā vibhāgenāsūtryamāṇā bhidyamānā ca | arthakovidaḥ kāryajñaḥ | granthayo bandhāḥ parvāṇi ca | mantharo 'lasaḥ | guṇāḥ—‘saṃdhiṃ ca vigrahaṃ caiva yātrām āsanam eva ca | dvaidhībhāvaṃ saṃśrayaṃ ca ṣaḍguṇān kavayo viduḥ ||’ iti saṃdhyādayaḥ, tantavaś ca | jaḍaṃ ca jalam_ | laḍayor ekatvasmaraṇāt_ || 36 ||

upāyaśūnyās taravaḥ kṣitāv iva kriyāviśeṣā vyabhicāriṇaḥ phale | ta eva nūnaṃ niyamena bhūbhṛtāṃ phalanti kalpadrumavannayāśrayāḥ || 37 ||

upāyāḥ sekādayo 'pi | bhūbhṛtaḥ parvatā api || 37 ||

sthirābhyupāyaprakaṭārasaṃcayaṃ dadhad virūḍhakramakālanemitām | pravartitaṃ maṇḍalanābhibandhanaṃ na kāryacakraṃ kvacanāvaśīryate || 38 ||

abhyupāyāḥ sāmādaya evārāṇāṃ madhyakāṣṭhānāṃ saṃcayo yasya | virūḍhakramaḥ kāla eva nemir dhārā yasya | maṇḍalaṃ rāṣṭram eva nābhiś cakramadhyaṃ tasya bandhanam_ | yathānyato na yāti | karaṇe lyuṭ_ | athavā ‘arir mittram arer mittraṃ mittramittram ataḥ param_ | tathārimittramitraṃ ca vijigīṣoḥ puraḥ smṛtam_ || pārṣṇigrāhas tataḥ paścād ākrandas tadanantaram_ | āsārāvanayoś caiva vijigīṣoś ca pṛṣṭhataḥ || areś ca vijigīṣoś ca madhyamo bhūmyanantaraḥ | anugrahe saṃhatayoḥ samartho vyastayor vadhe || maṇḍalād bahir eteṣām udāsīno balādhikaḥ | anugrahe saṃhatānāṃ vyastānāṃ ca vadhe prabhuḥ ||’ iti dvādaśarājako deśo maṇḍalam_ | tasya nābhir madhyavartī vijigīṣus tasya maṇḍalākṛteś ca nābheś cakramadhyasya bandhanaṃ sthairyādhāyakam_ | kāryāṇāṃ cakraḥ samūhaṃ kāryam eva ca || 38 ||

vyapekṣate bāhubalaṃ jigīṣataḥ sunītim ākrāntajagattrayaṃ dhruvam | rathāspadaṃ cakram ivāśvamaṇḍalīṃ vivasvato merutaṭīvivartinaḥ || 39 ||

cakraṃ rathāṅgam_ || 39 ||

upāyasopānaparamparām imāṃ yathākramaṃ yo 'dhirurukṣur āśritaḥ | sa nūnam uccaiḥ pada eva nītimān kṛtapratiṣṭho na cirād vibhāvyate || 40 ||

padaṃ rājyaṃ sthānaṃ ca | na cirād acireṇa || 40 ||

narendralakṣmīr ucitair upakramaiḥ krameṇa tais tair gurubhiḥ prasādhitā | nayātmadarśe guṇadoṣadarśanasphuṭāvadhānā vyavalambatām iyam || 41 ||

upakramair upāyaiḥ | prasādhitā arjitā maṇḍitā ca || 41 ||

prakāśa eva praviluptadarśano gataḥ kṣaṇād ghūka ivāndhyaviplavam | na jātu kālaṃ matidurvidho jano bibharti sāmarthyam udarkam īkṣitum || 42 ||

udarkam āgāminaṃ kālam īkṣituṃ matidurvidhaḥ prajñādaridro jano ghūka iva na samarthaḥ | ghūka ulūkaḥ | so 'py udarkam uditārkaṃ kālam avalokayituṃ nālam_ | prakāśe prasiddhe vastuni tamorahite ca | darśanaṃ jñānam avalokanaṃ ca | āndhyakṛto viplava upatāpaḥ || 42 ||

vivṛṇvatāṃ maṇḍalasaṃdhivigrahavyapāśrayāḥ kāryagatīr anekaśaḥ | kriyāpacārā na bhavanti dhīmatām anukramāpakramayogacintayā || 43 ||

anukramāpakramāv anvayavyatirekau || 43 ||

virūḍhamūlasya nayānusāriṇaḥ sakoṣadaṇḍopacayasya bhūpateḥ | kuśeśayasyopaciteva karṇikā bibharti lakṣmīḥ pariṇāmapīnatām || 44 ||

mūlaṃ svadeśaḥ kandaṃ ca | koṣo 'rthasaṃpad abhyantaraṃ ca | daṇḍaḥ senā nālaṃ ca | pariṇāma āgāmī kālaḥ pakvatā ca || 44 ||

vicinvato 'rthaṃ nijamaṇḍalāśrayaṃ guṇānupāyāṃś ca nṛpasya śaktayaḥ | na deśakālānavadhāraṇakramāt samutpatiṣṇor upayānti bṛṃhaṇam || 45 ||

45 ||

madacchaṭārdrīkṛtagaṇḍamaṇḍalīnilīnabhṛṅgadvipayūthadāriṇaḥ | nimajjato vāriṇi tīvratejasaḥ saṭā vilumpanti harer jhaṣā api || 46 ||

jhaṣā matsyāḥ || 46 ||

atītakālasya tadatra jṛmbhitaṃ tapasyam āse kariṇo 'pi durjayaḥ | nidāghakāle mukhalāṅgalaḥ śunām api vrajaty eva nikāryatāṃ yataḥ || 47 ||

mukhalāṅgalaḥ sūkaraḥ | sa śunām api grīṣme nikāryatāṃ paribhāvanīyatvaṃ yad upayāti tad atītakālasya jṛmbhitam_ | kālātikramaṇasya phalaṃ tad ityarthaḥ | nahi medasvitayā sūkarāṇāṃ grīṣmaḥ samucitaḥ kālaḥ | tapasyaḥ phālgunaḥ | kariṇa iti kartur api saṃbandhitayā vivakṣaṇāt saṃbandhamātre ṣaṣṭhī | anyathā ‘na lokāvyaya—’ iti tan niṣedhaḥ syāt_ || 47 ||

samudvahann akṣatapakṣabhūmibhṛdvibhedadakṣām iha śaktim āyatām | mayūraketur vadanair ivādhikaṃ vibhāti ṣaḍbhir nayavistaro guṇaiḥ || 48 ||

pakṣāḥ svavargyā aṅgaruhāś ca | bhūmibhṛdrājā krauñcādriś ca | śaktiḥ prabhutvamantrotsāhalakṣaṇā praharaṇaviśeṣaś ca | mayūraketuḥ kumāraḥ || 48 ||

vibhāvyamānāsanasaṃdhisaṃśrayā guṇāḥ pariṣkāramaṇisphuṭatviṣaḥ | tad adbhutaṃ yad vijayaiṣiṇāṃ śriyaṃ prasādhayanty apravimṛṣṭavigrahāḥ || 49 ||

apravimṛṣṭo 'spṛṣṭo vigrahaḥ kalaho yeṣu tādṛśā api guṇāḥ śriyaṃ prasādayanti prakarṣeṇotpādayanti | vibhāvyamānātya......lakṣyamāṇā āsanādayas trayo guṇā yeṣu | pariṣkāramaṇayo vibhūṣaṇaratnāni | te tu vibhāvyamānā āsane padake saṃdheḥ saṃśleṣasya saṃśrayo yeṣāṃ tādṛśāḥ śarīram asaṃspṛśya yad bhūṣayanti tac citram_ | prasādhanaṃ maṇḍanam api | vigrahaḥ śarīram api || 49 ||

kṛtāspadā sāraguruḥ sthirātmasu kṣameva dikkuñjaravigraheṣv asau | jahāty upāyeṣu caturṣu na sthitiṃ dṛḍhīkṛtā nītir iha kṣamādharaiḥ || 50 ||

sāra utkarṣo gauravaṃ ca | guruḥ pūjyā | kṣamā bhūḥ | kṣamādharāḥ sahiṣṇavaḥ parvatāś ca || 50 ||

upeyasiddhyai bhavatāṃ matiḥ sthirā pravartate ced anupāyasādhanā | avaimi ṣāḍguṇyavicāragocaraiḥ kṛtaṃ tataḥ saṃprati nītiśāsanaiḥ || 51 ||

śāsanaṃ śāstram_ || 51 ||

kṣamā bhavantaḥ kṣayasūryatejaso jagattrayasya sthitisargasaṃhṛtīḥ | vidhātum ekākina eva līlayā na mūrtibhedā iva kiṃ svayaṃbhuvaḥ || 52 ||

mūrtibhedā hariprabhṛtayaḥ | svayaṃbhūḥ śivaḥ || 52 ||

jigīṣatāṃ maṇḍalasaṃdhivigrahavyapāśrayāḥ kāryagatīr vihāya vaḥ | na yuddhasaṃrambharasāt tathāpi tu kṣamāḥ parān mārṣṭum hāṃsabhittayaḥ || 53 ||

53 ||

avaimi daityān samareṣu durjayān bhujāṃś ca vo diggajahastapīvarān | ato 'tra yukto naya eva saṃkaṭe jalaplave setur ivottitīrṣatām || 54 ||

54 ||

kim asty ataḥ śaṃsata vācyaviplutaṃ yad abhyupāyeṣu pareṣu satsv api | dviṣatsu carcā bhavatām apīdṛśī pracaṇḍadaṇḍaikarasā vijṛmbhate || 55 ||

55 ||

upāya eveti ca daṇḍa eṣa no na nītivṛddhair avalambanīkṛtaḥ | tathāpi kārye 'tra guruṇy upekṣituṃ na yuktarūpo bhavatām anukramaḥ || 56 ||

tair api daṇḍo 'yam upāya iti kṛtvā āśrita eva | vṛddhāś ca vayojyeṣṭhāḥ | tair daṇḍo yaṣṭir avalambanaṃ kriyate | gatyupāyatvāt_ | no iti pratiṣedhe || 56 ||

niruddharandhraprasaraślathībhavajjaḍapraveśasthirasaṃdhisusthitāḥ | na kāryasindhor iha tārayanti kaṃ plavā ivoccaiḥ kṛtinaḥ sakarṇakāḥ || 57 ||

niruddhena randhraprasareṇa codyavatareṇa(?) ślathībhavann asaṃpadyamāno jaḍapraveśo mūrkhāṇām avakāśas tena yaḥ sthiraḥ saṃdhyākhyo guṇas tena susthitāḥ sakarṇakāś ca bahuśrutāḥ kṛtinaḥ kāryasindhoḥ kaṃ na tārayanti sarvam eva tatpāre prāpnuvanti | uḍupā iva | tatpakṣe randhraṃ chidram_ | jalaṃ vāri | saṃdhiḥ saṃśleṣaḥ | sakarṇakāḥ sakhaṭakāḥ | sthitir maryādāvasthānaṃ ca || 57 ||

dahanti kalpapralayeṣu bhānavo jaganti velāṃ ślathayanti sāgarāḥ | na tādṛśo 'sau samayo 'sti yatra vā sthitiṃ vibhindanti ruṣā bhavādṛśāḥ || 58 ||

58 ||

avaimi nūnaṃ na ca bhartur ājñayā vinā samarthāḥ stha ripor vinigrahe | jagatpariplāvayituṃ na vīcayaḥ kṣamās taṭasthasya kadācid ambudheḥ || 59 ||

59 ||

pravartamānāṃ pratipattum arhatha tridhā vibhinnām ata eva śūlinaḥ | hitāya śaktiṃ kṛtaviṣṭapatrayasthitiṃ purārer iva nākanimnagām || 60 ||

60 ||

ayaṃ prabhuḥ karmasu daivamānuṣaprabhedarūpeṣv avilaṅghyatāṃ dadhat | acintanīyo nayatattvacintakair manīṣibhir daivam iti sma kathyate || 61 ||

daivamānuṣaṃ devamanuṣyasaṃbandhitvaṃ tena prabhedaḥ prakṛṣṭaprakāraṃ rūpaṃ yeṣām_ | antareṇāpi bhāvapratyayaṃ bhāvārthāvagatir bhavati | yathā—‘dvyekayor dvivacanaikavacane’ iti || 61 ||

jigīṣatāṃ dordrumadarpavibhramā dhiyaś ca ṣāḍguṇyavicāragocarāḥ | na yānty upāyapratipattaye dṛḍhāḥ parāṅmukhe 'smin phalabhāgitāṃ kvacit || 62 ||

62 ||

yadānuguṇyaṃ bhajate jagaty asau tadā tadātvāyatiṣu sphuṭaṃ nṛṇām | kriyāviśeṣāḥ sakalāḥ pravartitā viparyayeṇāpi hi siddhihetavaḥ || 63 ||

tadātvaṃ saṃprati | āyataya eṣyanto māsasaṃvatsarādayaḥ || 63 ||

pratīyamānāḥ prakaṭaṃ pṛthagjanair viruddharūpā iva kasya vismayam | amuṣya ceṣṭā janayanti noccakair viluptamohapratipattigocarāḥ || 64 ||

viluptamohā yoginas teṣāṃ pratipattiṃ prati gocarā vijñānaviṣayā asya ceṣṭāḥ kasya vismayaṃ na tanvanti | viruddhapratibhāsatvāt_ | pṛthagjanā ajñāḥ | viruddhapratibhāsatvaṃ ca ceṣṭānāṃ stotramārge pratipāditam_ || 64 ||

ihaiva niḥśvāsagam āgamakriyāprabandhabhedena carācarātmani | vrajaty abhīkṣṇaṃ pratibaddhavṛttitām aśeṣaviśvodayasaṃhṛtikramaḥ || 65 ||

iha carācarātmani sthāvarajaṅgamarūpe śive viśvasya sṛṣṭisaṃhārayoḥ kramaḥ pratibaddhavṛttir āyattaḥ || 65 ||

amuṣya garbhīkṛtasāgarodarapratiṣṭhaśeṣoragabhogaśāyinaḥ | muradviṣo nābhisarojakarṇikāviṭaṅkapīṭhaḥ samabhūc caturmukhaḥ || 66 ||

amuṣya muradviṣo 'bhirūpasya brahmā samudabhūd iti | devadattasya garbharūpo jāta itivad apādānatvasyāvivakṣaṇāl lokoktir iyam_ | garbhīkṛtasya kalpāntasamaye kukṣau nivedi(śi)tasya sāgarasyodare pratiṣṭhā yasya || 66 ||

abhīkṣṇamaṣṭābhiramuṣya mūrtibhirvibhoravaṣṭabhya jaganti tasthuṣaḥ | bhinatti māyīyamathāṇavaṃ nṛṇāṃ smṛtistathā kārmaṇamāśu bandhanam || 67 ||

‘kṣitijalapavanahutāśanasomasūryayajamānākāśākhyāḥ | aṣṭābhir mūrtibhir ābhiḥ śaṃbhuḥ syād aṣṭamūrtir iti ||’ māyīyaṃ māyātattvajam_ | āṇavam aṇūnāṃ svabhāvajam_ | kārmaṇaṃ śubhāśubhakarmaprabhavam_ || 67 ||

sthiraplavānuplavaviplavojjhitā nije 'tra tiṣṭhantyaṇavastadātmani | durantamāyīyavivartabhedinī yadāsya śaktiḥ svabhuvo vijṛmbhate || 68 ||

plavānuplavau sṛṣṭisaṃhārau tatkṛtena bodhena rahitā aṇava ātmānas tadā sve sve bhāve tiṣṭhanti yadā svayaṃbhuvo 'sya śaktir jñānarūpā māyākṛtaṃ vivartam asatyam avabhāsaṃ chindati samullasati || 68 ||

amuṣya tattvāny akhilāni śemuṣī niśemuṣī prastutakāryanirṇayam | vidhātum arhaty amalīmasādhunā mudhā kim āddhve gurumohaviplutāḥ || 69 ||

tattvāni śivādīni ṣaṭ_triṃśat niśemuṣī niścitavatī asyaiva śemuṣī matiḥ kāryanirṇayaṃ kartum arhati | amalīmasatvāt_ | āddhve tiṣṭhata || 69 ||

asmād avāpya bhuvanaikaguror anujñā- m ajñānasaṃtamasabandhavibhedabhānoḥ | kārye 'tra sāraguruṇi pratipattim ekā- m arhāḥ stha kartum anavasthitaniścayāndhāḥ || 70 ||

ekā pratipattiḥ sāmādīnām ekatam asyopādānam_ | ‘arhāḥ stha kartum_’ iti pāṭhaḥ || 70 ||

saṃrambhiṇaḥ kim iti nītipathaṃ vihāya līlāvigāḍhagurukīrtitaraṅgiṇīkāḥ | stamberamā iva tanūḥ karapiṣṭahāra- dhūlicchaṭābhir adhunā kaluṣīkurudhve || 71 ||

71 ||

lokaḥ pramādaparamaḥ kvacid arthasiddhi- m āpnoti nūnam iha saty api nābhyupāye | ālokayaty abhinimīlitalocanaḥ ki- m ādarśamaṇḍatale vimale 'pi vaktram || 72 ||

72 ||

prastūyate yad abhidheyavacobhir asta- mohāndhakāranikarair iha kāryatattvam | bhaṅgaṃ tadāśu matidurvidhadurdurūṭa- kūṭābhirūpakuṭilāṅgulibhiḥ sahaiti || 73 ||

abhidheyavacobhiḥ prakaṭārthaiḥ śabdair yatkāryam āsūtryate tadāśu bhaṅgam eti nāśaṃ pratipadyate | durdurūṭānām aṅgulibhiḥ saha | tā api tatra bhaṅgaṃ parivartanādirūpaṃ prāpnuvantītyarthaḥ | yathā matirahito 'pi vaitaṇḍikaloko 'ṅgulibhaṅgaṃ na karoti tathā gūḍhārthair eva padair mantraṇīyam iti piṇḍārthaḥ || 73 ||

vandhyātmanām iha narendrakathāsu mantra- carcā nirūpayitum āśu tathā kṣamā vaḥ | grāsīkaroti na tathābhrapiśāca eṣa niḥśaṅkam arkaśaśināvadhunāpi tāvat || 74 ||

asty eva ca yuṣmākam api mantrakauśalam ity āha—vandhyātmanām iti | narendro rājā mantrasādhakaś ca | abhrapiśāco rāhuḥ || 74 ||

prāptā viśuddhim adhikāṃ pariṇāmarūpa- vandhyāśritā prakṛtibhoganirargalatvam | urvīdharasya citiśaktir ivāpacāra- śūnyā bhavaty aniśam apratisaṃkramā śrīḥ || 75 ||

urvīdharasya rājño 'pratisaṃkramatvāl lakṣmīr aniśaṃ bhavati sthairyam ālambate | viśuddhiṃ niraparādhatvam_ | dharmata eva jitatvāt_ | pariṇāmo vikāraḥ | prakṛtibhogo 'mātyādir upajīvanam_ | tatra niragalatvaṃ sulabhatā | apacāro durnayaḥ | pratisaṃkramo 'nyatropasaṃkramaṇam_ | citiśaktir iti sāṃkhyānāṃ puruṣe prasiddhiḥ | tatpakṣe tu viśuddhir guṇair asaṃkīrṇatā | pariṇāmo dharmāntaraparigrahaḥ | yad āhuḥ—‘jahaddharmāntaraṃ pūrvam upādhatte yadā param_ | tattvād apracyuto dharmī pariṇāmaḥ sa ucyate ||’ iti | prakṛtir avyaktam_ | tasyā bhogas tatkarmaṇāṃ phalānubhavas tatra niragalatvaṃ niṣpratibandhatā | apacārā rāgadveṣādayo doṣāḥ | apratisaṃkramā codāsīnā | uktaṃ ca—‘citiśaktir apariṇāminyapratisaṃkramā darśitaviṣayā śuddhā cānantā ca’ iti || 75 ||

tasmān nirūpitaparātmabalābalaika- kāryakramaupayikaśaktiguṇodayānām | kartuṃ tad atra bhavatāṃ kṣamam āhaveṣu yenānutāpaśikhinā na pariplavadhve || 76 ||

aupayikāḥ sāmādayaḥ | śaktayaḥ prabhumantrotsāhapūrvāḥ | guṇāḥ saṃdhyādayaḥ ity asakṛd uktam_ | udayas tu sthānaṃ vṛddhiḥ kṣaya ityevaṃrūpaḥ | tatra sthānam_—koṣadaṇḍāder upacayāpacayaśūnyā sthitiḥ | vṛddhis tasyaivopacayaḥ | apacayas tu tasyaiva kṣayaḥ | anye punaḥ—ātmodayo mittrodayo mantrodaya ityevaṃ trividham evodayaṃ jagaduḥ | etad akhilaṃ parasyātmanaś ca nirūpitaṃ yaiḥ | pariplavadhve bādhām anubhavatha || 76 ||

ceto vikalpamarutābhihataṃ kim eta- d ālakṣyalāghavam avasthitilābhaśūnyam | saṃvāditāṃ nayati dūram iṣīkatūla- m ākāśa eva hi paribhramaṇākulaṃ vaḥ || 77 ||

ākāśe śūnye nabhasi ca || 77 ||

tīkṣṇena tīkṣṇam aniśaṃ mṛdunā mṛduṃ ca saṃsādhayanti paramaupayikena tajjñāḥ | sūryopalaṃ dinapatir jvalayaty abhīkṣṇa- m induś ca candramaṇim ārdrayati svadhāmnā || 78 ||

78 ||

iti giraṃ samudīrya nayānugāṃ viratim īyuṣi pārṣadanāyake | avadhṛtārthaśarīratayā sadaḥ kalakalākulasādhuvaco 'bhavat || 79 ||

arthaśarīraṃ kāryavastu || 79 ||

vākyaṃ navāmbudagabhīraravaṃ tadīya- m ākarṇya pārṣadapateḥ sabhayā tadānīm | saṃhṛṣṭayāśu lavalīlatayeva tatra saṃbhāvitātanuphalodayayā babhūve || 80 ||

pārṣadapatiḥ śivaḥ || 80 ||

ābaddhavismayavidhūnitam ūrdhabhāga- helotpatadvikaṭaratnavataṃsabhṛṅgaiḥ | tadvākyam asya surasaṃhatayaḥ śaśaṃsu- r udgīrṇamohatimirā iva karṇarandhraiḥ || 81 ||

utpatadbhramaratvāt karṇavivarair udvāntamohatamasa iva surasaṃghās tadvākyam asyābhyanandan_ || 81 ||

iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye 'ṭṭahāsanayopanyāso nāma dvādaśaḥ sargaḥ |

iti rājānakajayānakasūnor alakasya kṛtau haravijayaviṣamapadoddyote dvādaśaḥ sargaḥ ||