ekādaśaḥ sargaḥ|
śrutvāsya vācamiti taṃ vikaṭāṭṭahāsa-
phenacchaṭācchuritadiktaṭamagnidaṃṣṭraḥ|
cukṣobha sindhuriva saṃsadi kālakūṭa-
rekhākarālavikaṭabhrukuṭīvibhaṅgaḥ||1||
saṃvartavāridaghaṭāvikaṭābhinīla-
cchāyandhakārakalupīkṛtadigvibhāgām|
ābhaṅginīṃ bhrukuṭimutkaṭakopavahni-
veṇīlatāmiva babandha sa kālarātreḥ||2||
vyāvṛttimaṇḍalitaromalatālavāla-
cakrāyamānavikarālakaṇāni kopāt|
sasyandire sadasi gharmajalāni tasya
tanvanti ratnakavacaśriyamāśudehe||3||
krodhastathāsya vavṛdhe bhrukuṭīvibhaṅga-
lekhātaraṅgitalalāṭataṭānanāgraḥ|
bharturyathānadhigatoddhataśāsano 'pi
saṃhartumāśu bhuvanatritayaṃ sa aicchat||4||
tasya ghnataḥ karatalena karālamaṃsa-
kūṭaṃ ruṣā nakhamayūkhaśikhāḥ khacantyaḥ|
ūhuḥ kaṭhorabhujapañjarapuñjyamāna-
durvāravikramamṛgendrasaṭāvilāsam||5||
aucityaśāli sarupo vacnaṃ vivakṣo
tasyāhatāṃsaśikharasya vivṛttilīlā|
sannāyikeva sadasi pratipannapīṭha-
mardā rarāja kuṭilonnamitāñcitabhrūḥ||6||
hṛtpuṇḍarīkamiva tasya suraiḥ saroṣa-
pādābhighātakṛtarandhrapathena pṛthvyāḥ|
pātālakukṣikuhare maṇiraśmirāga-
piṅgaṃ vyalki pṛthuśeṣaphaṇāsahastram||7||
bibhratsa saurabhabharākuladvirepha-
mālaṃ maṇistabakakarṇaśikhāvataṃsam|
aṃsopadhānabhujatalpaniviṣṭayeva
lakṣmyārpitaṃ nijakarādvikacāravindam||8||
utsarpidarpajādhisphuradūrmisaṃgha-
saṃghaṭṭaghorataraghoṣanibhāravaśrīḥ|
līlāvivṛttanijadehabharāvarugṇa-
ratnāsanāśithilasaṃdhiridaṃ babhāṣe||9||
(yugalakam)
satyaṃ girā tava vibhūṣita eva nīti-
mārgo nisargagahano 'pi gaṇendra guryvā|
ekaiva sā jalanidherudiyāya candra-
lekhā samaskuruta yā śitikaṇṭhajūṭam||10||
utpadyate jagatiko 'pi sa eka eva
yasyoktiṣu sphurati sarvamanoramor 'haḥ|
anyaḥ sa kalpaviṭapī maṇimañjarīṣu
cintāmaṇiḥ stabakatāmupayāti yasya||11||
kṣobhaṃ na yā vrajati jātu nayārthatattva-
garbha parā tava gaṇādhipa sātra vāṇī|
paṅkatvameti na madhusthitikāraṇaṃ yā
sānyaiva saṃbhṛtaguṇā kusumasya dhūliḥ||12||
ākāradāruṇatayāpi mamānvitasya
vākyaṃ vilakṣaṇamabhiplutituccharūpam|
asthāsnu tūlamiva śālmalipādapasya
saṃśrūyamāṇamupayāsyati hāsyatāṃ vaḥ||13||
helāparibhramaṇamaṇḍalitena yasya
nīlatviṣāridalanādasinā raṇeṣu|
vaktreṇa manmathariporiva nirmalāṭṭa-
hāsacchaṭā vicakare bhuvaneṣu kīrtiḥ||14||
sa jyotiriṅgaṇagaṇairiva vajramuṣṭi-
ghātocchaladvikaṭakaṅkaṭavahnileśaiḥ|
yasyājidurdinamukheṣu kṛpāṇamegha-
dhārā jahāra ripupaṅkajakoṣalakṣmīm||15||
yasyāśu kīrtibakulāvalirātatāyi-
senāvadhūvrajamukhaskhalitaiḥ salīlam|
ninyevikāsamasakṛnnavaraktaśīdhu-
gaṇḍūṣasekavisarai raṇakānaneṣu||16||
tasyāpi nāma bhavataḥ sakalārthaśāstra-
tattvāvagāhanagabhīramatipragalbham|
ākarṇya vākyamamarā nayamārgaśāli
śaṅke bhavanti saviśeṣaraṇābhilāṣāḥ||17||
(kalāpakam)
uddāmadānavavarūthavatīsamīka-
saṃmardayogyamaparaṃ kṣitipīṭhapṛṣṭam|
nirmitsyamānamiva paśya hariṃ saroṣa-
ratnāṅgadaprakarapeṣaparāgapuñjaiḥ||18||
saṃrambhagarbhagurumanyujuṣastrilokīṃ
kurvanti sāṃpratamamī musalāyudhasya|
śvāsā vighūrṇanavisaṃsthulatigmaraśmi-
bimbāhitā niyatadeśadinatriyāyāmām||19||
bhītiṃ tanoti vikaṭabhrukuṭīvilāsa-
velladviṣadrumalatāṅkalalāṭasānuḥ|
krodheśvarakṣitidharaḥ pratipakṣakopa-
kalpāvasānapavanāhitatīvrakampaḥ||20||
saṃvartameghamalinacchaviraprakampa-
kopasya huṃkṛtihutāśanadhūmavartiḥ|
ābhātyamuṣya kavalīkṛtakāladeha-
cchāyeva vaktrakuhādabhiniṣpatantī||21||
bhrūbhaṅgameṣa vidadhāti yathā yathā ca
saṃrambhapāṭalavilocanatā. mvidhatte|
niṣpiṣṭahāralatapāṇipuṭo yathā ca
pekṣyatyavaśyamacireṇa tathāsurāṇām||22||
roṣānubandhadṛḍhapīḍitadantapaṭṭa-
saṃghaṭṭavahnimiva tarpayati triśūlam|
tatkoṭiniṣṭhuravidaṣṭanijauṣṭhapṛṣṭha-
viṣyandisāndrarudhirāhutibhiḥ purastāt||23||
kālī maṣīmalamalīmasamāṃsalārci-
ruddāmadhāmakaravālakarālabāhuḥ|
durgāhatāṃ pralayakālanavābhrakāya-
sacchāyakāliyalayā yamuneva dhatte||24||
stamberamānanamamuṃ vikaṭā viṣāṇa-
daṇḍaprabha kumudakhaṇḍaviṣāṇḍuraśrīḥ|
mandākinīva gurusaṃgarabaddhakakṣya-
meṣā vicumbati mukhe tanayapriyatvāt||25||
lajjānatānanatayā raṇaśauṇḍadarpa-
kaṇḍūyanadrumabhujo 'tra vibhāvyate 'sau|
māṇikyakuṭṭimamayūkhajalaṃviṣāṇa-
līlāmṛṇālaśakalena pibannivaitat||26||
vākyaṃ tavaitaditi śuśruvuṣaḥ salīla-
mākṣiptanītigahanaṃ sadasīndumauleḥ|
paśyādhunātivimalāpi guhasya vaktra-
cchāyā gaṇādhipa malīmasatāṃ bibharti||27||
ekībhaviṣyati raṇe karavālaghāta-
bhītipraṇaśyadasureśvaradarśanotthaiḥ|
hāsāṃśubhistava yaśaḥ stabakāyamāna-
māśālatāsu śiśirāṃśumarīciśubhram||28||
pratyarthino madabharoddhurakaṃdharasya
śaktiṃ dadhaddalitabhūdharasaragurvīm|
kīrtiṃ mṛṇāladhavalāmahamuddharāmi
dantārgalāṃ gaṇapateriva kārtikeyaḥ||29||
kiṃ kālakhañjanikarairmama jṛmbhamāṇa-
vātāpibhiḥ sphuradariṣṭadurantaśalyaiḥ|
tāndaivadagdhavapuṣo raṇamantareṇa
naṣṭātmanaḥ prathamameva na vettha kasmāt||30||
avyāhataprasaratāṃ bhuvanatraye 'pi
prāptābhravartma paripūrayatu kṣaṇānnaḥ|
pratyagrapattramakarā suranātha jahnu-
kanyeva sindhusalilaṃ yudhi bāṇapaṅktiḥ||31||
āpāṇḍurībhavatu vaḥ pratipakṣapakṣa-
nārījanasya vadanaṃ pativiprayoge|
duḥkhāgnidadhahṛdayendhanabhasmadhūli-
puñjairivābhihatamucchvasitavyudastaiḥ||32||
saṅgrāmaraṅgabhuvi cārutarāṅgaśobhā-
saṃdarbhavatyatirasāddviṣato 'pasārān|
sannartakīva vidadhātu kṛpāṇadhārā-
lagnena śauryavibhavena padaṃ jayaśrīḥ||33||
ālakṣyāṃ kṣititalaṃ dṛḍhavajramuṣṭi-
niṣpiṣṭakuñjaraghaṭonnatakumbhamuktaiḥ+|
muktāphalaiḥ sphuritadīdhitipakṣmapaṅkti-
śauryadrumastabakavibhramamākṣipadbhiḥ||34||
saṃrambhavibhramabhṛtāṃ yudhi manyugarbha-
mujjhantu dharmajalaśīkrabinduvṛṣṭīḥ|
sārdhaṃ lalāṭakaṭakā bhavatāmarāti-
sīmantinījanavilocanabāṣparpūraiḥ||35||
āyodhane gajaghaṭāvikaṭāsthikūṭa-
kumbhasthalaskhalitakhaḍgakhaḍatkṛtirvaḥ|
antardadhātu madhuraṃ jayaśabdatāra-
kolāhalaṃ nabhasi khecarasaṃhatīnām||36||
saṃsphoṭavisphuṭarasasphuṭitavraṇottha-
raktacchaṭāciraruco gajagaṇḍameghāḥ|
muñcantu dānajalavṛṣṭimamānasasya-
kṣetraṃ vidhātumahunā suravairicakram||37||
abhyarṇatauṇikavikīrṇavikarṇaghāta-
rugṇāmarārikarikarṇamudīrṇasattvam|
tūrṇaṃ vitīrṇabhayamastu raṇaṃ nidāgha-
saṃśīrṇajīrṇataruparṇavanāyamānam||38||
niṣpiṣṭalocanayugaṃ dṛḍhavajramuṣṭi-
piṣṭāsthikūṭaśirasaṃ vidadhe surārim|
vajrābhighātadalitātanukūṭakoṭi-
vistrastaratnaśakalāñjanaśailakalpam||39||
prāpya kriyāsamabhihāramahaṃ prakarṣa-
paryantavartinamupoddhṛtaśailaśṛṅgān|
saṃhāramāruta iva prasabhaṃ kṣuṇadbhi
saṅgrāmasīmni tarasā suraśatruśailān||40||
saṃbhrāntavibhramavatīkarapuṇḍarīka-
dhūtā vipāṇḍuraruco mama cāmaraughāḥ|
utpādayanti bata śokajarāmivāri-
helānikārakaluṣīkṛtacittavṛtteḥ||41||
tīvrātmano dalayataḥ karavajramuṣṭi-
ghātena dānākulācalacakravālam|
vyāpāritā yudi bhaṭaiḥ kṛpaṇāḥ kṛpāṇa-
paṭṭā bhavanti mama nūnamamī purastāt||42||
āropito 'pi sakalāsurasaṃprahāra-
bhāro bharāya na bhaviṣyati me 'tra bāhau|
saṃhārakolavapuṣaḥ khagaketanasya
daṃṣṭrāgrabhāga iva ratnavatīniveśaḥ||43||
uddāmakuñjaraghaṭonatakumbhapīṭha-
mardo hitāhavakalāsu vicakṣaṇo 'ham|
tāṃ nāyikāmiva jayaśriyamābhimukhya-
meko nayāmi nayanirviṣayaikavṛttiḥ||44||
lakṣmīmakhaṇḍanavasū raṇabhūmiretu
nānādhvajāṃśukakṛtāṃ suradāruṇāsau|
adyaiva deva hariṇārahitā himādri-
sānusthalīva pṛthuvaṃśakarīrarāśiḥ||45||
kailāsaśailamiva bāhubalena loka-
munmūlayantamahitaṃ bahudoṣamekaḥ|
tīvrārtinādamukharaṃ caraṇena nātha
niṣpīḍya saṃprati tavānukaromi līlām||46||
saṅgrāmavartmani bhayānakatāṃ gatena
cakreṇa nātha dadhatāpi sudarśanatvam|
rāhorahāri hariṇāśu yadottamāṅga-
māsaṃstadā ditisutāḥ kva samīkaśauṇḍāḥ||47||
etena kiṃ nu kavalīkṛtasūryacandra-
bimbena rāhuśirasā sphuratāntarikṣe|
cāmuṇḍayā kimiti muṇḍamakhaṇḍameta-
dutkṛtya māṃsamadhunā dhriyate na pāṇau||48||
baddhe balau balavatā madhusūdanena
bhinne hiraṇyakaśipau ca sakāñcanākṣe|
duraṃ vyapāstamadhunā bhujadaṇḍadarpa-
kaṇḍūvinodanasukhaṃ danujāhave vaḥ||49||
tadvāḍavaṃ vadanamātramanucitīstha-
maurvānalaḥkathamivādhivasedudarciḥ|
tasyāspadaṃ kavalitākhilavāhinīśa-
tigmatviṣaḥ kupitavīrakṛtāntavaktram||50||
tejasvitāmupagato 'pi mṛduḥ prakṛtyā
kārye kvacinna khalu gaṇyata eva nūnam|
madhye kilāhutibhujāmatanuprakāśa-
micchanti pañcatapasastapanaṃ na candram||51||
udvṛttamattakarikūbarivājipatti-
duḥsaṃcaratvamupajagmuṣi saṃgarāgre|
kṛttārikaṇṭhaghanaśoṇitapaṅkilāṣi
nistriṃśayaṣṭiramalaiva bhaṭasya pāṇau||52||
tejo vikāsi dadhataḥ karacakravāla-
līlāgṛhītakakubhaḥ śucimaṇḍalasya|
bhānordinasthitirivāparivṛttiśūnya-
maikātmyameva bhajate kṣitipasya lakṣmīḥ||53||
jyotsnāvitānaparipāṇḍuruco na jātu
kīrterjano bhajati bhājanatāṃ vijihmaḥ|
daṇḍatvameti kuṭilo jayavaijayantyāḥ
pratyagrakaṇṭakaśikhājaṭilo na vaṃśaḥ||54||
tucchopamānapadavīmupajagmuṣāpi
niḥsāratāmapi gatena jaḍātmavṛtteḥ|
kroḍe nyadhāyi hariṇena padaṃ yadasya
candrasya paśyā phalaṃ tadanūṣmatāyāḥ||55||
tajjāḍyasaṃbhṛtivijṛmbhitameva tasya
tejasviśabdasadṛśaṃ vidadhāti nāsau|
nirhīka indursakṛttapanāvadhūta-
cchāyo 'pyudeti niśi yatpratikāraśūnyaḥ||56||
ājanmano 'pi capalā niyamena tatra
lakṣmīḥ kathaṃ na nivasedaravindakhaṇḍe|
tiṣṭhanti yasya pariṇāmaśucāvakhaṇḍa-
koṣasthiterguṇagaṇāḥ sakṛdeva daṇḍe||57||
śāntiṃ na yāyaparthā paraviprakāra-
pāṃsurjagatyatanusaṃbhṛtireṣa tāvat|
tigmābhitāpaśamanāya kṛpāṇamegha-
dhārājalānyaviralaṃ na patanti yāvat||58||
ādhāradhāmni racitasthitiralpake 'pi
tucche 'pi tejasi parisphurati sphuṭaṃ śrīḥ|
dīpo 'pi muñcati śikhāṃ bhavanāndhakāra-
nirvāsanāya kimutāvasare pravīraḥ||59||
anyeṣu satsvapi nisargavinirmaleṣu
manye mahājanadhurāṃ katicidvahanti|
ekaḥ sa kamburudabhūdvimalo 'mburāśe-
ryaḥ pūryate madhuripormukhamārutena||60||
tigmatviṣaḥ parimitākhilamānameva
tejaḥ prakāśitajagatsthitamatra bimbe|
tejasvinaḥ punaraparyavasānameva
manye tadatra hṛdaye nivasatyasahyam||61||
bhrūbhaṅgamāśu diśatolbaṇaroṣarūkṣa-
makṣṇośca rāgamupapādayatāsahiṣṇoḥ|
vāmabhruvāmatanumānaparigraheṇa
ceto dunotyabhimukhaṃ sphurito 'dharo 'pi||62||
vistāraśālini hṛdi prathimānamāpya
lokāstrayaḥ kila vasanti rathāṅgapāṇeḥ|
saptāpi dhīrahṛdaye savikāsameva
tiṣṭhanti tesphuṭamiti sma mamaiṣa tarkaḥ||63||
ājanmano 'pyakṛtapūrvatayā pareṣāṃ
sādhāraṇatvarahitāṃ puruṣaprakāṇḍaḥ|
pratyagratārakaguṇāṃ nijapauruṣasya
cchāyāṃ vimuñcati niśāmiva śītaraśmiḥ||64||
kāryaṃ bhavetkvacana kiṃcidaṇīyasāpi
sthūlairalaṃ tanubhṛtāmupayogavandhyaiḥ|
kṣmābhṛttaṭeṣu varamastu tṛṇolapādi
kiṃ gaṇḍaśailanikaraiḥ pṛthugaṇḍakalpaiḥ||65||
niṣṭhyūtadīdhitiśikhādalitāndhakāra-
rāśirvaraṃ maṇirasau tanurapyanarghaḥ|
kṣoṇībhṛtāṃ kaṭakavartmani kiṃ nu kṛtya-
maṃśuśriyā virahitairnanu gaṇḍaśailaiḥ||66||
lūtākṛto varamasau jagatīha tantu-
rāruhya nākamadhirohati kīṭako yam|
astācalasya śirasonnatiśālinā ki-
mālambanaṃ na taraṇeḥ patato divo yat||67||
tuṅgātmatāstaśikharasya mudhaiva bhāno-
rnālambanaṃ bhavati yatsamaye prapitsoḥ|
ślāghyaḥ sa tāmarasanālaguṇo 'pi daitya-
bhītyā yametya marutāṃ patirālalambe||68||
āplāvitakṣititalā vaḍavāgnivaiva
sā dahyatāṃ jalanidhervaramambhasāṃ śrīḥ|
śaktā na yonnatikṛto vapuṣaḥ pramārṣṭu-
maṅkotthitasya śaśino 'pi kalaṅkalekhām||69||
ūrdhvaṃ gatābhiravaṭāspadapādapasya
śākhāśikhābhiralamunnatiśālinībhiḥ|
ślāghyāmadhogatimapi skhalatāṃ kadāci-
dālambakāraṇamavaimi jaṭāvalīnām||70||
bhrūbhaṅgamāracaya niṣṭhuraroṣarūkṣa-
mudvartayekṣaṇapuṭau daśa dantavāsaḥ|
hārāṃllunīhi paripiṇḍḍhi mithaḥ karāgra-
yugmaṃ jahi kṣititalaṃ paṭupārṣṇighātaiḥ||71||
āsphālayāṃsaśiharaṃ śikharānukāri
garjābhranādamukharasthiti bhinddhi dhairyam|
itthṃ vṛthā viphalamatsaramīhamāna-
metanna saṃprati vibhāti sadaḥ smarāreḥ||72||
(yugalakam)
na bhrūvibhaṅgaracanā vadane na cāṃsa-
deśāhatirna daśanacchadadaṃśayogaḥ|
krodhānubhāvaghaṭanena vinā kṣaye 'gni-
rbhasmīkaroti bhuvanāni ca duḥsahārciḥ||73||
helāvaropitakulācalacakrabāla-
lokāpavartanasamarthabhujāḥ kva yūyam|
saṃrambha eṣa ca visaṃvadadānanendu-
bimbadyutiḥ kva bhavatāṃ ditijāhaveṣu||74||
saṃkṣepa eṣa gadito vacanaprapañca-
saṃcodanena kimivorjitatejasāṃ vaḥ|
daityendraḍāmarasamīkaniyogameva
vākyārthamatra mama kiṃ vibudhā manudhve||75||
vighaṭitaguruparvotsedhamabhyunmiṣanme
dahatu ditijavaṃśaṃ krodhahuṃkāravahniḥ|
punarapi puruhūtaḥ svāṃ urīṃ ratnasānā-
vadhivasatu pureva stūyamānaḥ suraughaiḥ||76||
iti śrībālabṛhaspatyanujīvino vāgīśvarāṅkasya
vidyādhipayaparanāmno mahākave rājānakaśrīratnākarasya kṛtau
ranāṅke haravijaye mahākāvye 'gnidaṃṣṭrārabhaṭīvarṇanaṃ
nāmaikādaśaḥ sargaḥ|