||śrī gaṇeśāya namaḥ||

itthaṃ gaṇādhipatikopakṛṣānuśānti- hetor ivendumaṇihāralatāguṇeṣu| muñcatsu śaṅkarakirīṭakarālacandra- khaṇḍāṃśupātavaśatas śucivārivarṣam_||1|| prālambamauktikaparisphuradaṃśujāla- jyotsnātapacchuraṇapāṇḍuritāntarāsu| pītāripakṣaśaśiśubhrayaśassvivāsi- yaṣṭiṣv anekabhaṭapāṇitalasthitāsu||2|| māṇikyakandukamamandaravendubimba- śobhādharaṃ karatalāgravivartanābhiḥ| ālānitasya bhujakalpatarau vidhāna- piṇḍaṃ diśann iva parākramakuñjarasya||3|| paryaṅkabandhaghaṭanāvikaṭena kāla- kāyatviṣā viṣadhareṇa parītamūrtiḥ| paryantavarti dalitāñjanadhūlipuñja- sacchāyasindhuparikhakṣitimaṇḍalaśrīḥ||4|| ākṛṣya kālamusulo musuloṃ salīla- mamāṃsalāṃsaśikharaskhaladuttarīyaḥ| vākyaṃ nirargalamudāharadabhranāda- sāśaṅkatāṇḍavitaṣaṇḍakhanīlakaṇṭham_||5||

pañcabhiḥ kulakam_||

yeṣām avastuviṣayaḥ prathitaḥ kilātma- lābhaḥ parasparakṛtaḥ plavamānavṛttiḥ| dūraṃ vyatītya nikhilān khalu tān vikalpāñ śabdāṃś ca yas sthitim asaṅkaramūrtir āpat_||6|| yenāsakṛt pralayakālaniśāvatāra- prārabdhatāṇḍavanirargalaḍambareṇa| utkṣiptamambaram ivāparamūḍhasāndhya- rāgaṃ vinirgaladasṛgdvipacarmababhre||7|| yasyābhrasindhusalilorbhighaṭāsamīra- paryatamūlaparivartikirīṭacandram_| cchedābhiyuktakarajāgram ivaiti lakṣmīm adyāpi mūrdhni parameṣṭiśiraẖkapālam_||8|| yasyādrirājasutayā ratimaṇḍaleṣu vinyastayāvakarasaḥ karajas salīlam_| helāvilūnanalināsanavaktranāla- viṣyandisāndrarudhirārdra ivāluloke||9|| sandhyāsu yasya nayanāgniśikhāsahasra- sīmantyamānatimiraṃ suravartma dhatte| paryantavartisalilasphuradaurvavahni- hetiprakāśakapiśodarasindhulīlām_10|| yasyordhvalocanamanindhanadhūmarāśi- radhyāsta etad anapekṣitareṇulakṣmā| akṣuṇṇa eva dahanas skhaladuttamāṅga- gaṅgājalokṣaṇaśamānuguṇetarārciḥ||11|| yasya vyalokyata suraiḥ puradāhakāle helordhvakṛṣṭam abhisaṃhitasāgnibāṇam_| bāṇāsanaṃ saralasaṅgabhujaṅgaghoṇa- bhāsvattṛtīyanayanabhrukuṭīkarālam_||12|| līlākirātavapuṣo dadṛśe śarīra- cchāyā ca yasya rabhasena vanecaraughaiḥ| antarnigūḍhagalagocarakālakūṭa- kūṭaprabhāpariṇater iva mecakaśrīḥ||13|| mukte pi kāraṇakirātavapuṣyudagni- netraprabhāruṇitamauktikahāralekham_ yasyādrirājaduhitābhimukhī babhāra guñjāphalastragupagūḍham iva stanāgram_||14|| mādhuryam akṣataguṇaṃ dadhataṃ rasasya saṅkṣobitākhilasurāsuracakravālam_| akṣuṇṇam eva makaradhvajam ūrdhvacakṣur aurvānalas sapadi yasya vibhoradhākṣīt_||15|| na spṛśyate pi kamalaprabhavo yadīya- māyākavāṭapuṭapāṭanapāṭavena| asmin prabhau tribhuvanasya nikāraleśa- sambhāvanāpi kurute parato nutāpam_||16||

ekādaśabhiḥ kulakam_|

asyāvahe ka iva śūlam idaṃ saheta śākhānalakvathanadussthitasāgarāmbhaḥ| bibhraj jagat kavalanotthitakālarātri- kopotkaṭabhrukuṭibhaṅgabhayaṅkaratvam_||17|| etatkarāspadamarālaśikhākarāla- śākhāntarālataralānalavisphuliṅgāḥ etasya muñcati jagatkṣayakālavahni- bījacchaṭā iva diśo daśa śārayantīḥ||18|| paśyatsu bhītividhuraṃ vibudhādhipeṣu tīkṣṇāgrakoṭikarajakrakacena kopāt_| asyattamāṅgamaravindasado py amanda- mucchindatas sadasi kaḫ pratibandhako bhūt_||19|| daṃṣṭrākarālamukhakandarakoṭibhāga- helāvidāritagajāsuraghoramūrtiḥ| pañcānanatvam anaghaṃ surasiṃha eṣa cūḍāśaśāṅkakalikāsaṭayā bibharti||20|| asya sthitā śirasi śekharacandrakhaṇḍa- samparkaśītataratuṅgataraṅgabhaṅgā| uddāmadhāmaraviśoṣitasaptasindhau saṃśoṣameti na jagatpralaye 'pi gaṅgā||21|| asya kṣayeṣvalikalocanatīvravahni- tāpasphuṭatkanakakarparadarpaṇāgre| vispaṣṭamadritanayā vadanaṃ vilokya padmāsanāṇḍam akhilaṃ saphalīcakāra||22|| saṃvartakālarajanīṣu vijṛmbhamāṇam asyālimecakaruci sphurad etadāsyam_ viśvaṃ viśatpralayameti tadandhakāra- bījāyamānam abhito diśi dakṣiṇasyām_23 dūre thavaiṣa viṣayīkṛtasaptaloka- duẖkhānalaprabhavabhāvavikāraśūnyaḥ| āstāmaśeṣamahadādiviśeṣaniṣṭha- viśvodayasthitivināśadaśaikahetuḥ||24|| lakṣmīm apūritapadatraya eva daitya- nāthasya samprati baler iva śārṅgapāṇiḥ| paśyatsu dānavabhaṭeṣv aham ākṣipāmi cakrāṃśupiñjaritapīvarabāhudaṇḍaḥ||25||

yugalakam_||

kṣundanriporvighaṭamānadṛḍhāsthisandhi- bandhāṃś camūparivṛḍhānahamūḍharīḍhaḥ| kālasya kiṃ musulatām adhunā vidhāya nāmno bibharmi yudhi tatpuruṣārthatattvam_||26|| paryantavartijalarāśitaraṅgabhaṅga- cīnāṃśukāracitacañcalacīracihnam_| kṣmāmaṇḍalaṃ karagṛhītasumerudaṇḍo līlātapatram iva kiṃ sahasoddharāmi||27|| diksundarīrupadihānamahānibhāgbhir acchācchacandanarasair iva māṃ yaśobhiḥ| paśyantu samprati bhaṭā dṛḍhapārṣṇighāta- paryastahemagiribhagnasvarāricakram_||28|| eko bhujas sarasacandanapaṅkadigdhaẖ kartuṃ kṣamo virahiṇīrmama dakṣiṇo yam_| kampākulā malayavāyur ivātatāyi- nārīlatā galiꣻtabāṣpakaṇaughapuṣpāḥ||29|| dikcakravālarabhasagrahaṇapragalbha- daityāndhakāranikaravyavadhānamagrām_| bhāsvān ivāṃśu divasacchavimuddharāmi jiṣṇoś śriyaṃ rudhirapāṭalamaṇḍalāgraḥ||30|| svedacchaṭārdrakarapṛṣṭakarālahāra- dhūlicchaṭārudhiracandanapaṅkacarcāḥ| neṣyati śoṣamacirānmaruto mamāri- bandīkarāvadhutacāmaramaṇḍalotthāḥ||31|| kampākulībhavad anekapalokapāla- pālīkapāladalanotpulakaṃ kapolam_| eko pi kopakapilaṃ dadhadutkṛpāṇa- pāṇiḥ kṛṇomi karuṇākṛpaṇo ricakram_||32|| gāmbhīryaśāliṣu raṇāmburuhākareṣu muktvā guṇān bhavati kiṅ karalagnamanyat| paṅkābhilābhisalatā iva daityarāja- senā vṛṣāṅka mama khaṇḍayato viśaṅkam_||33|| saṃrambhiṇo mama vidhūtatamālaṣaṇḍa- cchāyāsu dānavavarūthavatīṣu saṅkhye| nistriṃśayaṣṭiṣu nidāgharucerivāsu tejo dhunā sphuratu tigmataraprakāśam_||34|| bibhraty abhīkṣṇam atiśāyi hi saukumāryaṃ śaktā na kaṇṭakakṛtaṃ kṣitim eva soḍhum_| vismāpinī ca vidadhātu niśātakhaḍga- udhārāpathena padamaskhalitaṃ na lakṣmīḥ||35|| dvāri śriyo mama bhujārgaladaṇḍa eṣa nispandatāṃ nayatu samprati samprahāre| anyonyamāttaghaṭanābatanū kavāṭa- paṭṭāvivobhayavarūthavatīniveśau ||36|| līlāvarāha iva nirvarapīvarāṃsa- kūṭasphuratpravikaṭāṅgada eṣa bāhuḥ| paryastakāñcanagiriḥ kṣapayan vipakṣānn ujjṛmbhatāṃ mama navāmbudamecakaśrīḥ||37|| anyonyamatsaradurutsahabāhudaṇḍa- darpodayoddhurasurāsurakṛṣyamāṇām_ lakṣmīm upendra iva mandaraśailamūrtim ekaẖ karomi bhujapañjarasannibaddhām_38|| svacchaṃ yaśonivahamāvahatu trilokī- līlātmadarśam acireṇa viśeṣato me| saṅgrāmadhāmanihatātanubāhudaṇḍa- darpoddhatāhitacitārajasaiva hastaḥ||39|| śaknoty anugraham abhīkṣṇam apagrahaṃ ca kartuṃ mahān hi mavatas samaye mahasvī| bhānuḥ kṣaye viparipūrayatīndum āśu vicchāyatāṃ ca nayati prasabhaṃ prabhāte||40|| ambhodarājimalinātanukālakūṭa- lekheva manmatharipos samavartisīmā| kaṇṭhagrahaṃ samaravartmani pūrvadeva- nāthasya samprati karotu mamāsiyaṣṭiḥ||42|| te kūṭaśalmaliviśaṅkaṭakaṇṭakaugha- tīkṣṇāgraniṣṭhuranikartunakṛttakaṇṭhāḥ|| nālokitā prabhuvipattir itīva nātha nṛtyantu sambhṛtamudas samare kabandhāḥ|43|| āyodhane śravaṇatālavidhūtakumbha- sindūradhūliparipāṭalitaṃ madāmbhaḥ| muñcantu śoṇitam iva pratipakṣacakra- senāvināśapiśunāgajagaṇḍameghāḥ|44|| tasyādhunaiva piśitāśanalobhalagna- helollasadvikaṭakaṅkamukhaiś śarīrāt_| ākṛṣṭaśastraśakalaughaśalākamastu sānāthyalagnam iva nātha śakuntacakram_||45|| kiṃ vā mayā bhuvanakānanasīmadāha| dāvāgnayo ripucamūcamarīmṛgendrāḥ| tiṣṭhanty amī ditijarājasamijjayaśrī- keśagrahotsukakarās tava deva yodhāḥ||46|| kharvīkṛtādrijalanirbharavārigarbha- gambhīrabhairavaravolbaṇavāraṇāsu| nirvarṇyatāṃ samaranirvaravīrabhadra- durvāratā varada vairivarūthinīṣu||47|| śatpṛttamāṅgaśakalīkṛtamucyamāna- raktāmbusekasukumāratarād abhīkṣṇam_| khaḍgālavālavalayātsaśilīmukhaugha- saṅgrāmakānanatale ciram ullsantī|48|| āśritya śūrabhujapādapam indugaura- cchāyaṃ yaśaḥ kusumarāśim upādadhānā| vistāriṇī phalabharaprasavaikahetur lakṣmīlatā sapadi vṛddhim upaiti nūnam_||49||

yugmam_||

tejasvinas samuditās sphuṭam ekam eva dhuryāvalambanam ihojjvalayanti kāryam_ saṃhārakālasaviśeṣaruco titīvram uṣṇatviṣo dinam ivodayadurnirīkṣyāḥ||50|| ākarṇanākulaghanadhvanimohamanda- mandākinīpulinamandararājahaṃsam_ ākopakampitasurāsuracakravāla- muktveti kālamusalo vacanaṃ vyaraṃsīt_||51|| sa vacanakuruvindavyañjitoddāmadhāma- vyatikaragurubhāsvac cittaratnas tadāsīt_ sadasi gaṇapatīnāṃ sūcitāntarvivakṣā- sphuradadharapuṭānāṃ vaktravinyastaddṛṣṭiḥ||52|| atha sakalatadīyorjasvivākyaprapañca- śravaṇapulakitāṅgo vīralokaś cacāla| upanataraṇalīlāniścayāsphālitāṃsa| sphuṭitaruciraratnacchāyakeyūrabāhuḥ||53||

iti śrī mahākavirājanaratnakaviracite haravijaye mahākāvye kālamusalavyahṛrtivarṇano nāmāṣṭamas sargaḥ||