dvitīyaḥ sargaḥ |

krīḍārasena sa kadācid athādhisānu līlāvalambitahimādrisutākarāgraḥ | pratyagrakāñcanalatāś citasaṃniveśa- m ākrīḍamaṇḍapam amaṇḍayad aśmadhāmnaḥ || 1 ||

aśmadhāmno naga[ra]sya sānuni sa devo līlāgṛham amaṇḍayatpraviśya bhrājayāmāsa || 1 ||

tasmin kṛtāsanaparigraham adrirāja- kanyānukūlarasadigdhakathāvidagdham | anyonyaghaṭṭanavicūrṇitaratnabandha- hemāṅgadās tam amarādhibhūvo 'dhijagmuḥ || 2 ||

tasminn aśmakūṭe śiloccaye himavati | rasena digdhā churitā | rasamayītyarthaḥ | amarādhibhuvaḥ surādhipāḥ | amī surendrā dūrād enaṃ dadṛśuḥ | iti pañcabhiḥ (itaḥ pañcadaśabhiḥ) kulakam_ || 2 ||

vellajjaṭāpaṭalaśevalavallarīkāṃ cūḍendukhaṇḍakuṭilorumṛṇāladaṇḍām | ākāśasindhum avataṃsakapālahaṃsa- hāsām amī dadhatam aikṣiṣatainam ārāt || 3 ||

jaṭāmaṇḍalam eva śevalalatā yasyāḥ | kapālam eva haṃsaḥ sa eva hāso yasyāḥ || 3 ||

karṇāvataṃsaghaṭitotphaṇadandaśūka- phūtkāramārutaparāhatalocanotthaiḥ | riktīkṛtāṃ śikhikaṇaprakaraiḥ satoṣa- gaurīkṣitāṃ suranadīṃ śirasā vahantam || 4 ||

karṇe 'vataṃsārthaṃ ghaṭitaḥ saṃyojito dandaśūkaḥ sarpaḥ | śikhinaḥ kaṇā visphuliṅgāḥ | tannikarai riktīkṛtāṃ tanūkṛtām_ | parituṣṭayomayā vilokitām_ || 4 ||

cūḍāgatena jaḍadīdhitinā tanutva- m āseduṣā sarabhasaṃ pravivikṣuṇārāt | bhāsvallalāṭataṭanākatalārkabimba- m adhyāsyamānam iva bibhratam ūrdhvacakṣuḥ || 5 ||

adhyāsyamānam abhimukhīkriyamāṇam_ | utprekṣā—pravivikṣuṇeveti | āsāditavatā | jaḍadīdhitir himāṃśur arkabimbaṃ punaḥ parituṣṭaye praviśati | cakṣuḥśālikagagane (cakṣuralikagagane) arkabimbam_ | tad ākārod vahanāt_ | nākatalaṃ gaganam_ || 5 ||

śailātmajāvadanacandramasaḥ kathaṃ nu lekhāpi me na sadṛśī śaśinā saśokam | ūrdhvekṣaṇotthaśikhinīva nipitsunettha- m adhyāsitonnatalalāṭataṭopakaṇṭham || 6 ||

lekhāpīti | me mama | nipatitukāmeneva śaśinādhiṣṭhitalalāṭanikaṭam_ || 6 ||

stamberamājinagalatkṣatajāvaseka- saṃpāditāruṇarucā kvacid uttamāṅge | tāmbūlarāgaparipāṭalayeva danta- paṅktyā virājitakirīṭakapālakhaṇḍam || 7 ||

stambaramā dantinaḥ | kṣatajaṃ raktam_ || 7 ||

jyotsnārucāmbaramalaṃ vimalaṃ diśanta- m induṃ nidhāya mukuṭe dayitāyamānam | tallāñchanacchavim ivātanukālakūṭa- cchāyāchalena dadhataṃ pṛthukaṇṭhalagnām || 8 ||

jyotsnāyāḥ śobhayā vimalam ambaram ākāśaṃ vasanaṃ ca bhagavato diśantaṃ kurvāṇam_ | dayitāyamānaṃ manoramam_ | tasyendor lāñchanam_ || 8 ||

saṃhārakālakavalīkṛtasaptalokā- m ambhodhibhārabharamantharameghanīlām | kaṇṭhāntarālaparivartinipītadhūpa- vartitviṣaṃ viṣamayīṃ dadhataṃ ca lekhām || 9 ||

tūlamayaḥ śikhāyā āśrayo vartiḥ || 9 ||

preṅkhatkarālamaṇiśaṅkhasahasraśāra- hāroragendraphaṇabhaṅguravīcicakram | kaṇṭhasthitotkaṭaviśaṅkaṭakālakūṭa- kūṭaprabhāprakarakūrmagṛhaṃ vahantam || 10 ||

maṇaya eva śaṅkhāḥ | maṇayaś ca śaṅkhāś ceti dvandvaḥ | maṇīnāṃ vā khaṇḍā ekadeśāḥ | bhaṅgurāḥ kuṭilāḥ | viśaṅkaṭo viśālaḥ | ‘veḥ śālacśaṅkaṭacau’ | kūṭa ucchrito rāśiḥ | prabhāprakara eva kūrmagṛhaṃ samudraḥ || 10 ||

bhasmāṅgarāgadhavalaṃ parapuṣṭapiccha- cchāyāṅgadoragaphaṇākulitāṃsakūṭam | aurvāgnidhūmamalinīkṛtavīcibhaṅga- dugdhormimālisadṛśīṃ śriyamāśrayantam || 11 ||

parapuṣṭaḥ kokilaḥ | tasya picchā pakṣakalāpaḥ | kūṭaṃ śikharam_ | ūrmimālī samudraḥ || 11 ||

keyūrapannagaviniḥśvasitāhatāṃsa- kūṭotthitena navadhūlanabhasmanoccaiḥ | sāvartacakram upari bhramatendubimba- saṃvāditām upagatena virājamānam || 12 ||

keyūrārthaṃ pannaga uragaḥ | sāvartacakram iti bhramaṇakriyāviśeṣaṇam_ || 12 ||

gambhīrakaṇṭhakuharāspadakālakūṭa- niryatprabhādhikamalīmasabhogihāram | vakṣaḥsthalaṃ tuhinaśailaśilāviśāla- m ālambinīlanalinasrag ivodvahantam || 13 ||

kuharaṃ madhyaṃ tadāspadaṃ yatkālakūṭaṃ tasmān niryantyā prabhayādhikamalīmaso 'dhikakālo yo bhogī sarpaḥ sa eva hāro yasya tat_ || 13 ||

aṅkāśrayāṃ rucirakāścanabhaṅgapiṅga- cchāyābhirāmavapuṣaṃ himaśailakanyām | kurvantam añjanamalīmasakālakūṭa- kaṇṭhaprabhābhir abhitaḥ punar eva kālīm || 14 ||

punar eva kālīṃ kṛṣṇām_ | svabhāvataḥ kila śailakanyā śyāmalavapuḥ | tapomahimnā tu tayā gaurīvyapadeśanibandhanaṃ gaurāṅgatvam upagatam | ity āśayenātra punaḥ[śabda]śrutiḥ || 14 ||

saṃvījyamānam asakṛtkakudopadhāna- baddhāspadaṃ dviguṇitonnatabāhudaṇḍam | lāṅgūlacāmarakarālaśikhāmarudbhi- r udbhinnabhaktimanaseva kakudmat ārāt || 15 ||

upadhānaṃ gaṇḍakam_ | marudbhir vāyubhiḥ karaṇabhūtaiḥ kakudmatā saṃvījyamānam ity anvayaḥ | kakudmān haravṛṣabhaḥ || 15 ||

sevāgatāmaragaṇādhipapārijāta- karṇāvataṃsasurabhīkṛtam aṅghriyugmam | gandhānubandhimadhupapratibimbalakṣma- śārodarair nakhaśaśiprakarair dadhānam || 16 ||

karṇe 'vataṃsabhūtāḥ pārijātā yeṣāṃ te sevārtham āgatā amaragaṇādhipā indrādayas teṣāṃ pārijātakarṇāvataṃsās taiḥ surabhīkṛtam_ | nakhā eva śaśinas teṣāṃ prakaraiḥ prakṛṣṭair aṃśubhir upalakṣitaṃ caraṇayugalaṃ bibhrāṇam_ || 16 ||

dantaprabhādalitakaṇṭhaviṣāndhakāra- cchāyasya saṃnidhijuṣaḥ karivaktramūrteḥ | ūrdhvekṣaṇānalaruco ghanacīnapiṣṭa- dhūlicchaṭā iva mukhe viniveśayantam || 17 ||

karivaktramūrtir vināyakaḥ | karivaktrā mūrtir yasyeti kṛtvā | cīnapiṣṭaṃ sindūram_ || 17 ||

(kulakam_)

tasmai praṇamya maṇimauliviṭaṅkakoṭi- ṭaṅkāhatikvaṇitakāñcanapādapīṭham | śailādinā nataśiraḥsu nivediteṣu teṣūcitāsanaparigrahanirvṛteṣu || 18 ||

śilādasya muner apatyaṃ śailādir nandī | tena murajā āṅkikādayaḥ puṣkarā ājaghnire prahatāḥ | viṭaṅka unnato deśaḥ | tatkoṭir eva ṭaṅkaḥ śastrakam_ | kvaṇitaṃ śabdaṃ kurvāṇam_ || 18 ||

ājaghnire svaraviśeṣakṛtāsthamārga- citrapracārayatipāṇilayābhirāmāḥ | vispaṣṭavādyavidhayaḥ karaṇānubandha- bhājaḥ krameṇa murajāḥ sphuṭamārjanāṅkāḥ || 19 ||

svaraiḥ ṣaḍ_jādibhir mārjanaprasaṅge viśeṣīkṛtā āsthā sthitir yeṣu murajeṣu | yad uktam_—‘gāndhāro vāmake kāryaḥ ṣaḍ_jo dakṣiṇapuṣkare | ūrdhvake paścamaś caiva mārdaṅgās tu svarāḥ smṛtāḥ ||’ ityādi | mārgādayo vādyasya tāḍanabhedāḥ | tatra mārgāḥ—āliptānāliptagomukhavitastakāḥ hastā nigṛhīto 'rdhanigṛhīto muktaś ceti prahāraśabdavācyatvena prasiddhāḥ | samahastasvastikādaya ity anye | samapracāro viṣamapracāra iti pracāraḥ | srotomukhagopucchākṛtyādayo yatayaḥ ṣoḍaśavarṇāś ca | uktaṃ ca muninā bharatena—‘kaṭatahajaḍās tu dakṣiṇamukhe 'tra gahamāś ca vāmake niyatāḥ | cadakārau caivordhve khaṭhachaṭalāś ca syur āliṅge ||’ aāiīuūeaioauaṃaḥ iti svarā vyañjanaiḥ saha saṃyogaṃ gacchantīti | ‘āyas tṛtīyo 'tha caturthako...vargās trayo...ṭhaṇanair viyuktāḥ | rephe halo la...sakārasaṃjñe vādyeṣu yuktā daśa ṣaṭ_ ca varṇāḥ ||’ iti ca bāhulāḥ | ayaṃ bharatoddeśaḥ—‘ṣoḍaśākṣarasaṃpannaṃ caturmārgaṃ tathaiva ca | dvilepanaṃ ṣaṭ_karaṇaṃ triyati trilayaṃ tathā || trigataṃ tripakāraṃ ca trisaṃyogaṃ tripāṇikam_ | ebhiḥ prakāraiḥ saṃyuktaṃ vādyaṃ puṣkarajaṃ bhavet_ ||’ iti | ‘evaṃvidhāś ca bhedā bahunā granthena lakṣitā bhavanti (?) | iha tu samagraṃ lakṣaṇamānetuṃ nahi phalaṃ kiṃcit_ || alpair vacobhir eṣāṃ na ca śakyaṃ tattvam ākhyātum_ | eṣām ataḥ svarūpaṃ tata eva yathāvad avadhāryam_ ||’ 19 ||

atra pāṭhāntaram_ |

ājagnire 'tha murajāḥ pravibhaktamārgacitrapracārayatipāṇilayaprapaścāḥ | saṃmārjanākaraṇayogavibhaktamārgacetoharābhimatavādyavidhivyavasthāḥ || 1. bharataśāstrasya pañcatriṃśanmitād adhyāyāt_. nandīśanirdayakarāhatapuṣkareṣu mandraṃ dhvanatsu murajeṣu vibhajya taṇḍuḥ | āsāriteṣu parikalpitasaptabheda- paryāptaśobham atha tāṇḍavam abhyagāyat || 20 ||

taṇḍunāmā pramathas tāṇḍavaṃ nāma gītakam ātmaproktam abhyagāyad abhimukhaṃ gītavān_ | puṣkaraṃ mukham_ | vibhajya sukumārāviddhabhedena dvividham_ | āsāriteṣu jyeṣṭhamadhyamakaniṣṭhapūrveṣu triṣu parikalpitāḥ sapta āvāpodvāpaniṣkrāmavikṣepapraveśaśamanasaṃnipātākhyabhedās tair atyantaṃ ruciram_ | āsāriteṣv abhisṛtādiṣu | ‘saptabheda’ (satribheda) iti kecit paṭhanti tatrābhisṛtaṃ parisṛtaṃ pariveditam iti trīṇy abhisṛtādīni | asau tu pāṭho bharatānusāreṇāsamañjasa iva lakṣyate | tatraiṣāṃ sapta bhedānām anukteḥ || 20 ||

kroḍīkṛtādritanayāḥ śaśikhaṇḍamauli- maulāpadānaracitastuti mātaras tat | līlālalāmalalitābhinayaprapañca- saṃcāracāru rasabhāvadṛśo 'bhininyuḥ || 21 ||

mātaro brāhmādyāḥ | tannāṭyam_ | kroḍīkṛtā madhye kṛtādritanayā yābhiḥ | maulaṃ mukhyam_ | apadānaṃ śubhacaritram_ | tadviṣayā stutir yatra | rasadṛṣṭayaḥ kāntādayaḥ | bhāvadṛṣṭayaḥ snigdhāprabhṛtayaḥ | rasāḥ śṛṅgārādayaḥ | te ca śyāmādivarṇāḥ | yad uktam_—‘śyāmo bhavati śṛṅgāraḥ sito hāsyaś ca kīrtitaḥ | kāpotaḥ karuṇaś caiva rakto raudraḥ prakīrtitaḥ ||’ ityādi || 21 ||

āpītapāṭalasitetarakundagaura- dehatviṣo lalitanartanavibhramasthāḥ | bhremur gaṇādhipatayo 'bhinayakriyāsu mūrtā rasā iva pariṣkṛtaraṅgapīṭhāḥ || 22 ||

pariṣkṛtaṃ maṇḍitaṃ raṅgapīṭhaṃ yaiḥ | ‘raṅgaśīrṣāḥ’ iti pāṭhe raṅgasya śīrṣam_ | śiraḥpīṭham ityarthaḥ | ‘aci śīrṣaḥ’ ityādau taddhite śirasaḥ śīrṣādeśavidhānāt taddhitavirahād iha tatprayoge na prāpnotīti cet_, naitat_ | vrīhyādiṣu ‘śīrṣān nañaḥ’ iti pāṭhād avasitam_—prātipādikam apy akārāntaḥ śīrṣaśabdo 'stīti | nahi pratyayasaṃniyoge tena śīrṣādeśo vidheyaḥ | tasya ‘aci śīrṣaḥ’ ity anenaiva siddhatvāt_ | pratyayavidhānaṃ tu naña eva śīrṣādiniṭhanāv iti niyamārtham_ || 22 ||

teṣāṃ puraḥ puraripau viṣamaprayoga- nṛttopadeśarabhasāt svayam ujjihāne | pātālarandhram abhavan natabhūmipīṭha- niṣpiṣṭaśeṣaphaṇaratnakaṇāvakīrṇam || 23 ||

ujjihāne udgacchati | avakīrṇaṃ saṃkīrṇam_ | puraripau śaṃbhau | viṣamaprayogaḥ saṃkīrṇāramyaprayogaḥ || 23 ||

so 'bhyutthito bhuvanam ākulayāṃcakāra vispaṣṭadṛṣṭatimiravyapalīnahaṃsam | līlāvarāha iva dhūmajaṭāsaṭāgra- viṣpandisindhujalasīkaradurdinārdram || 24 ||

bhuvanaṃ tribhuvanaṃ jalaṃ ca | (te vismayāḥ saṃkīrṇāḥ samuddhatā vā |) haṃsaḥ sūryaḥ pakṣī ca | sindhur gaṅgā samudraś ca | durdine ca prakaṭatimire haṃsāḥ pakṣiṇo vyalīyante || 24 ||

bhasmāṅgarogadhavaleṣu bhujeṣu tasya kalmāṣayatsu gaganaṃ karavartanābhiḥ | śubhrābhrarājicakitāḥ paripuñjayamāna- picchāvacūlavapuṣaḥ śikhino vidadruḥ || 25 ||

vartanā aṅgulīnām abhinayāḥ | āveṣṭitodveṣṭitavyāvartitaparivartitākhyāḥ | te cāṅgikavācikāhāryasāttvikabhedena caturvidhāḥ | paripuñjyamāna utkṣipto yaḥ piccho barhas tenācchāditavapuṣaḥ śikhino mayūrā vidadruḥ palāyām āsuḥ || 25 ||

gāḍhāṅgadoragaphaṇāphaṇiraśmirāga- rugṇāndhakāranikarāpharapārśvabhūmeḥ | śailasya bhāskararucām avadhes tadīya- bāhudrumaiḥ sapadi cukṣudire 'śmakūṭāḥ || 26 ||

rugṇo dūrīkṛto 'ndhakāranikaro yasyā īdṛśī aparapārśvabhūmir yasya tasya | bhāskararucām avadhiḥ śailo lokālokaḥ | cukṣudire cūrṇīkṛtāḥ || 26 ||

vikṣiptabāhunivahasya vihasya dikṣu tasyāṅgahārakaraṇakramakampimūrdhnaḥ | agrātipātisalilā surasindhur āpa- c cīnāṃśukojjvalatiraskaraṇīvilāsam || 27 ||

aṅgahārāḥ sthirahastādayo dvātriṃśadviśiṣṭakaraṇaniṣpādyāḥ | karaṇāni cārīsthānakanṛttahastaniṣpādinīnāṃ mātṛkāṇāṃ samāyogāḥ | te ca talapuṣpapuṭādikam aṣṭottaraṃ śatam_ | uktaṃ ca—‘yāni sthānāni yāścāryo nṛttahastas tathaiva ca | sā mātṛketi vijñeyā tadyogāt karaṇaṃ bhavet_ ||’ iti | ‘sarveṣām aṅgahārāṇāṃ niṣpattiḥ karaṇair yataḥ |’ iti ca | cīnam iti deśaṃsaṃjñā | yatra celāny atiślakṣṇasundarāṇi 'niṣpadyante | ‘cola’ iti pāṭhe colaṃ paṭṭavastram_ || 27 ||

agne ninartiṣata eva vilocanāgni- r asthāśu piñjaritadiṅmukhacakrabālaiḥ | tigmāṃśubimbakaṭakapratibaddhavṛtti- r arcibhir ātapatiraskariṇīṃ nirāsthat || 28 ||

ātapa eva tiraskariṇī javanikā tām agre 'sya nayanānalas tejobhir nirāsthat_ nicikṣepa | ‘asyatesthuk_’ iti thug āgamaḥ || 28 ||

ākṣipyamāṇavividhābhinayaprabandha- saṃdarśanārtham iva sarvadiśāṃ purastāt | vispaṣṭarecakarayākulabāhudaṇḍa- piṣṭādrikūṭanikarān akarot sa mārgān || 29 ||

ākṣipyamāṇaḥ prastūyamānaḥ | recako bhramaṇam_ | tasya rayaḥ | sa ca hastapādakaṭigrīvāsaṃdhitayā catuṣprakāraḥ | atra hastarecako gṛhyate | bāhukarmaṇi tasyaiva saṃbhavāt_ | sa īśvaraḥ || 29 ||

tasyāṅgahāravalitātanunṛttahasta- bhasmāṅgarāgadhavalonnatapīnabāhvoḥ | sāvartacakravikaṭormighaṭāsahasra- saṃkīrṇadugdhajaladhipratirūpatāsīt || 30 ||

nṛttahastā...... | āvarto 'mbhasāṃ bhramaḥ | pratirūpatā sādṛśyam_ || 30 ||

vistāraśālikanakācalabījakoṣa- cakrasya nṛttavalanāsu sahasrasaṃkhyaiḥ | phullajjapāruṇatalair bhuvanāravinda- koṣasya pattrapaṭalāyitam asya hastaiḥ || 31 ||

‘adhaḥ svarūpayor astrī talam_’ | ‘bījakoṣo varāṭikā’ | bhuvanam evāravindam_ | tadabhyantare 'sya harasya hastaiḥ pattrapaṭalāyitaṃ pattrapaṭalatvam ācaritam_ | tadrūpatayāvasthānāt_ || 31 ||

pīnāṃsakūṭaghaṭitaṃ galakālakūṭa- cchāyāniśānusaraṇārtham ivābhyupetam | tenottamāṅgavidhutiślathamaulibandha- visrastam induśakalaṃ bibharāṃbabhūve || 32 ||

ghaṭitaṃ militam_ | vidhutiḥ kampanam_ | bibharāṃbabhūve dhṛtam_ | candraś ca niśānusārī niyataṃ bhavati || 32 ||

tasyordhvalocanamarīcimato viśīrṇa- piṅgatviṣaś ciram abhāvitarāṃ purastāt | ābaddhavartanatayā vikasatkarāla- raktāṅgulīdalakulaiḥ karapadmakhaṇḍaiḥ || 33 ||

marīcimān bhānuḥ | vartanāny abhinayāḥ || 33 ||

saṃdehitā dhavalabhāsmanadhūlidigdha- taddordrumānilarayoddhatavīcibhaṅgāḥ | dugdhodadher nabhasi paprathire muhūrta- m āliṅgitātanutarotkalikābhragaṅgāḥ || 34 ||

bhāsmanacarcārcacitatvāt tasya bhagavato dordrumā bhujataravaḥ | saṃdehitāḥ kim ete 'sya dordrumāḥ syur iti saṃśayaviṣayatāṃ nītā yais tādṛśās taraṅgabhaṅgāḥ kṣīrodasya nabhasi paprathire vātāhatatvād avartanta | utkalikās taraṅgā utkaṇṭhāś ca | abhragaṅgā ākāśagaṅgā || 34 ||

pātālaveśmagatabandhudidṛkṣayeva vikṣipyamāṇamaṇibandhanabaddhasaṃsthāḥ | tasya vyadhuḥ phaṇabhṛtaḥ phaṇacakramukta- phūtkāramārutaviśīrṇajalān payodhīn || 35 ||

maṇibandhanaṃ karaprakoṣṭhayoḥ saṃdhideśas tasmin baddhā saṃsthā yaiḥ | vyadhur akurvanta || 35 ||

vyaktāṅgahārakaraṇakramakīryamāṇa- dordaṇḍamaṇḍalatayā bibharāṃcakāra | saṃhāramārutavikampitakalpavṛkṣa- kailāsaśailasadṛśīṃ śriyam indumauliḥ || 36 ||

aṅgahārakaraṇāni pūrvoktāni | vikampitāḥ kalpavṛkṣā yasya tādṛśaś cāsau kailāsaśailaḥ || 36 ||

tena vyadhīyatatarām iva vellitāgra- dordaṇḍabhasmakaṇarājibhir ujjvalābhiḥ | nirmitsyamānanijanṛttabharābhiyoga- yogyāntarālabhuvanāntarasūtrapātaḥ || 37 ||

nirmitsyamānaṃ kariṣyamāṇam_ | yogāya prabhavati yogya iti yatpratyayaḥ || 37 ||

ārabdhanartanakarāṅgulikoṭibhāga- niṣṭhyūtadīdhitiśikhālikhitācchalekham | tasyābhavat sphuradanekasahasrasaṃkhya- jihmāmṛtāṃśukalikāṅkam ivāntarikṣam || 38 ||

jihmā kuṭilāḥ | aṅkaṃ cihnam_ || 38 ||

uddāmarecakarayabhramaṇānubandha- saṃbaddhabudbudakaṇākulasiddhasindhuḥ | lakṣmīm anujjhitakirātadaśāvanaddha- nāgendrakañcuka ivāsya babhāra jūṭaḥ || 39 ||

hastapādakaṭigrīvārecakatayā catuṣprakārarecakamadhye grīvārecako 'tra gṛhyate | kañcukaṃ tvak_ || 39 ||

tadbāhughūrṇanavalanmṛgarājakṛtti- vajrāśriśātanakhakoṭinipātabhītaiḥ | digdantibhis tvaritakuñcitajānuparva- kharvībhavadvikaṭakumbhataṭair viṣede || 40 ||

kṛttiś carma | aśrir agram | śātās tīkṣṇāḥ | nakhanipātabhītatvād dikkuñjarair viṣede viṣaṇṇam_ | kharvībhavanti hrasvībhavanti || 40 ||

tasyāṅgahārakaraṇākulabāhudaṇḍa- khaṇḍāspadā sapadi kesarirājakṛttiḥ | tārāś cakarṣa karajaiś caṭulīkaḍāra- cūḍājuṣaḥ priyam ivoḍupateś cikīrṣuḥ || 41 ||

caṭulīkaḍāra ulkāvatkapiśaḥ || 41 ||

dordaṇḍamārutavighaṭṭitaśailakūṭa- dhūlicchaṭāpaṭaladhūsaram uṣṇadhāmnaḥ | uddhūlanonmṛditabhasmarajobhir aiccha- d īśaḥ pramārṣṭum iva bimbatalātmadarśam || 42 ||

uṣṇadhāmnaḥ sūryasya | ātmadarśo darpaṇaḥ || 42 ||

lakṣmīpater iva nirargaladaṇḍapāda- śākhāgrakoṭighaṭitaḥ kṣaṇam uṣṇaraśmiḥ | tasyābabhāv adhinabho 'rghajalāvasakta- padmāsanānamitaratnakamaṇḍaluśrīḥ || 43 ||

tatsaṃbandhino daṇḍapādasyāṅgulīprāntaiḥ saṃyukto ravir maṇimayaḥ kamaṇḍalur iva śuśubhe | so 'pi trailokyalaṅghanasamaye viṣṇor daṇḍapādāṅgulīkoṭibhir upaśliṣṭaḥ || 43 ||

tasyāstarīṣata navābhinayakriyāsu dikcakravālam abhitaḥ sthagitāntarikṣāḥ | ambhodhimārgagamanābhimukhāḥ śirastha- sindhupravāhanivahā iva bāhudaṇḍāḥ || 44 ||

bhujadaṇḍās tasya dikcakram āstarīṣata sthagayām āsuḥ | atra ‘liṅ_sicorātmanepadeṣu’ itīṭ_ | tasya ‘vṝto vā’ iti dīrghaḥ || 44 ||

tena vyalokyata valadbhujadaṇḍakhaṇḍa- caṇḍānilāhativighaṭṭanaviprakīrṇam | prabhraṣṭam ambaratalād vidhutottamāṅga- visrastaśekharakapāladhiyendubimbam || 45 ||

viprakīrṇaṃ bādhitam_ | kapāladhiyā kapālabhrāntyā || 45 ||

brahmāsanāmburuham āhitasarvaloka- kampe vibhoḥ śiśirakāla ivānukāre | paryantabāhuvanadhūlanabhasmadhūli- nīhārapātadalitacchadaśobham āsīt || 46 ||

lokā bhuvanāni janāś ca | anukāro nṛttam_ | dhūlir eva nīhāro himam_ || 46 ||

graiveyakoragaphaṇāmaṇicakravāla- saṃdhyāruṇoḍuśabalaṃ sthagayāṃcakāra | diṅmaṇḍalaṃ pralayakālaniśeva tasya kaṇṭhaprabhā timiranīlaruciḥ sphurantī || 47 ||

grīvāyāṃ bhavo 'laṃkāro graiveyakaḥ | ‘kulakukṣigrīvābhyo śvāsyalaṃkāreṣu’ iti ḍhakañ_ | sphurantī diṅmukhāni dīptyā vyāpnuvānā | maṇaya evoḍūni nakṣatrāṇi || 47 ||

cūḍājaḍāṃśur api jūṭajaṭānikuñja- baddhāspadaḥ pratidiśaṃ sucirād avāpa | ārabdhanartanakarānilaghaṭyamāna- tārāpuraṃdhriparirambhasukhāni śaṃbhoḥ || 48 ||

48 ||

līlāvadhūtaśiraso 'sya valaṭajjāgra- niṣpandisāndrasalilokṣitakoṭibhāgāt | uccaṇḍatāṇḍavarasasya vinirjagāma mandākinī madhuripor iva daṇḍapādāt || 49 ||

49 ||

tasyāśu śoṇitam ivojjagarur gariṣṭha- dordaṇḍaghātavidhurā girayas tadānīm | udvartanānilarayotthitadhātavīya- dhūlicchaṭāruṇitanirjharavīcibhaṅgāḥ || 50 ||

tasya bhujatarughātena nipīḍitā girayo raktam ivodavaman_ | dhātavīyā gairikādidhātusaṃbandhinī || 50 ||

tena vyadhāyiṣata bāhuvanaprakoṣṭha- baddhāsitoragaphaṇāmaṇirāgapiṅgāḥ | saṃhārakālarabhasotthitadhūmadaṇḍa- kalmāṣitānalaśikhā iva digvibhāgāḥ || 51 ||

vyadhāyiṣata vihitāḥ | ‘syasicsīyuṭ_—’ ityādinā ciṇvadbhāvaḥ | ‘prakoṣṭham antaraṃ vidyādaratnimaṇibandhayoḥ’ || 51 ||

tasyādhinṛttamanalolbaṇadṛṣṭipāta- lakṣyīkṛteṣu phaṇino maṇibandhaneṣu | tattāpakhedaparivartanalakṣyamāṇa- pītodarāḥ kanakakambuvilāsam āpuḥ || 52 ||

kambavaḥ kaṭakāḥ || 52 ||

sānandanandikaratāḍitapuṣkarāgra- cetoharāṅkikapayodharanādahṛṣṭaḥ | ārabdharecakalayaḥ kalayāṃcakāra līlāṃ sa mecakagalaḥ sphuṭacandrakaśrīḥ || 53 ||

āṅkiko harītakīsadṛśo murajaḥ | uktaṃ ca—‘harītakyākṛtis tv aṅkyo yavamadhyas tathordhvakaḥ | āṅkika(āliṅgya)ś caiva gopuccha ākṛtyā saṃprakīrtitaḥ ||’ iti | layas tatparatā | mecakagalo nīlakaṇṭhaḥ śivo mayūraś ca | candrakaś candro mayūrapicchakaś ca || 53 ||

sāvartanābhir abhito lalitāṅgahāra- śobhā manoramaparikramatāṃ vahantī | ceto jahāra dayitā rasabhāvahṛdya- rūpā kriyā puraripoḥ śubhahastadṛṣṭiḥ || 54 ||

sā kriyā nṛttalakṣaṇāvartanābhiḥ pūrvoktābhiś cittam aharat_ | dayitā manojñā, atha ca priyatamāyāś ca ratyādayo rasā bhāvāś ca | rasasya ca śṛṅgārasya bhāvāḥ | hastāḥ patākādayaḥ, hastau ca karau | dṛṣṭayaḥ kāntādyāḥ, dṛṣṭī ca nayane || 54 ||

dordaṇḍakhaṇḍavalanāny atisaṃkaṭatva- m utprekṣya no vidadhire kakubhāṃ purastāt | vinyastamandacaraṇaṃ paricakrame ca bhūmaṇḍalaṃ vidalatīti dayānubandhāt || 55 ||

55 ||

brahmāṇḍakarparaparisphuṭanābhisaṃdhe- r ūrdhvaṃ viracyata tathā na ca daṇḍapādaḥ | itthaṃ na śītakiraṇābharaṇasya nṛtta- m ādhāradurbalatayā savilāsam āsīt || 56 ||

karparaḥ kaṭāhaḥ | abhisaṃdhir ākalanam_ || 56 ||

(taraṅga)yugalakam_ |

kukṣipraviṣṭasuranirjhariṇītaraṅga- jhāṃkāratāraninadair nṛkapālapaṅktiḥ | nṛttakriyāsu vidadhāv iva sādhuvādaṃ yasyottamāṅgabhuvi sātiśayāsv amandam || 57 ||

57 ||

ālokitas tuhinaśailabhuvā sahāsa- m ākṛṣya śekharaśaśāṅkakalāṃ smarāreḥ | nṛtyanvidūṣakabhuvaṃ bhujagāriketu- r agre cakāra kuṭilonnatadaṇḍakāṣṭham || 58 ||

bhujagārir mayūraḥ | taddhvajaḥ kumāraḥ | vidūṣakākhyasya narmasuhṛdo bhūmikām abhinayann indukalām eva daṇḍākṛtikāṣṭham akarot_ | tasya daṇḍakāṣṭhahastatvāt_ || 58 ||

etāni tāni talapuṣpapuṭādikāni cetoharāṇi karaṇāni gaṇādhināthāḥ | ity aṅgahāravidhayaḥ sphuṭatatprapañca- yogāñcitasthitibhṛtaḥ sthirahastamukhyāḥ || 59 ||

‘vāme puṣpapuṭaḥ pārśve pādo 'gratalasaṃcaraḥ | tathā ca saṃnataṃ pārśvaṃ talapuṣpapuṭo bhavet_ ||’ sthirahasto mukhyaḥ prathamo yeṣāṃ te 'ṅgahāravidhayo vidhīyamānā aṅgahārāḥ | ‘prasāryotkṣipya ca karau samapādaṃ prayojayet_ | vyasitāpasṛtaṃ savyaṃ hastam ūrdhvaṃ prasārayet_ ||’ pratyālīḍhaṃ tataḥ kuryāt tathaiva ca nikuṭṭanam_ | ūrūddhṛtaṃ tataḥ kuryāt svastikotkṣiptam eva ca || nitambaṃ harihastaṃ ca kaṭīchinnaṃ ca yogataḥ | sthirahasto bhaved eṣu hy aṅgahāro harapriyaḥ’ || 59 ||

itthaṃ tridhātmakaraṇaṃ gaṇamaṇḍalīṣu saṃkrāntim asya nayato sadasi sthitāsu | paryāptadarśanasukhaṃ vinimeṣapakṣma- cakṣuḥsahasram abhavat spṛhaṇīyam aindryāḥ || 60 ||

tridhā lāsyatāṇḍavamiśrabhedāt trividham ātmanaḥ karaṇaṃ nṛttaṃ saṃkrāntiṃ nayataḥ | atra karaṇaśabda arśaādyajantaḥ || 60 ||

āviṣkṛtānukṛtivibhramanāgavaktra- līlābhyudastakarakoṭivipāṭyamānāḥ | ambhobhṛtaḥ śiśirasīkarabinduvṛnda- viṣyandino 'bhinayajaṃ klamam asya jahruḥ || 61 ||

āviṣkṛtā anukṛtir abhineyam_ | nāṭyam ityarthāntaram_ || 61 ||

itthaṃ salīlam abhineyavijṛmbhamāṇa- vispaṣṭabhāvarasavṛtti niṣevya nṛttam | sārdhaṃ nyavartata gaṇair vibhur uttamāṅga- gaṅgātaraṅgakaṇasaṃbhṛtibhinnakhedaḥ || 62 ||

vṛttayo bhāratīprabhṛtayo 'vasthāviśeṣāḥ | uktaṃ ca—‘bhāratī sātvatī caiva kaiśikyārabhaṭī tathā | catasro vṛttayo hy etās tāsu hy etatpratiṣṭhitam_ ||’ iti || 62 ||

śailātmajāvijitatadgaṇakṛṣyamāṇa- vṛddhokṣaniṣṭhurakhurāhatamandarādriḥ | tasya glahīkṛtavimugdhakiraṭicandra- khaṇḍaḥ kadācana durodaravibhramo 'bhūt || 63 ||

glahaḥ paṇaḥ | durodaraṃ dyūtam_ || 63 ||

iti samayam anaiṣīt tatra tās tāḥ sa ceṣṭā vidadhad acalakanyāviprayogānabhijñaḥ | surapatibhir abhīkṣṇaṃ ratnapaṭṭāṅghripīṭhī- luṭhitamaṇikirīṭāṣṭāpadaiḥ sevyamānaḥ || 64 ||

aṣṭāpadaṃ suvarṇam_ | athavā maṇimaulir eva vipulatvād aṣṭāpadaṃ caturaṅgaphalakam_ || 64 ||

iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye tāṇḍavavarṇano nāma dvitīyaḥ sargaḥ |

iti rājānakajayānakasūnor alakasya kṛtau haravijayaviṣamapadoddyote dvitīyaḥ sargaḥ ||