oṁ svasti|| śrī gaṇeśāya namaḥ|| ||śrī savasvatyai||

||oṁ kaṇṭhaśriyaṃ kuvalayastavakābhirāma| dhāmānukārivikaṭacchavikālakūṭām bibhrat sukhāni diśatād upahārapīta| dhūpotthadhūmamalinām iva dhūrjaṭir vaḥ||1|| jṛmbhāvikāsitamukhaṃ nakhadarpaṇānta- rāviṣkṛtapratimukhaṃ gururoṣagarbham rūpaṃ punātu janitāricamūvimarṣam udvṛttadaityavadhanirvahaṇaṃ harer vaḥ||2|| paryantavartiparipāṇḍur apattrapaṅkti- padmāsanāsanakuśeśayakoṣacakram| yuṣmān punātu dadhad uddhatadugdhasindhu- vīcicchaṭāvalyayitām araśailalīlām||3|| asty unnate surasarijjaladhāvyamāna- bhāge navārkaruci mandaraśailaśṛṅge| jyotsnāvatīti nagarī bhuvanatrayaika- bhūṣā vṛṣāṅkaśirasīva śaśāṅkalekhā||4|| yasyāṃ niśāsu gaganaṃ navapadmarāga- sadmaprabhāruṇitam adhyagatendulekham| vakṣo nṛsiṃhanakharair asurādhipasya sāsṛkchaṭaṃ viṣam abhinnam ivācakāsti||5|| jyotīrasāśmabhavanājiradugdhasindhur atyunmiṣatpracuratuṅgamarīcivīciḥ| vātāyanasthitavadhūvadanendubimba- saṃdarśanād aniśam ullasatīva yasyām||6|| gaṇḍasthalī smaghanagharmajalā rateṣu lagnāvate sakusumacyutakesarāgrāḥ| abhyāpatanmadanamārgaṇapuṅkhapakṣa- pakṣmākulā iva dadhuḫ pramadāś ca yasyām||7|| sīmantinī janamanassu samādhibhaṅga- kopānalena ciradagdham apīndumauleḥ| utthāpayan madanam āśu karai vibhāti yasyāṃ himāṃśur avalambitajālamārgaḥ||8|| yasyāṃ rateṣu pṛthupīnanitambabimba- śobhā sphurad daśanapaṅktiḥ kṛśāṅgayaṣṭhiḥ| kūrmīva puṣpadhanuṣaḥ priyapāṇijāgra- koṇāvamarṣamadhurakvaṇitāṅganāsīt||9|| yatrendranīlabhavanaṃ pṛthupadmarāga- vātāyanair ubhayapārśvagatair vibhāti| bāṇāsurasya haricakravilūnabāhu- mūlavraṇair iva vapuḥ kṣatajacchaṭārdraiḥ||10|| klāntiṃ ratāntajanitāṃ ślathayanti yatra māṇikyamandaragavākṣapathapraviṣṭāḥ| abhyarṇavartisuranirjhariṇītaraṅga- bhaṅgānusāraśiśirā maruto 'ṅganānām||11|| gaṇḍasthalapratimitaṃ sudṛśāṃ sacihna- m aśvetatenduśakalaṃ rajanīṣu yasyām| jyāghātapātakiṇaśāritum īnaketu- nyāsīkṛtācchamaṇikhaṇḍatalāyamānam||12|| yasyām aśaṅkiṣata śaṅkaraśekharendu- sandarśanotsukatayopagataṃ suraughāḥ| jyotī r aseṣṭakacitāmbaracumbidīpra- vapraprabhābharanibhena ca dugdhasindhum||13|| lakṣmīr na yāṃ bhavanamānasasamniveśa- haṃsībhir ujjvalavilāsagatikramābhiḥ| strībhir yutāṃ samaṇinūpurajhāṅkṛtābhi- r ujjhāṃ cakāra jhaṣaketanajhallarībhiḥ||14|| yasyāṃ niśāsu rucirāgurudhūpadhūma- kalmāṣitaṃ śaśabhṛtaḥ karacakravālam| śliṣyadgavākṣakaladhautakavāṭapaṭṭha- sandaṃśalagnakiṇalekham ivaiti lakṣmīm||15|| śayyāgṛhaṃ suratakelivimardaśīrṇa- karṇāvataṃsavikacotpalapattrakhaṇḍaiḥ| yatrāṅganā dalayataḥ kusumāyudhasya bhagnaiẖ kṛpāṇaśakalair iva kīrṇam āsīt||16|| yasyāṃ salīlam asitāgurudhūpadhūma- daṇḍā gavākṣavivarodarataḥ prasasruḥ| āsannacandrakarabhaṅgabhiyāndhakāra- hastā iva sphuritadīrghaśikhāṅgulīkāḥ||17|| rāgānubandhipariṇāmadaśāvamarśa- śūnyābhirāmanavayauvanapallavābhiḥ| kalpadrumavratatibhiẖ kanakādrikuñja- vethīva yā purapurandhribhir ābabhāse||18|| vaidūryapaṭṭaghaṭitār aribhir niśāsu dūrād apāvṛtamukhair iva dṛśyamānaiḥ| dvārair bibharti pihitair api yatra lakṣmī- m abhraṅkaṣā pratidiśaṃ maṇiharmyapaṅktiḥ||19|| yasyāṃ smaraḥ satatasannihite pi candra- cūḍāmaṇau vasati paurapurandhridehe| nirmuktabhītir adhirūḍhakaṭākṣabāṇa- tadbhrūśarāsanasahasrakṛtātmarakṣaḥ||20|| krīḍābjinīṣu na daridrati sāndracandra- raśmicchaṭāpaṭalanicchuritāni kāntyā| bibhranti manmathamataṃgajadantakoṣa- saṃvāditāṃ kuvalayāni niśāsu yasyām||21|| māṇikyatoraṇamṛdūravilambamāna- tigmāṃśukūbarituraṅgaśarīrabhābhiḥ| yatra kṣaṇaṃ haritapallavanirmitābhi| r ābhāty aśūnyam iva vandanamālikābhiḥ||22|| yasyāṃ bhareṇa galatas taruṇīmukhendu- lāvaṇyakāntivisarāmṛtanirjharasya| aṭṭālasālavalayaṃ vikaṭālalīlāṃ- viḍambayati cumbitabhānubimbam||23|| vyaktīkṛtāvayavacandrakalābhirāma- rūpā haranti hṛdayaṃ hariṇāyatākṣyaḥ| yatronmiṣanmadhuramugdhavidagdhahāva- bhāvānubandhikusumāyudhasaudhahāsāḥ||24|| yasyāṃ niketanalinīṣu ca lauhitīka- sopānapaṭṭarucivicchuritāntarālāḥ| lakṣmīm atāniṣur amandarucaḫ priyāya bandīkṛtendukiraṇā iva padmaṣaṇḍāḥ||25|| māṇikyakhaṇḍakhacitā smuramandireṣu yasyāṃ cakāsati vipāṭalatatprabhābhiḥ| āliṅgitāś śikharikoṭivipāṭitābhra- saudāmanībhir iva kāñcanaketudaṇḍāḥ||26|| yasyāṃ vrajaty adhiniśīthini kāntaveśma līlāgṛhītavikacotpalapāṇipadmaḥ| vaibhāvareṇa rabhasāt timireṇa datta- hastāvalambana ivāsta purandhrilokaḥ||27|| ākrīḍatāmarasinījalayantramañju- nādaiḥ kramānugatakaiśikamadhyamaśrīḥ| utkaṃdharastimitapādavidhūtapakṣa- m ākarṇyate bhaḍahahaṃsagaṇena yasyām||28|| yatrāśmagarbhakamayūkhaśikhāprakāśa- śyāmīkṛtā bhavanapuṣkariṇītaṭeṣu| ceto haranti pariṇāmi ciropabhukta- śevālasaṃhatirasā iva haṃsayūthāḥ||29|| yasyāṃ harinmaṇivinirmitaharmyaraśmi- līḍhodarāḥ pratidiśaṃ niśi tārakaughāḥ| udbhinnakomalakuśāṅkurakoṭilagna- naiśodabindupaṭalaśriyam āliliṅguḥ||30|| lāvaṇyanirbharapurandhrimukhāvadhūta- cchāyo dadhat kaluṣatāṃ hṛdayena yasyām| indur niśāsu maṇikuṭṭim abimbyamāna- mūrticchalena viśatīva rasātalāntaḥ||31|| prātaś cakāsati gṛhodarakuṭṭim āgra- vikṣiptaratnakusumaprakarāvakīrṇāḥ| abhyudgatāruṇakarāhatipātyamāna- nakṣatrarāsiśakalā iva yatra rathyāḥ||32|| āliṅganādaracitasthitir ābabhau yā patyur vikāsiparikhāvalinī vibandham| vistārisālajaghanaṃ parivartamāna- nakṣatraratnaraśanāguṇam udvahantī||33||

iti purīvarṇanam

tām adhyuvāsa bhuvanānujighṛkṣayātta- nirmāṇadehaghaṭanaḥ kṣapitāricakraḥ| cakrīva saudhadhavalāṃ bhujagādhirāja- mūrtiṃ vibhuś śiśiraraśmikalāvamūlaḥ||34|| yasya prapannajanatāś caraṇāravinda- pīṭhapraṇāmakiṇaśāritam udvahanti| rudrībhaviṣyati vapuṣy upapannabhāsva- dūrdhvakṣitārakam iva sma lalāṭapaṭṭam||35|| pluṣyat puratrayam aviślathajūṭabandha- khedākulena phaṇinā sphuraduddhatārciḥ| sāhāyakārtham iva phūtkṛtamārutena sandhukṣitaḥ sapadi yasya pṛṣatkavahniḥ||36|| ākarṇatāṇḍavitamandaracāpadaṇḍa- maurvīkṛto ragaphaṇāgaṇaphūtkṛtotthaḥ| yasyādidīpad analaḥ prathamaṃ tato gni- jvālākalāpajaṭilas tripuraṃ pṛṣatkaḥ||37|| mandākinī śirasi maulikapālapaṭṭa- saṅghaṭṭajarjarataraṅgaghaṭā vibhāti| yasyordhvanetraśikhiviplutacandrakhaṇḍa- viṣyandamānaśiśirāmṛtanirjharaśrīḥ||38|| yasyānurāgavaśataḥ sphuṭakālakūṭa- cchāyācchalena kṛtakelikacāvamardām| īrṣyānubandhakaluṣaṃ prasamīkṣya gaṅgā- m āliṅgito yamunayeva vibhāti kaṇṭhaḥ||39|| ābhāti yasya himaśailasutābhyasūyā- roṣānubandhavaśato mbaram ārurukṣuḥ| uṣṇīṣapannaganipīḍitajūṭaratna- bhāgotthitā pratipathābhimukhīva gaṅgā||40|| niṣpeṣabhīti śaraṇāgatapūṣavaktra- śeṣāpareva hasatā vidhutottamāṅgam| yena vyalokyata purāṇakapālamauli- bandhacyutā daśanapaṅktir adhaḥ patantī||41|| yasyādrirājatanayāvadanāravinda- lāvaṇyakāntivijitasya salīlam indoḥ| bandīkṛto rbhaka iva ślathajūṭakoṭi- bandhacyutaś ciram abhāri kareṇa khaṇḍaḥ||42|| mandākinīsalilanirbharapūryamāṇa- gambhīrakukṣikuharodgatatāranādam| adyāpi yasya śirasi śriyam ety aśānta- vedadhvanīva parameṣṭhiśiraḥkapālam||43|| saṃhārarātrimukhatāṇḍavaḍambareṣu dordaṇḍaṣaṇḍapavanābhihatāḫ purastāt| yasya kramād apasaranti parikramaika- līlāvakāśaghaṭanārtham ivādrināthāḥ||44|| yasyānukārarabhasotthitadaṇḍapāda- gulphāgrasaṅghaṭitamaṇḍalapūrvarekhaḥ| paryastaparvataśitāśriviśīryamāṇa- māṇikyapādakaṭakāśrayam eti candraḥ||45|| dordaṇḍaṣaṇḍapavanocchalitā vicitra- cārīvilāsadalitakṣitipīṭhabandhāḥ| yasya bhramanti girayo mbaramārga eva pātālapātacakitā iva tāṇḍaveṣu||46|| saṃhārameghamalinātanukālakūṭa- cchāyā salīlam adhikandharam ullasantī| yasya pradakṣiṇayatīva kirīṭakoṭi- baddhāspadaṃ dayitam indum upetya rātriḥ||47|| gaṅgātaraṅgataralānanarandhralagna- śūḍāśaśāṅkakalikaṃ sphurad uttamāṅge| aspaṣṭacañcupuṭadaṣṭamṛṇālakoṭi- haṃsaśriyaṃ vahati yasya sitaṃ kapālam||48|| sandhyāsamādhivinimīlitalocanasya yasyānukāram iva hāraphaṇī cakāra| uddhūlanonmṛditabhasmaparāgapūra- paryamubhītibharakūṇitakātarākṣāḥ||49|| premāmṛtena girirājasutāśrayeṇa na plāvite tra hṛdaye sti mamāvakāśaḥ| yasyādhikandharam itīva padaṃ babandha sandhukṣikṣitatribhuvanāgniśikho viṣaughaḥ||50|| ākarṇakṛṣṭakusumacyutareṇupiṅga- cūrṇīkṛtātanuśarāsanam adhyasaṃsthaḥ| prāk cittavṛttivikṛter api roṣavahni- jvālāparīta iva yasya manobhavo bhūt||51|| puṣpāyudhena kṛtatīvrasamādhibheda- m āsphālite dhanuṣi sabhrukuṭīvibhaṅgam_| tatkṣobhajena rabhasena vilaṅghyamāna- m ūrdhvākṣi yasya saruṣo mukulībabhūva||52|| bhītaiḫ puraḥ kusumamārgaṇadehadāha- saṃrambhaghoravikṛtir dadṛśe surair yaḥ| kaṇṭhodarāspadam anarghalahuṅkṛtāgni- dhūmacchalena vikirann iva kālakūṭam||53|| ūrdhvekṣaṇānalaśikhāpaṭalendhanatva- m āsādya yasya kupitasya samādhibhaṅgāt| cakre padaṃ makaraketur apāṅga eva sabhrūvilāsalaḍite laṭabhāṅganānām||54|| yasya vyaloki saruṣo mukham arjunena| māyākirātavapuṣaḥ paripāṭalatviṭ| bhāsval lalāṭavinirūḍhavilocanāgni- jvālākalāpapariṇāmavaśād ivārāt||55|| karṇāvataṃsitaśikhaṇḍipatatrakhaṇḍāṃ guñjāphalasrag upagūḍhapayodharāgrām| yasyekṣituṃ girisutām adhikābhirāma- rūpāṃ nigūḍham udakaṇṭhata sāgni cakṣuḥ||56|| yasya vyabhidyata manas sutarāṃ kirāta- rūpasya śailasutayā śabarībhavantyā| karṇāvataṃsitamanoharakekipiñcha- sacchāyadīrghataralocanaśaṅkupātaiḥ||57|| yasyāvalambitakirātatanor nigūḍha- netroṣmakāraṇa ivāśu kirīṭikopāt| svedodabindunikaraḥ cakare kareṇa nirmṛjya sīkarakarālitadig lalāṭāt||58|| līlānatānanatayā pratibimbavarti- cūḍāśaśāṅkaśarvalaṃ kucam ardhabhāge| yaḥ paśyati sma dadhataṃ dhutadugdhasindhu- kallolalaṅghitasudhākalaśasya līlām||59||] yenādrirājatanayā kucamaṇḍalāgra- vinyastahastakamalaṃ bibharāṃ babhūve| vakṣo himācalaśilāvikaṭaṃ satumba- vīṇāniveśam iva dhūlanavibhrameṣu||60|| sandhyājalāñjalim apojjhati yaś cireṇa sasvedasīkarakaṇotpulakāṅgayaṣṭiḥ| dehārdhabhāgagataśailasutānanendu- bimbāvalokanasukhastimitekṣaṇaśrīḥ||61|| śliṣṭo nayoẖ kimu bhaved uta naiva sandhi- r dehārdhayor ghaṭitayor iti tatparīkṣām| āripsu yasya rabhasād iva cakṣur ardha- nārīśvarasya niriyāya lalāṭapaṭṭāt||62|| yasyānatipravaṇarudradṛśo ṅghriyugma- śākhānakhāṃśuviṣadīkṛtapūrvabhāgāḥ| āpāṇḍumūlaparipāṭalapuṇḍarīka- pattraśriyaṃ dadhati vahniśikhāpiśaṅgyaḥ||63|| stutimukharamukhās taṃ srastaratnāvataṃsāḥ sthiracaraṇasaparyābandhurāvandhyasandhyāḥ| pratidinam upacerus siddhasādhyāmaraughāḥ sphuṭakarapuṭakoṭiśliṣṭabhāsvatkirīṭāḥ||64||

iti haravijaye mahākāvye purīpurārivarṇano nāma prathamas sargaḥ ||