Kāvyamālā 22, OCR

kāvyamālā |

ma1hākavirājānakaśrīratnākarapraṇītaṃ haravijayam_ | 1. ayaṃ mahākavir amṛtabhānusūnuḥ śrīrājānakaratnākaro 'sya haravijayamahākāvyasya pratisargasamāptau ‘iti bālabṛhaspatyanujīvino rājānakaratnākarasya kṛtau’ iti likhati sma. sa ca bālabṛhaspatyaparanāmā cippaṭajayāpīḍamahīpatir navamaśatakaprārambha eva kaśmīradeśaṃ śaśāsa. ‘śrīcippaṭajayāpīḍo bṛhaspatyaparābhidhaḥ | lalitāpīḍajo rājā śiśudeśyas tato 'bhavat_ ||’ iti rājataraṅgiṇī (4|680). tasmād ratnākarakavis tatsamaye khristasaṃvatsarīyanavamaśatakaprārambha evāsīd iti kecit_. vastutas tv ayaṃ kaviḥ khristasaṃvatsarīyanavamaśatakasyottarabhāge 'vantivarmaṇo rājyakāle kaśmīrān maṇḍayāmāsa. yato rājataraṅgiṇyām_ (5|39) ‘muktākaṇaḥ śivasvāmī kavir ānandavardhanaḥ | prathāṃ ratnākaraś cāgāt sāmrājye 'vantivarmaṇaḥ ||' iti kahlaṇakavir babhāṇa. avantivarmarājyasamayas tu 855 mitāt khristābdād ārabhya 884 mitābdaparyantaṃ prasiddha eva. ratnākarakṛtiṣu (1) haravijayamahākāvyam_, (2) vakroktipañcāśikā, (3) dhvanigāthāpañjikā ceti granthatrayaṃ jñātam asti. ‘mā sma santu hi catvāraḥ prāyo ratnākarā ime | itīva sa kṛto dhātrā kaviratnākaro 'paraḥ ||’ iti rājaśekhareṇāpi ratnākaramahākaviḥ stutaḥ. asmin kāvye vasantatilakacchandonibaddhā bahavaḥ sargāḥ santi. ata eva ‘vasantatilakārūḍhā vāgvallī gāḍhasaṅginī | ratnākarasyotkalikā cakāsty ānanakānane ||’ iti suvṛttatilake kṣemendraḥ. ‘dugdhābdhīnāṃ sahasraṃ na kusumalasitaṃ sadvasantāyutaṃ vā koṭir vā pārvaṇānāṃ suṣamaśaśabhṛtāṃ neṣadoṣātanānām | saṃpūrṇaṃ vā sudhābhiḥ puraṭaghaṭaśataṃ hanta dhanvantarer no pāṇisthaṃ cāru ratnākarasukavigirāṃ merulakṣaṃ na mūlyam_ ||’ ity ādhunikasadāśiva-śaṃkara-śāstri-draviḍapraṇītaṃ ratnākarapraśaṃsāpadyam_.

rā2jānakaśrīmadalakakṛtena viṣamapadoddyotābhidhena ṭippaṇena sametam_ | 2. ayaṃ haravijayaviṣamapadoddyotakāro rājānakajayānakasūnuḥ śrīmadalako 'pi kāvyaprakāśakartur mammaṭarājānakasya samakālīnaḥ kiṃcid evārvācīno vāsti. yataḥ pa rikarālaṃkāraprakaraṇāntaṃ kāvyaprakāśaṃ nirmāya virate mammaṭarājānake śeṣagranthamayam evālakaḥ pūritavān_. “yad uktam_—‘kṛtaḥ śrīmammaṭācāryavaryaiḥ parikarāvadhiḥ | prabandhaḥ pūritaḥ śeṣo vidhāyālakasūriṇā ||’ anyenāpy uktam_—‘kāvyaprakāśa iha ko 'pi nibandhakṛdbhyāṃ dvābhyāṃ kṛte 'pi kṛtināṃ rasatattvalābhaḥ | loke 'sti viśrutam idaṃ nitarāṃ rasālaṃ bandhaprakāraracitasya taroḥ phalaṃ syāt_ ||” iti kāvyaprakāśa[ni]darśanānte rājānakānandaḥ. kāvyaprakāśasaṃketasamāptau ca bahuṣu pustakeṣu ‘kṛtir iyaṃ rājānakamammaṭālakarucakānām_’ ity upalabhyate. bahugranthakartā rājānakarucako 'pi taddeśe prasiddha eva. idaṃ haravijayakāvyaṃ kaśmīreṣv api viralapracāram asti. kevalaṃ gaṇeśarājānakasaṃgrahe 'sya kāvyasyaikaṃ bhūrjapattreṣu likhitaṃ pustakam asti. tatpratirūpakāṇy eva kaiścana gṛhītānītas tataḥ samupalabhyante kāśmīreṣu. ṭīkā(haravijayapadoddyota)pustakaṃ caikam evāśuddham_, samāptau truṭitaṃ ca pūrvoktasya saṃgrahe 'sti. tatpratirūpakam evāsmābhir anyaiś ca tatratyair gṛhītam asti. tatpratirūpakāṇy apahāyānyaddharavijayaṭīkāpustakaṃ nādyāpi dṛggocarībhūtam_. adhunā caikaṃ mūlapustakaṃ prārambhe trayodaśasargahīnaṃ madhye ca dvitrapattra vikalaṃ prāyaḥ śuddhaṃ lāhoranagare 1655 mite vikramavarṣe likhitaṃ gvāhleranagarāt paurāṇikabhaṭṭaśrīpuruṣottamaśāstribhir asmabhyaṃ prahitam_. evaṃ dvitrāṇi mūlaṭīkāpustakāni samavalambya pañcāśatsargātmakasyāsya nikhilakāvyalakṣaṇākrāntasya mahākāvyaśiromaṇer mudraṇe samudyuktāḥ smaḥ. asya katipaye ślokāḥ kāvyaprakāśādiṣūdāhṛtāḥ santi. kāvyasyāsyābhyāsena mahatī kavitācāturī samullasatīti kavir eva granthānte svayaṃ pratijānīte. yathā-‘haravijayamahākaveḥ pratijñāṃ śṛṇuta kṛtapraṇayo mama prabandhe | api śiśurakaviḥ kaviḥ prabhāvād bhavati kaviś ca mahākaviḥ krameṇa ||’

prathamaḥ sargaḥ |

kaṇṭhaśriyaṃ kuvalayastabakābhirāma- dāmānukārivikaṭacchavikālakūṭām | bibhrat sukhāni diśatād upahārapīta- dhūpotthadhūmamalinām iva dhūrjaṭir vaḥ || 1 ||

dhūrjaṭiḥ śaṃkaro yuṣmabhyaṃ sukhāni śreyāṃsi diśatād vitaratu | kīdṛśaḥ | kuvalayastabakair nīlotpalagucchair abhirāmaṃ cāru yad dāma sragdāma tattulyo vikaṭacchavir bahalakāntiḥ kālakūṭo viṣaṃ yasyāḥ, tathāvidhāṃ kaṇṭhaśriyaṃ dhārayan_ | ataś copahāreṣu pūjāsamayeṣu bhaktajanadayayā pīto yo dhūpadhūmas teneva malinām ity utprekṣā || atha dvitīyo 'rthaḥ—dhūrjaṭiḥ sukhāni śobhanāni svakāryakṣamāṇy aviṣayāpavartīni khānīndriyāṇi diśatāt saṃpādayatu | kīdṛśaḥ | kuvalaye bhūmaṇḍale ye stavakāḥ stotāras teṣām abhirāmasyābhilaṣitasya dāmā dātā | stavakā ity atra stautīti stavo 'jantaḥ | stava eva stavakaḥ | svārthe kaḥ | iti vyutpattir draṣṭavyā | kīdṛśīṃ kaṇṭhaśriyam_ | anukāḥ śṛṅgāriṇas teṣām ariḥ kāmaḥ, tathā vikaṭacchavir bhīṣaṇakāntir yaḥ kālaḥ, tayoḥ kūṭāṃ dāhikām_ | upahāraṃ hārasamīpe yaḥ pītaḥ kapiśo dhūpaḥ saṃtāpo 'rthāc ca hāroragaphūtkṛtāgnisaṃbandhī tadutthena dhūmeneva malinām_ | etena vakṣyamāṇaśabdabhaṅgādi kaṭākṣitam || 1 ||

jṛmbhāvikāsitamukhaṃ nakhadarpaṇānta- rāviṣkṛtapratimukhaṃ gururoṣagarbham | rūpaṃ punātu janitāricamūvimarśa- m udvṛttadaityavadhanirvahaṇaṃ harer vaḥ || 2 ||

janito 'ricamūnāṃ vimarśo vividhaprakāravicāro narasiṃho bhayarūpatvenākārādy anirdhāraṇād yena | vṛttaṃ saccaritram utkramya vartamāno yo daityo hiraṇyakaśipus tasya vadhanirvāhakam_ || 2 ||

paryantavartiparipāṇḍurapattrapaṅkti- padmāsanāsanakuśeśayakoṣacakram | yuṣmān punātu dadhad uddhatadugdhasindhu- vīcicchaṭāvalayitāmaraśailalīlām || 3 ||

padmāsanasya brahmaṇo yadāsanakuśeśayaṃ viṣṭarapadmaṃ tasya yat koṣacakraṃ karṇikā tad vaḥ punātu | chaṭā churaṇacarcā tayā valayito veṣṭito yo merus tena līlā sāmyam_līlāsāmyam_ | vīcisthānīyāni pattrāṇi | śailasthānīyā karṇikā || 3 ||

asty unnate surasarijjaladhāvyamāna- bhāge navārkaruci mandaraśailaśṛṅge | jyotsnāvatīti nagarī bhuvanatrayaika- bhūṣā vṛṣāṅkaśirasīva śaśāṅkalekhā || 4 ||

mandarādriśṛṅge jyotsnāvatī nāma nagary asti | ‘āliṅganāda—’ (1|33) ityādi ślokaṃ yāvad yāstīti nityatvād vartamānanirdeśaḥ | ‘vahanti vanitāḥ’ (īśvaro 'sti) ityādivat_ | surasarid gaṅgā | navārkarucīti sauvarṇatvāt_ | yadvā navair lokottarair arkākhyais tarubhiḥ sphaṭikair vā ruk kāntir yatra | śarvottamāṅga iva candralekhā | vṛṣadhvajaśiro 'pi gaṅgājaladhāvyamānam_ | tatrodgatasyārkasyeva ruk_ | jaṭānāṃ kapiśatvāt_ | śaśāṅkalekhāpi jyotsnāvatī sakaumudīkā | anyat samānam_ || 4 ||

yasyāṃ niśāsu gaganaṃ navapadmarāga- sadmaprabhāruṇitamadhyagatendulekham | vakṣo nṛsiṃhanakharair asurādhipasya sāsṛkchaṭaṃ viṣamabhinnam ivācakāsti || 5 ||

padmarāgamayasadmaprabhāruṇitaṃ ca madhyagatendulekhaṃ ca | lekhāśabdo 'trārdhacandropalakṣaṇam_ | niśi nabhomadhye kalāmātrasyāsaṃbhavāt_ | narasiṃhanakhais tiryagvidāritaṃ saraktacchaṭaṃ hiraṇyakaśipor vakṣa iva | nṛsiṃhanakhabhinnaṃ sarudhiracarcaṃ vakṣa iva gaganam iti bhinnakramo 'yam ivaśabdaḥ | ‘ivena samāso vibhaktyalopaḥ pūrvapadaprakṛtisvaratvaṃ ca’ iti samāsasya nityaṃ vidhānād bhinnakramatā na yujyata iti cet_, maivam_ | sāmarthye sati samāsena bhavitavyam_ | bhinnaśabdāt paraṃ cevaśabdaḥ śruto na | tenāsya sāmarthyam_ | anvayābhāvāt_ | yady evaṃ vakṣaḥśabdād anantaram asya prayogas tena ca saha samāsaḥ prāpnoti | tenaivāsya saṃsargāt_ | nityādhikāre ca [vacanena] vigrahasya nirāsāt_ | evaṃ tarhi cchandoviṣayatvād asya vākyasya na doṣaḥ | asati tatra cchandograhaṇe kathaṃ tadviṣayatvaṃ niścinuma iti cet_, asty eva tanniścayanibandhanaṃ tatrabhavato bhāṣyakārasya vyavahāraḥ| yad asau chandoviṣayam eva tatrodājahāra—‘kanye iva, vāsasī iva’ iti | anyatra ca laukikaprayoge bhinnakramam ivaśabdaṃ prayuyuje | [yathā—] ‘siṃhīrūpam iva’ ity atra siṃhīva rūpam ityartho vivakṣitaḥ | na tu rūpam iva siṃhīti | yas tu brūyāt_—‘chāndasa i(e)vāyaṃ prayogaḥ, chandasy api tathā darśanāt_’ iti tanmate chandasi nityaṃ samāsavedanaṃ pūrvapadaprakṛtisvaratvam upalabhyatām iti kathaṃ bhinnakramatvam ivaśabdasya yuktiyuktaṃ syāt_ | laukike tu prayoge na kaścid doṣaḥ | ity alaṃ vācālatayā || 5 ||

jyotīrasāśmabhavanājiradugdhasindhu- r atyunmiṣatpracuratuṅgamarīcivīciḥ | vātāyanasthitavadhūvadanendubimba- saṃdarśanād aniśam ullasatīva yasyām || 6 ||

jyotīrasāśmānaḥ sphaṭikamaṇayas tadaśmanāṃ gṛhāṅgaṇaṃ dugdhasindhur iva yatra sphuratkarormitayollasati bhrājate | atrotprekṣā—vadhūvadanendubimbasaṃdarśanād iveti | yo hi yoṣito vadanam indusamaṃ paśyati sa cetanācamatkṛtirūpam ullāsam āsādayati | indubimbasaṃdarśanaṃ ca dugdhodadher ullāsahetuḥ || 6 ||

gaṇḍasthalīḥ saghanadharmajalā rateṣu lagnāvataṃsakusumacyutakesarāgrāḥ | abhyāpatanmadanamārgaṇapuṅkhapakṣa- pakṣmākulā iva dadhuḥ pramadāś ca yasyām || 7 ||

kesaraḥ kiṃjalkaḥ || 7 ||

sīmantinījanamanaḥsu samādhibhaṅga- kopānalena ciradagdham apīndumauleḥ | utthāpayanmadanam āśu karair vibhāti yasyāṃ himāṃśur avalambitajālamārgaḥ || 8 ||

jālamārgo gavākṣamārgaḥ | yena ca karair jālamārgo 'valambitaḥ sa aindrajālikatvād dagdham api kiṃcid utthāpayann avabhāsate | atra ca karāḥ pāṇayaḥ | jālaṃ vyājaḥ | mārgaḥ saraṇiḥ sroto [prapañco] vā | utthāpanaṃ pratyujjīvanam_ || 8 ||

yasyāṃ rateṣu pṛthupīnanitambabimba- śobhā sphuraddaśanapaṅktikṛśāṅgayaṣṭiḥ | kūrmīva puṣpadhanuṣaḥ priyapāṇijāgra- koṇāvamarśamadhurakvaṇitāṅganāsīt || 9 ||

nitambaḥ kaṭibhāgaḥ, prasthikāpi | daśanā dantāḥ, kolambā api | kūrmī trisarikā, sairandhrīti prasiddho vīṇāviśeṣaḥ | priyasya patyur nakhānām agrakoṇaiḥ prāntabhāgair avamarśo vidāraṇam_, priyaś cātirucito nakhānām agre sthito yaḥ koṇo vādanakāṣṭhikā tenāvamarśo nigharṣaṇam_ || 9 ||

yatrendranīlabhavanaṃ pṛthupadmarāga- vātāyanair ubhayapārśvagatair vibhāti | bāṇāsurasya haricakravilūnabāhu- mūlavraṇair iva vapuḥ kṣatajacchaṭārdraiḥ || 10 ||

ubhe eva pārśve ubhayapārśve | ubhaśabdasamānārtha ubhayaśabdo vṛttāv eva | kṣatajamasram_ || 10 ||

klāntiṃ ratāntajanitāṃ ślathayanti yatra māṇikyamandiragavākṣapathapraviṣṭāḥ | abhyarṇavartisuranirjhariṇītaraṅga- bhaṅgānusāraśiśirā maruto 'ṅganānām || 11 ||

abhyarṇaṃ samīpam_ || 11 ||

gaṇḍasthalapratimitaṃ sudṛśāṃ sacihna- m aśvetatenduśakalaṃ rajanīṣu yasyām | jyāghātapātakiṇaśāritamīnaketu- nyāsīkṛtācchamaṇikhaṇḍatalāyamānam || 12 ||

yatra vadhūnāṃ gaṇḍabhuvi pratibimbitaṃ śaśiśakalam aśvetata vyarucat_ | sacihna lāñchanasahitam_ | ata eva guṇakiṇaśabalaṃ yattalaṃ prakoṣṭhāgraṃ tatsadṛśam_ | acchamaṇiḥ sphaṭikaḥ | nyāso nikṣepaḥ || 12 ||

yasyām aśaṅkiṣata śaṃkaraśekharendu- saṃdarśanotsukatayopagataṃ suraughāḥ | jyotīraseṣṭakacitāmbaracumbidīpra- vapraprabhābharanibhena ca dugdhasindhuḥ || 13 ||

jyotīrasamayībhir iṣṭakābhiś caturasraghaṭitair loṣṭakaiś cito dṛbdhaḥ | ‘iṣṭakeṣīkāmālānāṃ citatūlabhāriṣu’ iti hrasvaḥ | vapraḥ prākāraḥ | nibho vyājaḥ || 13 ||

lakṣmīr na yāṃ bhavanamānasasaṃniveśa- haṃsībhir ujjvalavilāsagatikramābhiḥ | strībhir yutāṃ samaṇinūpurajhāṃkṛtābhi- r ujjhāṃcakāra jhaṣaketanajhallarībhiḥ || 14 ||

jhaṣaketanasya makaradhvajasya jhālaryo vādyabhāṇḍaviśeṣāḥ | tā api nūpurasadṛśajhāṃkāriṇyaḥ || 14 ||

yasyāṃ niśāsu rucirāgurudhūpadhūma- kalmāṣitaṃ śaśabhṛtaḥ karacakravālam | śliṣyadgavākṣakaladhautakavāṭapaṭṭa- saṃdaṃśalagnakiṇalekham ivaiti lakṣmīm || 15 ||

agurudhūpayor dhūmena militatvād indukaracakraṃ candrasya kiraṇacakram_, yatra śliṣyator gavākṣapidhānabhūtayor yujyamānayoḥ pidhānaphalakayor niṣpeṣeṇa kiṇayuktam iva śobhāṃ vahati | kiṇasya kṛṣṇatvāt_ || 15 ||

śayyāgṛhaṃ suratakelivimardaśīrṇa- karṇāvataṃsavikacotpalapattrakhaṇḍaiḥ | yatrāṅganā dalayataḥ kusumāyudhasya bhagnaiḥ kṛpāṇaśakalair iva kīrṇam āsīt || 16 ||

aṅganā iti śasantam_ || 16 ||

yasyāṃ salīlam asitāgurudhūpadhūma- daṇḍā gavākṣavivarodarataḥ prasasruḥ | āsannacandrakarabhaṅgabhiyāndhakāra- hastā iva sphuritadīrghaśikhāṅgulīkāḥ || 17 ||

āsanno yaḥ śaśikarebhyo bhaṅgaḥ kṣayas tasya bhayena hastā iva timirasya dhūmadaṇḍāḥ | sphuritā dīrghāḥ śikhā evāṅgulyo yeṣām_ | dīrghā śikhā koṭir yāsāṃ tathāvidhā aṅgulya iti ca || 17 ||

rāgānubandhipariṇāmadaśāvamarśa- śūnyābhirāmanavayauvanapallavābhiḥ | kalpadrumavratatibhiḥ kanakādrikuñja- vīthīva yā purapuraṃdhribhir ābabhāse || 18 ||

rāgasyābhiṣaṅgasyānubandho yāsāṃ tathāvidhāś ca tāḥ pariṇāmasya vārdhakasya daśāyā avamarśo bādhas tena śūnyāś ca tāḥ | abhirāmaṃ navaṃ yadyauvanaṃ tasya pallavaḥ prasaro yāsāṃ tāḥ | pakṣe rāgasya lauhityasyānubandho vidyate yeṣāṃ tāni ca pariṇāmadaśāyāḥ paripākadaśāyā avamarśena sparśena śūnyāni navayauvanāni cājaraṭhāni pattrāṇi yāsāṃ tābhiḥ | kuñjavīthī tarugahano mārgaḥ | puraṃdhrayo mukhyayoṣitaḥ || 18 ||

vaidūryapaṭṭaghaṭitāraribhir niśāsu dūrād apāvṛtamukhair iva dṛśyamānaiḥ | dvārair bibharti pihitair api yatra lakṣmī- m abhraṃkaṣā pratidiśaṃ maṇiharmyapaṅktiḥ || 19 ||

ghaṭitāny ararāṇi kapāṭāni vidyante yeṣām_ | baddhamukhair iva dṛśyamānaiḥ | niśāyām api dṛśyatvam āgataiḥ | abhraṃkaṣā gaganavyāpinī || 19 ||

yasyāṃ smaraḥ satatasaṃnihite 'pi candra- cūḍāmaṇau vasati paurapuraṃdhridehe | nirmuktabhītir adhirūḍhakaṭākṣabāṇa- tadbhrūśarāsanasahasrakṛtātmarakṣaḥ || 20 ||

candracūḍāmaṇau smarārau | deha iti jātāv ekavacanam_ | deheṣv ityarthaḥ | kaṭākṣā evaṃ bāṇāḥ | bhruva eva dhanūṃṣi śarāsanāni || 20 ||

krīḍābjinīṣu na daridrati sāndracandra- raśmicchaṭāpaṭalapāṭalitāni kāntyā | bibhranti manmathamataṅgajadantakoṣa- saṃvāditāṃ kuvalayāni niśāsu yasyām || 21 ||

manmatha eva mataṅgajaḥ karī tasya dantapratimāsāmyaṃ bibhrāṇāni yatrotpalāni mukulitāny api rucā na daridrati na hīyante | atra ca deśasaubhāgyaṃ hetuḥ | bibhrantīti ‘vā napuṃsakasya’ iti num_ || 21 ||

māṇikyatoraṇamadūravilambamāna- tigmāṃśukūbarituraṅgaśarīrabhābhiḥ | yatra kṣaṇaṃ haritapallavanirmitābhi- r ābhāty aśūnyam iva vandanamālikābhiḥ || 22 ||

kūbarī rathaḥ | ‘kūbaras tu yugaṃdharaḥ’ | vandanamālā pattrapuṣpamayī srak_ || 22 ||

yasyāṃ bhareṇa galatas taruṇīmukhendu- lāvaṇyakāntibisarāmṛtanirjharasya | aṭṭālasālavalayaṃ vikaṭālavāla- līlāṃ viḍambayati cumbitabhānubimbam || 23 ||

lāvaṇyasāhitā kāntir evāmṛtapravāhaḥ | aṭṭālam upari yuddhasthānam_ | tatpradhānaḥ sālaḥ purīprākāraḥ | tasya valayarūpatvād ālavālānukaraṇam_ || 23 ||

vyaktīkṛtāvayavacandrakalābhirāma- rūpā haranti hṛdayaṃ hariṇāyatākṣyaḥ | yatronmiṣanmadhuramugdhavidagdhahāva- bhāvānubandhikusumāyudhasaudhahāsāḥ || 24 ||

vyaktīkṛtāvayavāḥ prakaṭīkṛtāṅgyaś candrakalāvac ca rucirarūpā mṛgīdṛśo yatra hṛdayam āvarjayanti | hāvabhāvān anu badhnātītīdṛśo yaḥ kusumāyudho 'naṅgas tasya saudhaṃ dhavalaharmyaṃ viśrāntiviṣayatayā hāso yāsām_ | hāvo ratyaṅgasaṃbhavaś ceṣṭāviśeṣaḥ | uktaṃ ca—‘yatrākṣibhrūvikārādyāḥ śṛṅgārākārasūcakāḥ | sa grīvārecako jñeyo hāvo ratyaṅgasaṃbhavaḥ ||’ iti | bhāvo 'bhilāṣaḥ || 24 ||

yasyāṃ niketanalinīṣu ca lauhitīka- sopānapaṭṭarucivicchuritāntarālāḥ | lakṣmīmatāniṣuramandarucaḥ priyāya bandīkṛtendukiraṇā iva padmakhaṇḍāḥ || 25 ||

niketo gṛham_ | lohita evāśrayavaśāl lauhitīkaḥ sphaṭikaḥ | ‘karkalohitādīkak_’ | amandarucaḥ sūryasya priyāya | tvadanugrahād gṛhītamāhātmyair asmābhir arātayo 'vaṣṭabhyānītā itīṣṭaṃ nivedayitum_ | kvacit_ ‘aśītarucā’ iti pāṭhaḥ | tatra priyāya teṣām eva hitam ādhātuṃ raviṇā bandīkṛtāḥ śaśikarā yeṣv iti yojyam_ || 25 ||

māṇikyakhaṇḍakhacitāḥ suramandireṣu yasyāṃ cakāsati vipāṭalatatprabhābhiḥ | āliṅgitāḥ śikharakoṭivipāṭitābhra- saudāminībhir iva kāñcanaketudaṇḍāḥ || 26 ||

māṇikyakhaṇḍaiḥ khacitāś churitāḥ | dīptisahitā ityarthaḥ | kāścanaketūnāṃ sauvarṇapatākānām_ || 26 ||

yasyāṃ vrajaty adhiniśīthini kāntaveśma līlāgṛhītavikacotpalapāṇipadmaḥ | vaibhāvareṇa rabhasāt timireṇa datta- hastāvalambana ivāsta puraṃdhrilokaḥ || 27 ||

adhiniśīthini rātrau | vibhaktyarthe 'vyayībhāvaḥ | vibhāvaryā vikāro vaibhāvaram_ | naiśam ity aṇ_ vikāre 'rthe vidheyaḥ | bhāvādau tu ‘kālāṭ ṭhañ_’ iti ṭhañ eva syāt_ || 27 ||

ākrīḍatāmarasinījalayantramañju- nādaḥ kramānugatakaiśikamadhyamaśrīḥ | utkaṃdharastimitapādavidhūtapakṣa- m ākarṇyate bhavanahaṃsagaṇena yasyām || 28 ||

ākrīḍa udyānam_ | tāmarasinī kamalinī | kramānugatā satatam ākalitā kaiśikamadhyamasya gītaviśeṣasya śrīr yena | madhyamaṃ satatam ākarṇitavantaḥ | deśāntare 'pi tatsadṛśaṃ nādaṃ tam evādhyavasyanti | utkaṃdharastimitapādaṃ ca vidhūtapakṣaṃ ca | jātikriyāviśeṣatā svabhāvoktir uktā || 28 ||

yatrāśmagarbhakamayūkhaśikhāprakāśa- śyāmīkṛtā bhavanapuṣkariṇītaṭeṣu | ceto haranti pariṇāmi ciropabhukta- śevālasaṃhatirasā iva haṃsayūthāḥ || 29 ||

aśmagarbhaṃ marakatam_ | harinmaṇir ityarthāntaram_ | pariṇāmī pariṇataḥ aṅgeṣūpasaṃkrāntaḥ | ciraṃ bahukālam upabhukto nipītaḥ || 29 ||

yasyāṃ harinmaṇivinirmitaharmyaraśmi- līḍhodarāḥ pratidiśaṃ niśi tārakaughāḥ | udbhinnakomalakuśāṅkurakoṭilagna- naiśodabindupaṭalaśriyam āliliṅguḥ || 30 ||

harmyam uttamāgāram_ | pratidiśaṃ diśi diśi | ‘avyayībhāve śaratprabhṛtibhyaḥ’ iti ṭac_ | udabindavo jalakaṇāḥ | ‘manthaudana—’ ityādinodakaśabdasyodabhāvaḥ || 30 ||

lāvaṇyanirbharapuraṃdhrimukhāvadhūta- cchāyo dadhatkaluṣatāṃ hṛdayena yasyām | indur niśāsu maṇikuṭṭimabimbyamāna- mūrticchalena viśatīva rasātalāntaḥ || 31 ||

yatra śaśī tiraskṛtarucitvāt pātālāntaram iva praviśati | vailakṣyād iti bhāvaḥ | kaluṣatā kalaṅkakṛtaṃ mālinyaṃ nirvedaś ca | hṛdayaṃ madhyaṃ manaś ca || 31 ||

prātaś cakāsati gṛhodarakuṭṭimāgra- vikṣiptaratnakusumaprakarāvakīrṇāḥ | abhyudgatāruṇakarāhatipātyamāna- nakṣatrarāśiśabalā iva yatra rathyāḥ || 32 ||

kuṭṭimāgrād vikṣipto 'nupayogān nirastaḥ | karā raśmayaḥ, karaś ca pāṇiḥ | tadāhanane patanasya yogyatvāt_ || 32 ||

āliṅganād aracitasthitir ābabhau yā patyur vikāsiparikhāvalinīvibandham | vistārisālajaghanaṃ parivartamāna- nakṣatraratnaraśanāguṇam udvahantī || 33 ||

patyur īśvarasya saṃbandhinām āliṅganānāṃ murajaviśeṣāṇāṃ nādena racitā sthitir yatra tādṛśī yā vyarucat_ | ‘nānāprakāre 'py avanaddhajātes tripuṣkaraṃ vādyam ihādyam āhuḥ | tatrāṅkakāliṅgyakasaṃjñakau dvāv anyas tathā cordhvakanāmadheyaḥ ||’ tasyāś ca nāyikātvapratīteḥ patyuḥ priyasyāliṅganaviṣayeṇādareṇa citā vyāptā sthitir yasyā ity api yojanā || 33 ||

(iti purīvarṇanam_)

tām adhyuvāsa bhuvanānujighṛkṣayātta- nirmāṇadehaghaṭanaḥ kṣapitāricakraḥ | cakrīva saudhadhavalāṃ bhujagādhirāja- mūrtiṃ vibhuḥ śiśiraraśmikalākirīṭaḥ || 34 ||

nirmāṇadeho deśakālādyavacchinnam icchānirmitaṃ śarīraṃ taddhaṭanā gṛhītā yena saḥ | kṣapitam arīṇāṃ cakraṃ samūho yena | kṣapitāricakraṃ sudarśano yasya sa ca | tatpakṣe aras tīkṣṇakīlaṃ tadyuktam ari | saudhaiḥ saudhavac ca dhavalā śvetā | ‘kalāvacūlaḥ’ iti pāṭhe avacūlaṃ cihnam_ || 34 ||

yasya prapannajanatāś caraṇāravinda- pīṭhapraṇāmakiṇaśāritam udvahanti | rudrībhaviṣyati vapuṣy upapannabhāsva- dūrdhvākṣitārakam iva sma lalāṭapaṭṭam || 35 ||

prapannā vaśenāgatāḥ | rudrībhaviṣyatīti saptamyantaṃ vapuṣo viśeṣaṇam_ || 35 ||

pluṣyatpuratrayam aviślathajūṭabandha- khedākulena phaṇinā sphuraduddhatārciḥ | sāhāyakārtham iva phūtkṛtamārutena saṃdhukṣitaḥ sapadi yasya pṛṣatkavahniḥ || 36 ||

sāhāyakaṃ tripuradāhe sahāyatā | ‘yopadhāt_—’ iti vuñ_ | pṛṣatkaḥ śaraḥ || 36 ||

ākarṇatāṇḍavitamandaracāpadaṇḍa- maurvīkṛtoragaphaṇāgaṇaphūtkṛtotthaḥ | asyādidīpadanalaḥ prathamaṃ tato 'gni- jvālākalāpajaṭilas tripuraṃ pṛṣatkaḥ || 37 ||

tāṇḍavitamākṛṣṭam_ | cāpo... || 37 |

mandākinī śirasi maulikapālapaṭṭa- saṃghaṭṭajarjarataraṅgaghaṭā vibhāti | yasyordhvanetraśikhiviplutacandrakhaṇḍa- viṣyandamānaśiśirāmṛtanijharaśrīḥ || 38 ||

38 ||

yasyānurāgavaśataḥ sphuṭakālakūṭa- cchāyāchalena kṛtakelikacāvamardām | īrṣyānubandhakaluṣaṃ prasamīkṣya gaṅgā- m āliṅgito yamunayeva vibhāti kaṇṭhaḥ || 39 ||

īrṣyānubandhakaluṣam iti prasamīkṣaṇakriyāviśeṣaṇam_ || 39 ||

ābhāti yasya himaśailasutābhyasūyā- roṣānubandhavaśato 'mbaram ārurukṣuḥ | uṣṇīṣapannaganipīḍitajūṭaratna- bhāgotthitā pratipathābhimukhīva gaṅgā || 40 ||

abhyasūyā guṇāsahanam_ | roṣānubandha īrṣyāhevākaḥ | uṣṇīṣaḥ śiroveṣṭanam_ | pratipathaḥ svargo... | abhimukhīva krodhāveśāt_ || 40 ||

niṣpeṣabhīti śaraṇāgatapūṣavaktra- śeṣāpareva hasatā vidhutottamāṅgam | yena vyalokyata purāṇakapālamauli- bandhacyutā daśanapaṅktir adhaḥ patantī || 41 ||

pūṣā sūryaḥ | tadvaktraśeṣā yā hy aparāvaśiṣṭā sā śaraṇāgatā dṛśyate | kapālebhyo nipatito māṇibandhaḥ (?) || 41 ||

yasyādrirājatanayāvadanāravinda- lāvaṇyakāntivijitasya salīlam indoḥ | bandīkṛto 'rbhaka iva ślathajūṭakoṭi- bandhacyutaś ciram abhāri kareṇa khaṇḍaḥ || 42 ||

bandhaparibhraṣṭaḥ śaśī yasya kareṇa kṣaṇaṃ [ciraṃ] vidadhre kṣititale mā loṭhiṣṭeti | indoḥ khaṇḍo 'rbhaka iva salīlaṃ bandīkṛto 'vaṣṭabdhaḥ | tathāvidhasya ca śiśoḥ kareṇa dhāraṇam ucitaṃ vātsalyāt palāyanabhayād vā || 42 ||

mandākinīsalilanirbharapūryamāṇa- gambhīrakukṣikuharodgatatāranādam | adyāpi yasya śirasi śriyam ety aśānta- vedadhvanīva parameṣṭhiśiraḥkapālam || 43 ||

eti gacchati | aśānteti cchedaḥ | parameṣṭhī brahmā tasya || 43 ||

saṃhārarātrimukhatāṇḍavaḍambareṣu dordaṇḍakhaṇḍapavanābhihatāḥ purastāt | yasya kramād apasaranti parikramaika- līlāvakāśaghaṭanārtham ivādrināthāḥ || 44 ||

tāṇḍavam uddhataṃ nṛttam_ | ḍambaraḥ prapañcaḥ | parikramaḥ pādasaṃcāraḥ || 44 ||

yasyānukārarabhasotthitadaṇḍapāda- gulphāgrasaṃghaṭitamaṇḍalapūrvarekhaḥ | paryastaparvataśitāśriviśīryamāṇa- māṇikyapādakaṭakaśriyam eti candraḥ || 45 ||

yasya gulphe ghaṭitā maṇḍalapūrvalekhā parivartulapradhānā maṇḍalasya vā bimbasya pūrvā prathamā lekhā kalā yasya tādṛśaḥ śaśī śirasi dhārāparyasanena viśīryamāṇamāṇikyamaṇeḥ pādakaṭakasya śobhāṃ vrajati | anukāro nṛttam_ | daṇḍapādo daṇḍākāratayordhvaṃgataś caraṇaḥ || 45 ||

dordaṇḍakhaṇḍapavanocchalitā vicitra- cārīvilāsadalitakṣitipīṭhabandhāḥ | yasya bhramanti girayo 'mbaramārga eva pātālapātacakitā iva tāṇḍaveṣu || 46 ||

ucchalitāḥ paryastāḥ | cārī ekapādapracārarūpā | nṛttavicchittayaś ca samapādātipādādyāḥ | ‘ekapādapracāro yaḥ sa cārīty abhidhīyate | pādābhyāṃ kramaṇaṃ yat tu karaṇaṃ nāma tadbhavet_ ||’ ambaramākāśaḥ || 46 ||

saṃhārameghamalinātanukālakūṭa- cchāyā salīlam adhikaṃdharam ullasantī | yasya pradakṣiṇayatīva kirīṭadhāma- baddhāspadaṃ dayitam indum upetya rātriḥ || 47 ||

kālakūṭacchāyeva rātrir iti vākyoktaṃ rūpakam_ | kirīṭasya mauler dhāma ūrdhvasthānaṃ yaddeśe kirīṭaṃ kriyate || 47 ||

gaṅgātaraṅgataralānanarandhralagna- cūḍāśaśāṅkakalikaṃ sphuraduttamāṅge | aspaṣṭacañcupuṭadaṣṭamṛṇālakoṭi- haṃsaśriyaṃ vahati yasya sitaṃ kapālam || 48 ||

kalikā kalaiva || 48 ||

saṃdhyāsamādhivinimīlitalocanasya yasyānukāram iva hāraphaṇī cakāra | uddhūlanonmṛditabhasmaparāgapūra- paryāptabhītibharakūṇitakātarākṣaḥ || 49 ||

uddhūlanaṃ bhasmanā vilepanam_ | kūṇitaṃ saṃkocitam_ || 49 ||

premāmṛtena girirājasutāśrayeṇa na plāvite 'tra hṛdaye 'sti mamāvakāśaḥ | yasyādhikaṃdharam itīva padaṃ babandha saṃdhukṣitatribhuvanāgniśikho viṣaughaḥ || 50 ||

premāmṛtena pūritatvād atra hṛdaye mamāvakāśaḥ sthānaṃ na vidyate | amṛtasaṃnidhau ca viṣasyāvakāśaḥ prasaro na bhavati | saṃdhukṣitaṃ dīpitam_ || 50 ||

ākarṇakṛṣṭakusumacyutareṇupiṅga- cūrṇīkṛtātanuśarāsanamadhyasaṃsthaḥ | prākcittavṛttivikṛter api roṣavahni- jvālāparīta iva yasya manobhavo 'bhūt || 51 ||

cittavṛttivikṛter api prāg ity anvayaḥ | parīto vyāptaḥ || 51 ||

puṣpāyudhena kṛtatīvrasamādhibheda- m āsphālite dhanuṣi sabhrukuṭīvibhaṅgam | tatkṣobhajena rabhasena vilaṅghyamāna- m ūrdhvākṣi yasya saruṣo mukulībabhūva || 52 ||

yasya saroṣatayā tṛtīyam akṣi mukulībabhūva | vahnim ānetuṃ saṃkucitam_ | bhrukuṭyā vibhaṅgo vicchittiḥ | tasya dhanuṣaḥ kṣobho vimardaḥ || 52 ||

bhītaiḥ puraḥ kusumamārgaṇadehadāha- saṃrambhaghoravikṛtir dadṛśe surair yaḥ | kaṇṭhodarāspadam anargalahuṃkṛtāgni- dhūmacchalena vikirann iva kālakūṭam || 53 ||

vikiran vistṛtaṃ kurvan_ | nedaṃ kālakūṭaṃ kiṃ tu huṃkṛtāgnidhūma ity apahnutiḥ || 53 ||

ūrdhvekṣaṇānalaśikhāpaṭalendhanatva- m āsādya yasya kupitasya samādhibhaṅgāt | cakre padaṃ makaraketur apāṅga eva sabhrūvilāsalaḍite laṭabhāṅganānām || 54 ||

laḍitam ullasitam_ | laṭabhā manoharāḥ || 54 ||

yasya vyaloki saruṣo mukham arjunena māyākirātavapuṣaḥ paripāṭalatviṭ | bhāsvallalāṭavinirūḍhavilocanāgni- jvālākalāpapariṇāmavaśād ivārāt || 55 ||

jvālākalāpo jvālāsamūhas tasya pariṇāmaḥ paripākaḥ | ārān nikaṭāt_ || 55 ||

karṇāvataṃsitaśikhaṇḍipatattrakhaṇḍāṃ guñjāphalasragupagūḍhapayodharāgrām | yasyekṣituṃ girisutām adhikābhirāma- rūpāṃ nigūḍham udakaṇṭhata sāgni cakṣuḥ || 56 ||

patattrakhaṇḍaṃ pakṣacchedaḥ | guñjā raktikā | udakaṇṭhata aicchat_ || 56 ||

yasya vyabhidyata manaḥ sutarāṃ kirāta- rūpasya śailasutayā śabarībhavantyā | karṇāvataṃsitamanoharakekipiccha- sacchāyadīrghataralocanaśaṅkupātaiḥ || 57 ||

vyabhidyata vyahanyata | kekī mayūraḥ | locane eva śaṅkū mayūrapicchācitau śarau || 57 ||

yasyāvalambitakirātatanor nigūḍha- netroṣmakāraṇa ivāśu kirīṭikopāt | svedodabindunikaraś cakare kareṇa nirmṛjya sīkarakarālitadiglalāṭāt || 58 ||

kirīṭī arjunaḥ | sīkarair vyāptā diśo yena īdṛśo lalāṭāt kareṇa kṛtvā yasyārjunakopaprabhavo dharmāmbhaḥkaṇanicayaś ca kare kṣiptaḥ | ‘kṝ vikṣepe’ | ‘ṛcchaty ṝtām_’ iti guṇaḥ || 58 ||

līlānatānanatayā pratibimbavarti- cūḍāśaśāṅkaśakalaṃ kucam ardhabhāge | yaḥ paśyati sma dadhataṃ dhutadugdhasindhu- kallolalaṅghitasudhākalaśasya līlām || 59 ||

ardhabhāge kucaṃ pratibimbitacūḍāśaśāṅkaśakalam_ || 59 ||

yenādirājatanayākucamaṇḍalāgra- vinyastahastakamalaṃ bibharāṃbabhūve | vakṣo himācalaśilāvikaṭaṃ satumba- vīṇāniveśam iva dhūlanavibhrameṣu || 60 ||

......vīṇāvādanasamaye puro deśe gauryāḥ sthitatvāt_ | ‘kāṇḍavīṇā’ ity api pāṭhe 'yam evārthaḥ || 60 ||

saṃdhyājalāñjalim apojjhati yaś cireṇa sasvedasīkarakaṇotpulakāṅgayaṣṭiḥ | dehārdhabhāgagataśailasutānanendu- bimbāvalokanasukhastimitekṣaṇaśrīḥ || 61 ||

śailasutāyā mukhendubimbasya darśanaṃ jalāñjalau pratibimbitatvāt_ || 61 ||

śliṣṭo 'nayoḥ kimu bhaved uta naiva saṃdhi- r dehārdhayor ghaṭitayor iti tatparīkṣām | āripsu yasya rabhasād iva cakṣur ardha- nārīśvarasya niriyāya lalāṭapaṭṭāt || 62 ||

tasya saṃdheḥ parīkṣām ivārabdhukāmaṃ nayanaṃ yasya vegān niriyāya || 62 ||

yasyānatipravaṇarudradṛśo 'ṅghriyugma- śākhānakhāṃśuviśadīkṛtapūrvabhāgāḥ | āpāṇḍumūlaparipāṭalapuṇḍarīka- pattraśriyaṃ dadhati vahniśikhāpiśaṅgyaḥ || 63 ||

yasya saṃbandhino 'ṅghriyugalasyāṅgulīnāṃ nakhāṃśubhir viśadīkṛtapurodeśā vahniśikhābhiś ca kapiśāḥ praṇatiparāṇāṃ rudrāṇāṃ dṛśaḥ pāṇḍuramūlasya kamalasya śobhāṃ dhārayanti || 63 ||

stutimukharamukhās taṃ srastaratnāvataṃsāḥ sthiracaraṇasaparyābandhurāvandhyasaṃdhyāḥ | pratidinam upaceruḥ siddhasādhyāmaraughāḥ sphuṭakarapuṭakoṭiśliṣṭabhāsvatkirīṭāḥ || 64 ||

siddhasādhyanāmnām amarāṇāṃ samūhās taṃ devam upacerur asevanta | caraṇayoḥ saparyā pūjā tayā bandhurā manohāriṇyaḥ, ata evāvandhyāḥ saphalāḥ saṃdhyā yeṣāṃ te || 64 ||

iti śrībālabṛhaspatyanujīvino vāgīśvarāṅkasya vidyādhipatyaparanāmno mahākave rājānakaśrīratnākarasya kṛtau ratnāṅke haravijaye mahākāvye purāripurīvarṇano nāma prathamaḥ sargaḥ |

‘paryante pratisargaṃ ratnapadaṃ yatnataḥ prayuktavatā | nijanāmāṅkaṃ kavinā viracitam etan mahākāvyam_ ||’ iti rājānakajayānakasūnor alakasya kṛtau haravijayaviṣamapadodyote prathamaḥ sargaḥ ||